O Se Lisi e Siaki ai Mea e Fai a le Faiaoga

O’u uso e ma tuafafine pele, a’u uo pele, oka se matagofie o lenei taimi ua faatasi ai ma matamata i lenei ata maoae ofoofogia ma matagofie ua faaali mai ai ia i tatou le auala e mafai ai e tagata o le Ekalesia ma tagata o le lalolagi ona aoao atu i vaitausaga uma, tupulaga uma i le ala a le Faaola.

Ia, a’u uo pele, ou te faafetai tele i le faatasi ai ma a’u tagata e sili ona ou fiafia i ai: o faiaoga—tuanai, taimi nei, ma le lumanai! Talu ai o faiaoga uma e eseese i lea itu ma lea itu, e tatau ona ou manatu o la’u vaega o tagata e sili ona ou fiafia i ai ua matua aofia uma iinei. Ou te alofa i faiaoga. Ou te fiafia e faatasi ma i latou. Ou te alofa ma ua tele atu mea ua ou nofoaitalafu ai nai lo mea e mafai ona ou toe totogia i faiaoga i lo’u olaga.

Sa suesueina e le au sikola mo le fia selau tausaga po o a mea e fauina se faiaoga sili ona lelei ma ua matua fautuaina mai, faalauliloa, ma faasalalau mai a latou teori i mea e faatupuina se aafiaga faamanuiaina faaleaoaoga.

Ua faamanuiaina i tatou uma e aoao mai i le faiaoga silisili o le olaga atoa, o Iesu Keriso. I le gasologa o le vaega lelei atu o le lua afe tausaga ua tuanai, ou te le manatu na i ai se sekone se tasi na alu—i se mea i le lalolagi—i se taimi ua le faatauaina ai Ana aoaoga, suesueina, mafaufau loloto i ai, toe talanoaina, ma faataitaiina.

Ma e le o le sini ea lena a faiaoga uma? Ia faia se eseesega tumau mo le lelei? Ia faamanuia olaga o isi i se ala ua matua sili mamao atu ma se lesona po o se potuaoga?

Ma ua i ai ia Iesu o Nasareta lena ituaiga o tosinaga—i le tuanai, i le taimi nei, ma i le lumanai. O ai la e sili atu ona tatou suesueina? Afai tatou te aoao mai ia te Ia, o le a faaleleia i tatou e le gata o ni faiaoga, e tusa lava po o a o tatou tulaga i le olaga, ae o le a matua faaleleia tele foi i tatou o ni tagata soifua.

O lea la, o lo’u avanoa ma le faamamaluga lenei e lauga atu ai ia te outou i le asō e uiga i le Faaola—ona o le ala silisili e avea ai ma se faiaoga lelei atu o le avea lea ma se soo lelei atu o Iesu Keriso.

A o avea a’u ma se pailate o se vaalele la’u pasese, o taimi uma ou te nofo ifo ai i le nofoa o le kapeteni, e tasi lava la’u sini tele—o le avatu o a’u, la’u vaega, ma la’u pasese i le saogalemu i le matou nofoaga e taunuu i ai. O lenei faamoemoega e manaomia ai le taulaiga ma le mataala.

Ina ia faatumauina lenei taulaiga, e faatino e pailate se faasologa o siaki ae le’i alu ese le vaalele, tauloto faiga faavae o le saogalemu ma le vaaia o loo ola ia mea uma ma le faatuatuaina o masini faaeletonika. O mea taitasi i luga o le lisi o mea e siaki o se mea ua faia faaselau e le pailate (a leai ua faafiaafe) ona fai.

O se pailate atamai na te lē tāitāi manatu ona e talu ai ua faafiaselau ona ia aveina vaalele, e leai la se mea e toe siaki ai fua mea ia ae le’i alu le vaalele pe tau na ona tepa i ai faasamasamanoa.

O siaki e fai ae le’i aluese le vaalele e aoai ai lava pailate ia faatumauina lo latou taulaiga i mea taua ia e maua ai se faigamalaga manuia.

E pei lava ona i ai i se pailate se faamoemoega patino o le taitaiga, e faapena foi tatou o faiaoga o le Upu: ia aumai agaga ia latalata atili ia Keriso. Soo se taimi lava tatou te taulimaina ai se avanoa faafaiaoga, o lena sini e tatau ona avea ma faamuamua i o tatou mafaufau.

I le avea ai ma faiaoga, o i ai se tatou lisi e siaki ai mea e fai e fesoasoani ai ia i tatou e taulai atu ai i la tatou sini paia? Ioe!

