1 Pea naʻe hoko ʻo pehē naʻe fai atu ʻa e lea ʻa ʻĪnoké, ʻo pehē: Vakai, naʻe akonaki ʻaki ʻe heʻetau tamai ko ʻĀtamá ʻa e ngaahi meʻá ni, pea kuo tui ʻa e tokolahi ʻo nau hoko ko e ngaahi ^afoha ʻo e ʻOtuá, pea kuo taʻetui ʻa e tokolahi, ʻo nau malaʻia ʻi heʻenau ngaahi angahalá, pea ʻoku nau ʻamanaki atu ʻi he ^bmanavahē, ʻi he fakamamahi, ki hono lilingi hifo kiate kinautolu ʻo e tuputāmaki kakaha ʻo e houhau ʻo e ʻOtuá.

2 Pea naʻe kamata mei he taimi ko iá ʻo fai atu ʻa e kamata ʻe ʻĪnoke ke kikite, ʻo ne pehē ki he kakaí: Lolotonga ʻeku fai fonongá, peá u tuʻu ʻi he potu ko Mahusiá, peá u tangi ki he ʻEikí, naʻe ongo mai ha leʻo mei he langí, ʻo pehē—Ke ke tafoki atu, pea ʻalu atu ki he funga ʻo e moʻunga ko Simioné.

3 Pea naʻe hoko ʻo pehē naʻá ku tafoki peá u ʻalu hake ki he funga moʻungá; pea ʻi heʻeku tuʻu ʻi he funga moʻungá, naʻá ku vakai ki he matangaki ʻa e ngaahi langí, pea naʻe fakakofuʻi au ʻaki ʻa e ^anāunau;

4 Peá u mamata ki he ʻEikí; pea naʻá ne tuʻu ʻi muʻa ʻiate au, pea naʻá ne folofola mai kiate au, ʻo hangē ko e fetalanoaʻaki ʻa ha tangata mo ha tangata ʻe taha, ko e ^amata ki he mata; peá ne folofola mai kiate au: ^bVakai, pea te u fakahā kiate koe ʻa e māmaní ʻo feʻunga mo e ngaahi toʻu tangata lahi.

5 Pea naʻe hoko ʻo pehē naʻá ku mamata ʻi he teleʻa ko Siumú, pea ʻiloange, ko ha fuʻu kakai tokolahi ʻa ia naʻe nofo ʻi he ngaahi fale fehikitaki, ʻa ia ko e kakai ʻo Siumú.

6 Pea naʻe toe folofola mai ʻa e ʻEikí kiate au: Vakai; pea naʻá ku mamata ki he feituʻu tokelaú, pea naʻá ku mamata ki he kakai ʻo Kēnaní, ʻa ia naʻe nofo ʻi he ngaahi fale fehikitaki.

7 Pea naʻe folofola mai ʻa e ʻEikí kiate au: Kikite; peá u kikite, ʻo pehē: Vakai, ʻe ʻalu atu ʻa e kakai ʻo Kēnaní, ʻa ia ʻoku fuʻu tokolahi, kuo nau teuteu ke tauʻi ʻa e kakai ʻo Siumú, pea te nau tāmateʻi ʻa kinautolu pea nau ʻauha ai ʻo ʻosiʻosingamālie; pea ʻe vahevahe ʻa e kakai ʻo Kēnaní ʻi he fonuá, pea ʻe kakā ʻa e kelekelé mo taʻefua, pea ʻe ʻikai nofo ai ha kakai kehe ka ko e kakai pē ʻo Kēnaní;

8 He vakai, ʻe fakamalaʻiaʻi ʻe he ʻEikí ʻa e fonuá ʻaki ʻa e fuʻu vela lahi, pea ʻe hokohoko atu ai pē ʻa ʻene kakaá ʻo taʻengata; pea naʻe hoko ʻa e ^alanu ʻuliʻuli ki he fānau kotoa pē ʻo Kēnaní, pea naʻe fehiʻanekinaʻi ʻa kinautolu ʻi he kakai kotoa pē.

