1 Mo i bin hapen se afta we mi, Lod God, mi bin ronemaot tufala i go aot, Adam i stat blong wok long graon, mo i stat blong ^arul ova long ol animol blong plantesen, mo blong kakae bred blong hem tru long swet blong fes blong hem, olsem we mi, Lod, mi bin komandem hem. Mo Iv tu, waef blong hem, i bin wok wetem hem.”

2 Mo Adam i kam blong save waef blong hem, mo waef blong hem i bin ^abonem ol boe mo ol ^bgel blong tufala, mo tufala i bin stat blong ^dgat fulap pikinini mo blong fulumap wol.

3 Mo stat long taem ia i go, ol boe mo ol ^agel blong Adam, oli bin stat blong go tutu olbaot long graon, mo blong wok long graon, mo blong lukaot long ol animol, mo olgeta tu, oli gat ol boe mo ol gel.

4 Mo Adam mo Iv, waef blong hem, tufala i bin prea long nem blong Lod, mo tufala i bin harem voes blong Lod we i kam long rod we i go long Garen blong ^aIden, we i stap toktok long tufala, be tufala i no luk hem; from se tufala i no bin stap long ^bples we hem i stap long hem.

5 Mo hem i bin givim ol komanmen long tufala, se bae tufala i mas ^awosipim Lod, God blong tufala, mo tufala i mas givim ol ^bfasbon blong ol grup blong ol animol blong olgeta, blong mekem wan ofring long Lod. Mo Adam i bin ^dobei long ol komanmen blong Lod.

6 Mo afta long plante dei, wan ^aenjel blong Lod i bin kamaot long Adam, i talem se: “?From wanem nao yu yu stap mekem ol ^bsakrifaes i go long Lod?” Mo Adam i bin talem long hem: “Mi no save. Mi save nomo se Lod i bin givim komanmen ia long mi.”

7 Mo afta, enjel i bin toktok, i talem se: “Samting ia i ^aripresentem ^bsakrifaes blong Wan Stret Pikinini Ia Nomo blong Papa, we hem i fulap long ^dgladhat mo trutok.

8 Taswe, bae yu mekem evri samting we yu stap mekem long ^anem blong Pikinini, mo bae yu ^bsakem sin mo bae yu ^dprea long God long nem blong Pikinini blong oltaem gogo i no save finis.”

9 Mo long tetaem ia, ^aTabu Spirit i bin kamdaon long Adam, mo i bin testifae abaot Papa mo Pikinini, i talem se: “Mi, mi ^bWan Stret Pikinini Ia Nomo blong Papa stat long stat finis, naoia i go mo blong oltaem, blong mekem se olsem we yu bin ^dfoldaon, bae mi ^epemaot yu, mo evri man tu, folem hamas we bae oli wantem.”

10 Mo long dei ia, Adam i bin blesem God mo i bin ^afulap long Tabu Spirit, mo i stat blong ^bprofesae long saed blong evri famli blong wol, i stap talem se: “Mi blesem nem blong God, from se, from mi bin brekem loa, nao ae blong mi i bin open; mo long laef ia, bae mi gat ^dglad, mo bakegen, long ^ebodi blong mit mo bun, bae mi luk God bakegen.”

11 Mo ^aIv, waef blong hem, i bin harem evri samting ia mo hem i bin glad, i stap talem se: “Sapos yumitu no bin brekem loa, bae yumitu neva gat ^bpikinini, mo neva bae yumitu save gud mo nogud, mo save glad long fasin blong pemaot man, mo laef we i no save finis we God i stap givim long evriwan we i stap obei.”

12 Mo Adam mo Iv i bin blesem nem blong God, mo tufala i bin ^atalemaot evri samting ia long ol boe mo ol gel blong tufala.