O le masina lenei o le a faasalalau ai e Le Ekalesia a Iesu Keriso o le Au Paia o Aso e Gata Ai se lomiga toefaafouina o le Aoao Atu i le Ala a le Faaola. O se taiala mo tagata uma latou te aoao atua le talalelei—i totonu o le aiga ma i le lotu. O le a maua i gagana e 70 i le polokalama o le Gospel Library. O kopi lolomi o le a mulimuli mai i ni masina e sosoo ai.

O lenei punaoa o loo taulai atu i le soifuaga ma aoaoga a Iesu Keriso e avea ma a tatou taiala ma musumusuga o ni faiaoga. E fesoasoani ia i tatou e taulai tonu i le aoao atu i le ala na Ia aoao ai.

O le “Aoao Atu i le Ala a le Faaola” o le a fesoasoani i tagata uma o loo faiaoga. E mafai ona maua atu ai musumusuga ma faatonuga mo matua, tuaoi, uso ma tuafafine o auaunaga, faifeautalai, ma soo uma o Iesu Keriso. O le avea ma soo o lona uiga o le alofa, tausi, faamanuia, ma siitia isi, ma o lona uiga o le aoao atu.

I se isi faaupuga, afai o loo e taumafai e alofa atu ma auauna atu e pei ona faia e Iesu, o lona uiga la o oe o se faiaoga, ma o le Aoao Atu i le Ala a le Faaola e mo oe ma a’u. Ou te faamoemoe o le a avea ma se oa ia te oe, pe e te fou i lenei malaga pe ua autausagā o e faia.

I le vaega 3 o le Aoao Atu i le Ala a le Faaola, o loo i ai se iloiloga faaletagata lava ia—o se lisi e siaki ai mea mo se vaalele, pe a e finagalo ai—e mafai ona fesoasoani ia i tatou ia taulai atili atu i a tatou taumafaiga faafaiaoga. O le a taitai atu ai i mafaufauga loloto, faaalia o vaega e le o malamalama ai, ma uunaia musumusuga e uiga i ala e mafai ona tatou faaleleia. E mafai ona aoga mo faiaoga e pei ona aoga foi le lisi e siaki ai mea e fai mo pailate.

Afai e te faatagaina au ou te nofo i ou talaane i le ave o le vaalele, ou te fia faatinoa ma oe se siaki ae lei alu le malaga mo le aoao atu. Ou te valaaulia oe ia toso mai i fafo se laupapa faataitai ma mafaufau pe faapefea ona e iloiloina oe lava ia i vaega taitasi. O lenei iloiloga faaletagata lava ia e mafai ona avea ma se faamanuiaga maoae—i le asō ma taimi uma tatou te saunia ai e aoao atu i le ala a le Faaola.

O le mea muamua i luga o le tatou lisi e siaki ai mea ae lei alu le malaga o le “Taulai ia Iesu Keriso.” O se avanoa e manatunatu loloto ai pe o i ai moni le Faaola i le totonugalemu o a tatou aoaoga. Faamolemole mafaufau i fesili nei:

• Pe o o’u aoao atu ea e uiga ia Iesu Keriso e tusa lava po o a mea o loo ou aoao atua?

• Pe o o’u faamamafa atu ea le faataitaiga a Iesu Keriso?.

• Pe o o’u fesoasoani ea i tagata aoao ia iloa le alofa, mana, ma le alofa mutimutivale o le Alii i o latou olaga?

• Pe o o’u fesoasoani ea i tagata aoao ia tauivi ma le loto i ai ia avea atili e faapei o Iesu Keriso?

O fesili loloto fesili nei!

Tatou talanoa i le faamaoni: Ua matua lautele le talalelei lea e te ono faaaluina le olaga atoa e suesue ai ae e nao ni nai vaega taua e iloa. Vaai faalemafaufau o loo valiina se laupapa petipeti e maualuga ma lautele e pei o se itu o se fale laupapa telē naua lea e faatusa i le telē o le talalelei.

E tofu i tatou ma mea e sili ona fiafia e fai i le talalelei—mea ia tatou te naunau i ai. Vaitau o le talafaasolopito, polokalama a le Ekalesia, autu o aoaoga faavae, pe oo lava i ni fuaiupu taitasi o mau. Atonu foi e faaosoosoina i tatou e tau na ona taulai atu i nei autu tatou te fiafia i ai.

Ae i le telē naua e pei o le taulaiga o le aoaoina atu o le talalelei, o le mata tonu—le totonugalemu o le taulaiga—e le tatau ona galo ona tatou taulai i ai—e laitiiti lava. Ma o le totonugalemu lea e lei tuuina maia ia i tatou i ni faamatalaga, e lei tuuina maia i ni manatu faapalota, po o ni felafolafoaiga faafinauga. Na tuuina mai e le Faaola lava Ia ia i tatou.

O le a la?

Alofa i le Atua ma alofa i isi.

O le totonugalemu lena.