9 Pea naʻe hoko ʻo pehē naʻe folofola mai ʻa e ʻEikí kiate au: Vakai; peá u sio atu, peá u mamata ki he fonua ko Seiloní mo e fonua ko ʻĪnoké, pea mo e fonua ko ʻOmineá, pea mo e fonua ko Hení, pea mo e fonua ko Semí, pea mo e fonua ko Hanelá, pea mo e fonua ko Hananaihaá, pea mo e kakai kotoa pē ʻi aí;

10 Pea naʻe folofola mai ʻa e ʻEikí kiate au: ʻAlu ki he kakaí ni ʻo pehē atu kiate kinautolu—Mou ^afakatomala, telia naʻá ku ʻalu atu ʻo taaʻi ʻa kinautolu ʻaki ʻa e malaʻia, pea nau mate.

11 Pea naʻá ne fai mai kiate au ʻa e fekau ke u fai ^apapitaiso ʻi he huafa ʻo e Tamaí, pea mo e ʻAló, ʻa ia ʻoku fonu ʻi he ^bʻaloʻofa mo e moʻoni, pea mo e ^cLaumālie Māʻoniʻoní, ʻa ia ʻokú ne fakamoʻoniʻi ʻa e Tamaí mo e ʻAló.

12 Pea naʻe hoko ʻo pehē naʻe fai atu ʻe ʻĪnoke ʻene ui ki he kakai kotoa pē, ke nau fakatomala, tuku kehe pē ʻa e kakai ʻo Kēnaní;

13 Pea naʻe lahi fau ʻa e ^atui ʻa ʻĪnoké ko ia naʻá ne tataki ʻa e kakai ʻo e ʻOtuá, pea naʻe ō mai ʻa honau ngaahi filí ke tauʻi ʻa kinautolu; pea naʻá ne lea ʻaki ʻa e folofola ʻa e ʻEikí, pea naʻe ngalulu ʻa e fonuá, pea naʻe hola ʻa e ngaahi ^bmoʻungá, ʻo hangē pē ko ʻene fekaú; pea naʻe liliu ʻa e ngaahi ^cvaitafé mei honau ngaahi tafeʻangá; pea naʻe ongona ʻa e ngungulu ʻa e fanga laione mei he feituʻu maomaonganoá; pea manavahē lahi ʻa e ngaahi puleʻanga kotoa pē, ko e meʻa ʻi he lahi pehē fau hono ^dmālohi ʻo e lea ʻa ʻĪnoké, pea mo e lahi fau ʻo e mālohi ʻo e lea naʻe tuku kiate ia ʻe he ʻOtuá.

14 Naʻe ʻalu hake foki ha fonua mei he loto moaná, pea naʻe pehē fau ʻa e lahi ʻo e manavahē ʻa e ngaahi fili ʻo e kakai ʻo e ʻOtuá, naʻa nau hola ai ʻo tuʻu mei he mamaʻo atú ʻo nau ʻalu atu ki he fonua ʻa ia naʻe ʻalu hake mei he loto moaná.

15 Pea ko e ^akakai lalahi ʻo e fonuá foki, naʻa nau tuʻu mei he mamaʻo atú; pea naʻe ʻalu atu ʻa e malaʻia ki he kakai kotoa pē naʻe tauʻi ʻa e ʻOtuá;

16 Pea mei he taimi ko iá ʻo fai atu naʻe ʻi ai ʻa e ngaahi tau mo e lilingi toto ʻiate kinautolu; ka naʻe hāʻele mai ʻa e ʻEikí ʻo ʻafio ʻi hono kakaí, pea nau nofo ʻi he māʻoniʻoni.

17 Naʻe ʻi he ngaahi puleʻangá kotoa pē ʻa e ^ailifia ki he ʻEikí, koeʻuhi naʻe fuʻu lahi fau ʻa e nāunau ʻo e ʻEikí, ʻa ia naʻe ʻi hono kakaí. Pea naʻe ^btāpuakiʻi ʻe he ʻEikí ʻa e fonuá, pea naʻa nau monūʻia ʻi he ngaahi moʻungá, pea ʻi he ngaahi potu māʻolungá, ʻo nau tupulekina.