13 Mo ^aSetan i bin kam long medel blong olgeta, i stap talem se: “Mi tu, mi wan boe blong God;” mo hem i bin givim oda long olgeta, i talem se: “Yufala i no biliv long samting ia;” mo oli no bin ^bbiliv, mo oli bin ^dlavem Setan moa i bitim God. Mo ol man oli bin stat, long tetaem ia i go, blong kam man blong folem ^efasin blong wol, blong gat rabis tingting, mo mekem samting olsem devel.

14 Mo Lod God i bin toktok long ol man long evri ples tru long ^aTabu Spirit, mo i bin givim komanmen long olgeta se oli mas sakem sin;

15 Mo hamas we oli ^abiliv long Pikinini, mo oli sakem sin blong olgeta, bae hem i ^bsevem olgeta; mo hamas we oli no biliv, mo oli no sakem sin, bae ^ddevel i stap kontrolem olgeta; mo ol toktok ia oli bin kamaot long maot blong God long wan strong toktok; taswe, oli mas hapen.

16 Mo Adam mo Iv, waef blong hem, tufala i no bin stop blong prea long God. Mo Adam i bin save Iv, waef blong hem, mo hem i bin gat bel mo bonem ^aKen i kam long wol, mo talem se: “Mi mekem wan man wetem help blong Lod; taswe, bae hem i no sakemaot ol toktok blong Lod.” Be luk, Ken i no bin lisin, i talem se: “?Huia Lod ia we mi mas save long hem?”

17 Mo bakegen, Iv i gat bel mo i bonem brata blong Ken, ^aEbel. Mo Ebel i bin ^blisin gud long voes blong Lod. Mo Ebel i bin man we i stap lukaot long sipsip, be Ken i bin man blong wok long graon.

18 Mo Ken i bin ^alavem Setan moa i bitim God. Mo Setan i bin givim oda long hem, i talem se: “Yu ^bmekem wan ofring i go long Lod.”

19 Mo afta long sam taem, i bin hapen se Ken i bin karem sam frut blong graon, i mekem wan ofring i go long Lod.

20 Mo Ebel, hem tu i tekem ol fasbon blong grup blong animol blong hem, mo gris blong olgeta. Mo Lod i bin gat respek long Ebel, mo long ^aofring blong hem;

21 Be long Ken mo long ^aofring blong hem, hem i no gat respek long hem. Nao, Setan i bin save hemia, mo hem i bin glad long hem. Mo Ken i bin kros tumas, mo fes blong hem i jenis wantaem.

22 Mo Lod i bin talem long Ken: “?From wanem nao yu kros tumas? ?From wanem fes blong yu i jenis wantaem?”

23 Sapos yu yu stap mekem gud samting, bae mi ^aakseptem yu. Mo sapos yu no stap mekem gud, sin i stap slip long doa, mo Setan i wantem gat paoa long yu; mo sapos yu no stap lisin gud long ol komanmen blong mi, bae mi givim yu i go, mo bae i stap long yu mo wanem we yu wantem. Mo bae yu rul ova long hem;

24 From se, stat long naoia i go, bae yu papa blong ol giaman blong hem; bae oli singaotem yu ^aTudak; from se yu bin stap tu bifo wol ia i stap.

25 Mo long taem we bae i kam, bae oli talem se—“Ol ^arabis sin ia oli kam long Ken; from hem i bin sakemaot bigfala advaes we i kam long God;” mo hemia i wan strong nogud tok we bae mi putum long yu, sapos yu no sakem sin.

26 Mo Ken i bin kros tumas, mo i no bin lisin bakegen long voes blong Lod, mo long voes blong Ebel, brata blong hem, we i bin wokbaot long tabu fasin long fored blong Lod.

27 Mo Adam mo waef blong hem i bin krae long fored blong Lod, from Ken mo ol brata blong hem.

28 Mo i bin hapen se Ken i bin tekem wan long ol gel blong brata blong hem olsem waef blong hem, mo tufala i bin ^alavem Setan moa i bitim God.