18 Pea naʻe ui ʻe he ʻEikí ʻa hono kakaí ko ^aSaione, koeʻuhí he naʻa nau ^bloto-taha pē mo fakakaukau taha, pea nau nofo ʻi he māʻoniʻoni; pea naʻe ʻikai ha kakai masiva ʻiate kinautolu.

19 Pea naʻe fai atu ʻe ʻĪnoke ʻa ʻene malangá ʻi he māʻoniʻoni ki he kakai ʻo e ʻOtuá. Pea naʻe hoko ʻo pehē ʻi hono ngaahi ʻahó, naʻá ne langa ha kolo ʻa ia naʻe ui ko e Kolo ʻo e Māʻoniʻoní, ʻa ia ko Saione.

20 Pea naʻe hoko ʻo pehē naʻe fefolofolai ʻa ʻĪnoke mo e ʻEikí; pea naʻá ne pehē ange ki he ʻEikí: Ko e moʻoni ʻe nofo malu ʻa ^aSaione ʻo taʻengata. Ka naʻe folofola mai ʻa e ʻEikí kia ʻĪnoke: Kuó u tāpuakiʻi ʻa Saione, ka kuó u fakamalaʻiaʻi ʻa hono toe ʻo e kakaí.

21 Pea naʻe hoko ʻo pehē naʻe fakahā ʻe he ʻEikí kia ʻĪnoke ʻa e kakai kotoa pē ʻo e māmaní; pea naʻá ne mamata, pea ʻilo ange, naʻe faifai pea ^aʻohake ʻa Saione ki he langí. Pea naʻe folofola ʻa e ʻEikí kia ʻĪnoke: Vakai ki hoku nofoʻangá ʻo taʻengata.

22 Pea mamata foki ʻa ʻĪnoke ki hono toe ʻo e kakaí ʻa ia ko e ngaahi foha ʻo ʻĀtamá; pea ko e fefiofi ʻa kinautolu ʻo e hako kotoa pē ʻo ʻĀtamá tuku kehe pē ʻa e hako ʻo Keiní, he naʻe ^aʻuliʻuli ʻa e hako ʻo Keiní, pea naʻe ʻikai hanau nofoʻanga ʻi honau lotolotongá.

23 Pea hili iá naʻe ʻohake ʻa Saione ki he ^alangí, naʻe ^bmamata ʻa ʻĪnoke, pea ʻiloange, naʻe ʻi muʻa ʻiate ia ʻa e ngaahi puleʻanga ^ckotoa pē ʻo e māmaní;

24 Pea naʻe haʻu ʻa e toʻu tangata hoko mo e toʻu tangata; pea naʻe māʻolunga mo ^ahiki hake ʻa ʻĪnoke, ʻio ʻi he fatafata ʻo e Tamaí, pea mo e Foha ʻo e Tangatá; pea vakai, naʻe ʻi he funga hono kotoa ʻo e māmaní ʻa e mālohi ʻo Sētané.

25 Pea naʻá ne mamata ki he kau ʻāngelo ʻoku ʻalu hifo mei he loto langí; peá ne fanongo ki ha leʻo-lahi ʻoku pehē: Ko e malaʻia, ko e malaʻia ki he kakai ʻo e māmaní.

26 Pea naʻá ne mamata kia Sētane; pea naʻe ʻi hono nimá ha fuʻu ^asēini, pea naʻe fakapūlou ʻe ia ʻa e funga kotoa ʻo e māmaní ʻaki ʻa e ^bfakapoʻuli; pea naʻá ne sio hake ʻo kata, pea naʻe fiefia ʻa ʻene kau ^cʻāngeló.

27 Pea naʻe mamata ʻa ʻĪnoke ki he kau ^aʻāngelo ʻoku ʻalu hifo mei he langí, ʻo ^bfakamoʻoniʻi ʻa e Tamaí mo e ʻAló; pea naʻe tō hifo ʻa e Laumālie Māʻoniʻoní ki he tokolahi, pea naʻe toʻo hake ʻa kinautolu ʻe he ngaahi mālohi ʻo e langí ki Saione.

28 Pea naʻe hoko ʻo pehē, naʻe ʻafio hifo ʻa e ʻOtua ʻo e langí ki hono toe ʻo e kakaí, pea naʻá ne tangi; pea naʻe fakamoʻoni ki ai ʻa ʻĪnoke, ʻo pehē: Ko e hā ʻa e meʻa ʻoku tangi ai ʻa e ngaahi langí, pea mokulu hifo honau loʻimata ʻo hangē ko e ʻuha ki he ngaahi moʻungá?

29 Pea naʻe pehē ʻe ʻĪnoke ki he ʻEikí: Ko e hā ʻa e meʻa ʻokú ke lava ai ke ^atangí, ka ʻokú ke māʻoniʻoni pea ʻokú ke ʻi ai, mei he taʻengatá kotoa ki he taʻengatá kotoa?

30 Pea ka ne lava ʻe he tangatá ʻo lau ʻa e ngaahi momoʻi meʻa ʻo e māmaní, ʻio, ʻo e ngaahi ^amāmani ʻe lau miliona ʻo hangē ko ʻení, ʻe ʻikai hoko ia ko hano kamataʻanga ʻo e lahi ʻo hoʻo ngaahi ^bfakatupú; pea ʻoku kei fofola atu ai pē ʻa ho ngaahi puipuí; ka neongo iá ka ʻokú ke ʻi hena pē, pea ʻoku ʻi hena ʻa ho fatafatá; pea ʻokú ke angatonu foki; ʻokú ke ʻaloʻofa mo angaʻofa ʻo taʻengata;

31 Pea kuó ke toʻo atu ʻa Saione ki ho fatafata ʻoʻoú, mei hoʻo ngaahi fakatupu kotoa pē, mei he taʻengatá kotoa ki he taʻengatá kotoa; pea ʻoku ʻikai ha meʻa ka ko e ^amelinó, ^bfakamaau totonú, mo e ^cmoʻoní pē ʻe nofo ʻi ho taloní; pea ʻe muʻomuʻa ʻa e ʻaloʻofá ʻi ho fofongá pea ʻoku ʻikai hano ngataʻanga; ʻokú ke lava fēfē ke tangi?

32 Naʻe folofola ʻa e ʻEikí kia ʻĪnoke: Vakai ki he faʻahingá ni ko ho kāingá; kuó u fakatupu ʻa kinautolu ʻaki hoku ^anima pē ʻoʻokú, pea naʻá ku foaki kiate kinautolu ʻa honau ^bpotó, ʻi he ʻaho naʻá ku fakatupu ai ʻa kinautolú; pea ʻi he Ngoue ʻo ʻĪtení, naʻá ku foaki ai ki he tangatá ʻa ʻene ^ctauʻatāina ke filí;

33 Pea kuó u pehē ki ho kāingá, pea kuó u fai foki ʻa e fekau, ke nau ^afeʻofaʻaki ʻiate kinautolu, pea ke nau fili au, ʻa ia ko ʻenau Tamaí; kae vakai, ʻoku ʻikai haʻanau ʻofa, pea nau fehiʻa ki honau toto ʻonautolú pē;

34 Pea kuo tupu ʻa e ^aafi ʻo ʻeku ʻitá kiate kinautolu; pea ʻi heʻeku ʻita kakahá te u ʻoatu ʻa e ngaahi ^blōmakí kiate kinautolu, he kuo tupu ʻa ʻeku fuʻu ʻita lahi kiate kinautolu.

35 Vakai, ko e ʻOtuá au; ko hoku hingoá ko e ^aTangata ʻo e Māʻoniʻoni; ko hoku hingoá ko e Tangata ʻo e Akonaki; pea ko hoku ^bhingoá ko Lauikuonga mo e Taʻengata, foki.

36 Ko ia, ʻoku ou lava ke mafao atu ʻa hoku ongo nimá ʻo puke ʻa e ngaahi fakatupu kotoa pē ʻa ia kuó u faʻú; pea ʻoku lava foki ʻe hoku ^amatá ke ʻasi ki ai, pea ʻi he ngaahi meʻa kotoa kuo fakatupu ʻe hoku nimá, kuo teʻeki ke ʻi ai ha ^bfai angahala lahi pehē fau ʻo hangē ko ia ʻoku ʻi he lotolotonga ʻo ho kāingá.