29 Mo Setan i bin talem long Ken se: “Yu promes tru long trot blong yu, mo sapos yu talem, bae yu ded; mo bae yu mekem ol brata blong yu oli promes antap long hed blong olgeta, mo tru long God we i stap laef, se bae oli no talem samting ia; from sapos oli talem samting ia, i tru, bae oli ded nomo; mo hemia i blong mekem se papa blong yu bae i no save samting ia; mo tedei, bae mi givim brata blong yu, Ebel, long han blong yu.”

30 Mo Setan i bin promes long Ken se bae hem i mekem samting folem oda blong hem. Mo evri samting ia, oli bin mekem long sikret.

31 Mo Ken i bin talem: “Tru, mi mi Mahan, masta blong bigfala sikret ia, we mi save ^akilimded man mo kasem paoa.” Taswe, oli bin singaotem Ken se, Masta ^bMahan, mo hem i bin gat glori long fasin nogud blong hem.

32 Mo Ken i bin go long plantesen, mo Ken i bin toktok wetem Ebel, brata blong hem. Mo i bin hapen se taem tufala i bin stap long plantesen, Ken i bin girap agensem Ebel, brata blong hem, mo i bin kilim hem i ded.

33 Mo Ken i bin ^agivim glori long hem long wanem we hem i bin mekem, i talem se: “Mi mi fri; yes, ol grup blong ol animol blong brata blong mi oli foldaon long han blong mi.”

34 Mo Lod i talem long Ken se: “?Wehem Ebel, brata blong yu?” Mo hem i talem se: “Mi no save. ?Bae mi nao mi man blong ^alukaot long brata blong mi?”

35 Mo Lod i talem se: “?Wanem samting ia we yu yu mekem? Voes blong blad blong brata blong yu i go long graon mo i stap krae long mi.

36 Mo nao, bae mi sakem wan strong nogud tok long yu from graon ia we i bin openem maot blong hem blong tekem blad blong brata blong yu long han blong yu.

37 Mo taem bae yu wok long graon, bae hem i nomo givim ol strong mo gud kakae long yu. Bae yu ^aman blong stap ronwe, mo wan man blong folem rod, long wol ia.”

38 Mo Ken i bin talem long Lod: “Setan i ^atemtem mi from ol grup blong ol animol blong brata blong mi. Mo mi bin kros tu; from se, ofring blong hem, yu bin akseptem, be i no hemia blong mi; panismen blong mi i bigwan tumas we mi no save tekem.

39 Luk, yu ronemaot mi tedei, longwe long fes blong Lod, mo bae yu haedem mi long fes blong yu; mo bae mi wan man blong ronwe, mo wan man blong folem rod, long wol ia; mo bambae i hapen se, hem we bae i faenem mi, bae i kilimded mi, from ol rabis fasin blong mi, from ol samting ia, oli no haed long Lod.”

40 Mo mi, Lod, mi bin talem long hem se: “Huia i kilimded yu, bae mi givimbak long hem seven taem moa. Mo mi, Lod, mi bin putum wan ^amak long Ken, blong mekem se eniwan we i faenem hem, bae i no save kilimded hem.”

41 Mo Lod i katemaot Ken long ^afes blong hem, mo wetem waef blong hem mo plante long ol brata blong hem, hem i bin stap long graon blong Nod, long Is saed blong Iden.

42 Mo Ken i bin save waef blong hem, mo hem i bin gat bel, mo i bonem Inok; mo Inok tu i bin gat plante boe mo gel. Mo hem i bin bildim wan bigtaon, mo hem i bin singaotem ^abigtaon ia folem nem blong boe blong hem, Inok.

43 Mo Inok i bin gat wan boe, Irad, mo ol narafala boe mo gel. Mo Irad i gat Mehujael, mo ol narafala boe mo gel. Mo Mehujael i gat Metusael, mo ol narafala boe mo gel. Mo Metusael i bin gat Lamek.

44 Mo Lamek i bin tekem tufala waef blong hem; nem blong wan i Ada, mo nem blong narafalawan, i Jila.

45 Mo Ada i bonem Jabal; hem i papa blong olgeta ia we oli stap nomo long haos tapolen, mo oli stap lukaot long ol animol blong plantesen; mo nem blong brata blong hem i Jubal, we i papa blong olgeta evriwan ia we oli stap kilim gita mo blo long smol bambu.

46 Mo Jila, hem i bonem Tubalken, wan tija blong evriwan we i stap wokem samting long bras mo aean. Mo sista blong Tubalken, nem blong hem Nahama.

47 Mo Lamek i bin talem long ol waef blong hem, Ada mo Jila: “Harem voes blong mi, yutufala ol waef blong Lamek, lisin gud long toktok blong mi; from se mi bin kilimded wan man we i bin givim kil long mi, mo mi faetem wan yang man we i bin mekem mi harem nogud.”

48 Sapos i tru se Lod i givimbak seven taem long man we i kilimded Ken, i tru, bae Lod i givimbak ^aseventi mo seven taem long man we bae i kilimded Lamek.

49 From se Lamek i bin mekem wan ^akavenan wetem Setan, folem fasin blong Ken, we i mekem se hem i kam Masta Mahan, masta blong bigfala sikret ia we Setan i bin givim long Ken; mo Irad, boe blong Inok, we i kam blong save sikret blong olgeta, i stat blong talemaot sikret ia long ol boe blong Adam;

50 Taswe, Lamek, we i bin kros, i bin kilimded hem, i no olsem Ken i kilimded brata blong Ebel, from i wantem kasem paoa, be hem i bin kilimded hem from strong promes ia we i bin stap.

51 From se, stat long taem blong Ken, i bin gat wan ^asikret plan i stap, mo ol wok blong olgeta oli bin stap long tudak, mo oli bin save evriwan long ol brata blong olgeta.

52 Taswe, Lod i bin sakem strong nogud tok long Lamek mo long haos blong hem, mo long evriwan we oli bin mekem wan kavenan wetem Setan; from se oli no bin stap obei long ol komanmen blong God, mo sikret plan ia i bin mekem se God i no bin glad, mo hem i no bin givhan long olgeta, mo wok blong olgeta oli bin ol rabis sin, mo i stat blong go olbaot long medel blong ol ^aboe blong ol man. Mo samting ia i bin stap long medel blong ol boe blong ol man.

53 Mo long medel blong ol gel blong ol man, oli no bin stap tokbaot sikret plan ia, from se Lamek i bin talem sikret ia long ol waef blong hem, mo olgeta oli bin go agensem hem, mo oli bin talemaot olgeta samting ia evri ples, mo oli no bin gat lav mo sore.

54 Taswe, oli no bin laekem Lamek nating, mo oli bin ronemaot hem, mo Lamek i nomo go bakegen long medel blong ol pikinini blong ol man, nogud bae hem i ded.

55 Mo olsem ia nao ol wok blong ^atudak oli stat blong win long medel blong ol pikinini blong ol man.

56 Mo God i bin sakem wan strong nogud tok long wol we i wan strong nogud tok we i soa, mo God i bin kros long ol man nogud, mo long ol pikinini blong ol man we hem i bin mekem olgeta;

57 From se oli no bin lisin gud long voes blong hem, o oli no bin biliv long ^aWan Stret Pikinini Ia Nomo blong hem, we hem i bin talem se Pikinini ia bae i kam long medel blong taem, Pikinini ia we i bin rere bifo long stat blong wol ia.

58 Mo olsem ia nao oli stat blong prijim ^aGospel, stat long stat, mo ol tabu ^benjel we tabu ples blong God i bin sendem olgeta oli stap talemaot gospel ia, tru long voes blong hemwan, mo tru long ^dpresen we i Tabu Spirit.

59 Mo olsem ia nao God i bin setemap evri samting long Adam, tru long wan tabu odinens, mo God i bin prijim Gospel, mo i bin talemaot wan ofisol toktok, se Gospel bae i stap long wol, kasem en blong taem blong hem; mo i bin olsem. Amen.