37 Kae vakai, ʻe ʻi he ʻulu ʻo ʻenau ngaahi tamaí ʻa ʻenau ngaahi angahalá; ʻe hoko ʻa Sētane ko ʻenau tamaí, pea hoko ʻa e mamahi ko honau ikuʻangá; pea ʻe tengihia ʻa kinautolu ʻe he ngaahi langí kotoa, ʻio ʻa e ngaahi meʻa kotoa pē kuo fakatupu ʻe hoku nimá; ko ia, he ʻikai koā ʻoku totonu ke tangi ʻa e ngaahi langí, ko e meʻa ʻi he mamahiʻia ʻa kinautolú ni?

38 Kae vakai, ko kinautolú ni ʻa ia ʻoku mamata ki ai ʻa ho matá, te nau mate ʻi he ngaahi lōmaki; pea vakai, te u fakapōpulaʻi ʻa kinautolu; kuó u teuteu ha ^afale fakapōpula moʻonautolu.

39 Pea ^ako ia kuó u filí kuó ne tautapa ʻi hoku ʻaó. Ko ia, te ne mamahi koeʻuhi ko ʻenau ngaahi angahalá; ka ʻo kapau te nau fakatomala ʻi he ʻaho ʻa ia ʻe foki mai ai kiate au ʻa ʻeku ^bTokotaha kuo Filí, pea te nau ʻi he ^cmamahi kae ʻoua kuo hokosia ʻa e ʻaho ko iá;

40 Ko ia, ko e meʻa ʻeni ʻe tangi ai ʻa e ngaahi langí, ʻio, pea mo e meʻa kotoa pē kuo fakatupu ʻe hoku nimá.

41 Pea naʻe hoko ʻo pehē naʻe folofola ʻa e ʻEikí kia ʻĪnoke, ʻo fakahā kia ʻĪnoke ʻa e ngaahi ngāue kotoa pē ʻa e fānau ʻa e tangatá; ko ia naʻe ʻilo ʻe ʻĪnoke, mo ne mamata ki heʻenau fai angahalá, pea mo ʻenau mamahí, peá ne tangi mo mafao atu hono nimá, pea naʻe ^afakafuofuolahi ʻa hono lotó ʻo hangē ko e taʻengatá; pea naʻe fakaʻamu ʻa hono lotó; pea naʻe ngalulululu ʻa e taʻengatá kotoa.

42 Pea mamata foki ʻa ʻĪnoke kia ^aNoa mo hono ^bfāmilí; pea ʻe fakahaofi ʻa e hako ʻo e ngaahi foha kotoa ʻo Noá ʻi ha fakamoʻui fakamāmani;

43 Ko ia naʻe mamata ʻa ʻĪnoke ʻoku foʻu ʻe Noa ha ^aʻaʻake; pea naʻe malimali ki ai ʻa e ʻEikí, ʻo puke ia ʻi hono toʻukupu ʻoʻoná; ka naʻe tō mai ʻa e ngaahi lōmaki ki he toenga ʻo e kau fai angahalá ʻo folo hake ʻa kinautolu.

44 Pea ʻi he mamata ʻa ʻĪnoke ki he meʻa ní, naʻe mamahi ʻa hono laumālié, peá ne tangi koeʻuhi ko hono kāingá, ʻo ne pehē ki he ngaahi langí: ʻE ^aʻikai te u tuku ke fakafiemālieʻi au; ka naʻe folofola ʻa e ʻEikí ʻo pehē ange kia ʻĪnoke: Hanga hake ho lotó, peá ke fiefia, ʻo mamata.

45 Pea naʻe hoko ʻo pehē naʻe vakai atu ʻa ʻĪnoke; peá ne vakai ki he tupu meia Noa ʻa e ngaahi fāmili kotoa pē ʻo e māmaní; peá ne tangi ki he ʻEikí, ʻo pehē: ʻE hoko ʻa fē ʻa e ʻaho ʻo e ʻEikí? ʻE lilingi ʻa fē ʻa e taʻataʻa ʻo e Tokotaha Māʻoniʻoní, koeʻuhi ke lava ʻo ^afakamāʻoniʻoniʻi ʻa kinautolu kotoa pē ʻoku tangí pea nau maʻu ʻa e moʻui taʻengatá?

46 Pea folofola ʻa e ʻEikí: ʻE hoko ia ʻi he ^avaeuaʻangamālie ʻo taimí, ʻi he ngaahi ʻaho ʻo e fai angahala mo e tautea.

47 Pea vakai, naʻe mamata ʻa ʻĪnoke ki he ʻaho ʻo e ʻaloʻi mai ʻo e Foha ʻo e Tangatá, ʻio ʻi he kakanó; pea naʻe fiefia ʻa hono laumālié, ʻo ne pehē: Kuo hiki hake ʻa e Tokotaha Māʻoniʻoní, pea kuo tāmateʻi ʻa e ^aLamí talu mei hono ʻai ʻa e tuʻunga ʻo e māmaní; pea ʻoku ou ʻi he fatafata ʻo e Tamaí tuʻunga ʻi he tuí, pea vakai, ʻoku ʻiate au ʻa ^bSaione.

48 Pea naʻe hoko ʻo pehē naʻe mamata ʻa ʻĪnoke ki he ^amāmaní; pea naʻá ne fanongo ki ha leʻo mei he loto fonuá, ʻoku pehē: Ko e malaʻia, ko e malaʻia ka ko au, ko e faʻē ʻa e faʻahinga ʻo e tangatá; ʻoku ou mamahiʻia, ʻoku ou vaivai koeʻuhi ko e fai angahala ʻa ʻeku fānaú. Te u ^bmālōlō ʻafē, pea fakamaʻa au mei he ^cʻuli ʻa ia kuo ʻalu atu ʻiate aú? ʻE fakamāʻoniʻoniʻi nai au ʻe hoku Tupuʻangá ʻafē, koeʻuhí ke u mālōlō, pea nofo ʻa e māʻoniʻoní ʻi hoku fungá ʻi ha kuonga?

49 Pea ʻi he fanongo ʻa ʻĪnoke ki he tangi ʻa e māmaní, naʻá ne tangi, ʻo ne kaila ki he ʻEikí, ʻo pehē: ʻE ʻEiki, ʻe ʻikai koā te ke ʻaloʻofa ki he māmaní? ʻE ʻikai koā te ke tāpuakiʻi ʻa e fānau ʻa Noá?

50 Pea naʻe hoko ʻo pehē naʻe fai atu ʻe ʻĪnoke ʻa ʻene tangí ki he ʻEikí, ʻo pehē: ʻOku ou kole kiate koe, ʻe ʻEiki, ʻi he huafa ʻo ho ʻAlo pē Taha naʻe Fakatupú, ʻio ko Sīsū Kalaisí, ke ke ʻaloʻofa kia Noa mo hono hakó, koeʻuhí ke ʻoua naʻa toe ʻufiʻufi ʻa e māmaní ʻe he ngaahi lōmakí.

51 Pea naʻe ʻikai lava ke fakafisi ʻe he ʻEikí; pea naʻá ne fuakava mo ʻĪnoke, mo fakapapau kiate ia ʻaki ʻa e fuakava, te ne taʻofi ʻa e ngaahi ^alōmakí; pea te ne ui atu ki he fānau ʻa Noá;

52 Pea naʻá ne ʻoatu ha tuʻutuʻuni taʻe-faʻa-liliu, ke ʻiloa maʻu ai pē ha ^atoenga ʻo hono hakó ʻi he ngaahi puleʻanga kotoa pē, lolotonga ʻoku kei tuʻu ʻa e māmaní;

53 Pea folofola ʻa e ʻEikí: ʻOku monūʻia ia ʻa ia ʻe tupu ʻi hono hakó ʻa e Mīsaiá; he ʻokú ne folofola—Ko au ʻa e ^aMīsaiá, ko e ^bTuʻi ʻo Saioné, ko e ^cMaka ʻo e Langí, ʻa ia ʻoku fālahi ʻo hangē ko e taʻengatá; ko ia ia ʻe hū mai ʻi he matapaá ʻo ^dkaka hake ʻiate aú ʻe ʻikai te ne hinga; ko ia, ʻoku monūʻia ʻa kinautolu kuó u lau ki aí, he te nau ʻalu atu mo e ngaahi ^ehiva ʻo e fiefia taʻengata.

54 Pea naʻe hoko ʻo pehē naʻe tangi ʻa ʻĪnoke ki he ʻEikí, ʻo pehē: ʻO ka hāʻele mai ʻa e Foha ʻo e Tangatá ʻi he kakanó, ʻe mālōlō koā ʻa e māmaní? ʻOku ou kole kiate koe, ke ke fakahā ʻa e ngaahi meʻá ni kiate au.

55 Pea naʻe folofola ʻa e ʻEikí kia ʻĪnoke: Vakai, peá ne sio atu ʻo vakai ki he ^aFoha ʻo e Tangatá kuo hiki hake ʻi he ^bkolosí ʻi he founga ʻa e tangatá;

56 Pea naʻá ne fanongo ki ha leʻo-lahi; pea naʻe fakapūlou ʻa e ngaahi langí; pea naʻe tangi ʻa e ngaahi fakatupu kotoa pē ʻa e ʻOtuá; pea naʻe ^atoʻe ʻa e māmaní; pea naʻe mafahifahi ʻa e ngaahi maká; pea naʻe ^btuʻu hake ʻa e kau māʻoniʻoní, pea naʻe ^cfakakalauni ʻa kinautolu ʻi he ^dtoʻukupu toʻomataʻu ʻo e Foha ʻo e Tangatá, ʻaki ʻa e ngaahi kalauni ʻo e nāunau;

57 Pea ko e ngaahi ^alaumālie kotoa pē naʻe ʻi he ^bfale fakapōpulá naʻa nau ō mai, ʻo tuʻu ʻi he toʻukupu toʻomataʻu ʻo e ʻOtuá; pea naʻe tauhi ʻa hono toé ʻi he ngaahi sēini ʻo e fakapoʻuli kae ʻoua ke hoko mai ʻa e fakamaau ʻo e fuʻu ʻaho lahí.

58 Pea naʻe toe tangi ʻa ʻĪnoke ʻo kaila ki he ʻEikí, ʻo pehē: ʻE mālōlō ʻafē ʻa e māmaní?

59 Pea naʻe vakai ʻa ʻĪnoke ki he hāʻele hake ʻa e Foha ʻo e Tangatá ki he Tamaí; pea naʻá ne ui ki he ʻEikí, ʻo pehē: Te ke toe hāʻele mai koā ki he māmaní? Koeʻuhi ko e ʻOtuá koe, peá u ʻilo koe, pea kuó ke fuakava kiate au, mo fekau kiate au ke u kole ʻi he huafa ʻo ho ʻAlo pē Taha naʻe Fakatupú; kuó ke ngaohi au, mo foaki kiate au ha totonu ki ho taloní, ʻo ʻikai koeʻuhí ko au pē, kae tuʻunga pē ʻi hoʻo ʻaloʻofa ʻaʻaú; ko ia, ʻoku ou fehuʻi kiate koe pe te ke toe hāʻele mai koā ki he māmaní.

60 Pea naʻe folofola ʻa e ʻEikí kia ʻĪnoke, ʻo pehē: Hangē ʻoku ou moʻuí, ʻe pehē pē ʻeku haʻu ʻi he ngaahi ʻaho ^afakaʻosí, ʻi he ngaahi ʻaho ʻo e fai angahalá mo e tauteá, ke fakahoko ʻa e fuakava ʻa ia kuó u fai kiate koe ʻo kau ki he fānau ʻa Noá;

61 Pea ʻe hokosia ʻa e ʻaho ʻe ^amālōlō ai ʻa e māmaní, ka ʻe fakapoʻuli ʻa e ngaahi langí ʻi he teʻeki ai ke hoko ʻa e ʻaho ko iá, pea ʻe ^bʻufiʻufi ʻa e māmaní ʻe ha ^cpūlou ʻo e fakapoʻuli; pea ʻe ngalulululu ʻa e ngaahi langí, pea mo e māmaní foki; pea ʻe ʻi he lotolotonga ʻo e fānau ʻa e tangatá ʻa e ngaahi fuʻu faingataʻa lalahi, ka te u ^dmaluʻi ʻa hoku kakaí;

62 Pea te u fekau hifo ʻa e ^amāʻoniʻoní mei he langí; pea te u ʻohake ʻa e ^bmoʻoni mei he ^ckelekelé, ke ^dfakamoʻoniʻi ʻa hoku ʻAlo pē Taha naʻe Fakatupú; ʻa ʻene ^etoetuʻu mei he pekiá; ʻio, pea mo e toetuʻu foki ʻa e kakai kotoa pē; pea te u ʻai ke tafiʻi ʻa māmani ʻe he māʻoniʻoní mo e moʻoní ʻo hangē ka fai ia ʻaki ʻa e lōmakí, ke ^ftānaki fakataha mai ʻa hoku kakai filí mei he ngaahi vahe ʻe fā ʻo e māmaní, ki ha potu ʻa ia te u teuteu, ko ha Kolo Māʻoniʻoni, koeʻuhí ke nonoʻo ʻe hoku kakaí ʻa honau konga lotó, pea ʻamanaki atu ki he taimi ʻo ʻeku haʻú; koeʻuhí ʻe ʻi ai ʻa hoku nofoʻangá, pea ʻe ui ia ko Saione, ko ha ^gSelūsalema Foʻou.

63 Pea folofola ʻa e ʻEikí kia ʻĪnoke: Te ke toki fetaulaki ai mo ho ^akoló kotoa mo kinautolu ʻi ai, pea te tau tali ʻa kinautolu ki hotau fatafatá, pea te nau mamata kiate kitautolu; pea te tau fāʻufua kiate kinautolu, pea te nau fāʻufua kiate kitautolu, pea te tau fekitengaki ʻi he ʻuma;

64 Pea ʻe ʻi ai ʻa hoku nofoʻangá, pea ko Saione ia ʻa ia ʻe ʻalu atu mei he ngaahi meʻa kotoa pē kuó u fakatupú; pea ʻe ^amālōlō ʻa e māmaní ʻo feʻunga mo ha taʻu ʻe ^btaha afe.

65 Pea naʻe hoko ʻo pehē, naʻe mamata ʻa ʻĪnoke ki he ʻaho ʻo e ^ahāʻele mai ʻa e Foha ʻo e Tangatá ʻi he ngaahi ʻaho fakaʻosí ke ʻafio ʻi māmani ʻi he māʻoniʻoni ʻo feʻunga mo e ngaahi taʻu ʻe afe;

66 Ka ʻi he teʻeki ai ke hokosia ʻa e ʻaho ko iá, naʻá ne mamata ki he ngaahi fuʻu faingataʻa lalahi ʻi he lotolotonga ʻo e kau fai angahalá; pea naʻá ne mamata foki ki he tahí, ʻoku hou ia, pea ʻoku ^avaivai ʻa e loto ʻo e kakaí, ʻo nau nofo ʻamanaki atu ʻi he ilifia ki he ngaahi ^btautea ʻa e ʻOtua Māfimafí, ʻa ia ʻe hoko mai ki he kau fai angahalá.

67 Pea naʻe fakahā ʻe he ʻEikí kia ʻĪnoke ʻa e ngaahi meʻa kotoa pē, ʻio ʻo aʻu ki he ngataʻanga ʻo e māmaní; pea naʻá ne mamata ki he ʻaho ʻo e kau māʻoniʻoní, ʻa e houa ʻo honau huhuʻí; ʻo ne maʻu ʻa e kakato ʻo e ^afiefiá;

68 Pea ko hono kotoa ʻo e ngaahi ʻaho ʻo ^aSaioné ʻi he ngaahi ʻaho ʻo ʻĪnoké, koe taʻu ʻe tolungeau onongofulu mā nima.

69 Pea naʻe ^aʻaʻeva ʻa ʻĪnoke mo hono kakaí kotoa pē mo e ʻOtuá, pea naʻá ne ʻafio ʻi he lotolotonga ʻo Saioné; pea naʻe hoko ʻo pehē, naʻe ʻikai ke ʻi ai ʻa Saione, he naʻe maʻu hake ia ʻe he ʻOtuá ki hono fatafata ʻoʻoná; pea naʻe mafola atu mei ai ʻa e lea ʻo pehē, kuo hola ʻa Saione.