O isi mea atonu tatou te fiafia i ai. Atonu foi e taua. Ae e le o mea na o le totonugalemu.

O mea na o vaega lagolago. O mea na o meaai faaopoopo i le tatou lisi autu; atonu o le salati i le meaai autu. Latou te faaopoopo i ai mea feū po o isi filifiliga, masalo ma le tele lava o vaitamini, ae e le o meaai autu na.

O le a la le tatou sini i le aoao atu?

O le tatou sini o le fesoasoani lea ia i latou tatou te aoaoina ina ia latalata atili ia Keriso, ia faateleina lo latou iloa ma le alofa i le Atua, ma auauna atu i le Atua e ala i le aapa atu i le agaalofa i Ana fanau uma.

O le totonugalemu lena.

O fea tatou te maua ai le faataitaiga silisili o le alofa i le Atua ma isi?

[E maua] i le soifuaga ma aoaoga a lo tatou Faaola ma le Togiola.

A tatou aumaia agaga ia latalata atili ia Keriso, ua tatou fesoasoani ia i latou e faatupulaia lo latou faatuatua ma le alofa i le Atua. Ma ua tatou fesoasoani ia i latou ia faateleina lo latou agaalofa ma le alofa mo isi.

Soo se taimi lava e faaosoosoina ai i tatou e see ese [ma le lesona] ma faalavefauina e nisi o autu e foliga mai ua tatou naunau i ai, e tatau ona tatou fesili ifo ia i tatou lava ia:

“Pe o o’u taulai atu ea ia Iesu Keriso, e tusa lava po o a mea o loo ou aoao atua?”

“Pe o mea o loo ou aoaoina atu o loo fesoasoani i isi ia tuputupu ae i lo latou alofa mo le Atua ma faaali atu lena alofa e ala i le alofa ma le auauna atu, ma e ala i le faaaogaina o aoaoga a le Faaola i o tatou olaga?”

I le avea ai ma faiaoga, atonu e mafai ona tatou tautatala i gagana a agelu; atonu tatou te fai mea malie, faafiafia, faaofo, ma faamaofa? Ae afai e le mafai ona tatou faatumauina lo tatou taulaiga ia Iesu Keriso, ua tatou misia la le faailoga¹ ma o a tatou aoaoga ua na o se atalafoia o mea e tatau ona aoao atu.

Ia faatumauina i taimi uma le taulaiga i lo tatou Faaola ma le Togiola, o Iesu Keriso.

O le vaega lona lua o le lisi e siaki ai mea o le “Alofa Ia i Latou E Te Aoaoina” O le vaega o le lisi e siaki ai mea ia e faatagaina ai i tatou ia manatunatu i o tatou naunautaiga o ni faiaoga, ma e faamanatu mai ai ia i tatou ia faatumauina le taulaiga o o tatou loto i le alofa ma le faatauaina o i latou tatou te aoaoina. O nisi nei o fesili e mafaufau i ai:

• Pe o ou tauivi ea e vaai atu i tagata aoao i le ala e silasila atu i ai le Faaola ia i latou?

• Pe o ou saili ia iloa i latou ou te aoaoina—ia malamalama i o latou tulaga, manaoga, ma malosiaga?

• Pe o ou tatalo mo tagata aoao i o latou igoa?

• Pe o ou fatuina se siosiomaga saogalemu lea e faaaloalogia ai tagata uma ma iloa e faatauaina a latou saofaga?

• Pe o ou maua ni auala talafeagai e faailoa atu ai lo‘u alofa?

Sa ou faalogo i se tasi tamaitai o se faiaoga atamai i se aoga maualuga. Sa ia faaaluina le tele o tausaga e atiae ai ana auala e aoao atu ai ma saofagā iloga i soifuaga o tamaiti aoga o le aoga maualuga. Sa ia silafia le auala e taulima atoatoa ai lenei vaitausaga.

I le tasi tausaga, sa ia auai ai i se polokalama a le aoga i le taumafanafana lea sa ia aoao ai le toatele o tamaiti aoga laiti ifo, na matua ese ia tamaiti, e oo lava i tamaiti lima-tausaga-le-matutua. Ioe, sa fiafia tamaiti ma tumu i le tiotio a o latou fetaomi atu i totonu o lana potuaoga. Sa latou matua pisapisao ma talie, feei, taufetuli solo i va o kesi, ma tuli solo e le tasi le isi. O si faiaoga lea, ina ia faafilemu le vasega, sa ia faaaoga lona “leo faafaiaoga” sa ia iloa na aogā i tamaiti o le aoga maualuga ina ia latou filemu ma nonofo ai i lalo. Ae o le a le mea na tupu?

Na faafuasei ona filemu le potuaoga. Sa vave ona tuu e tamaiti mea na latou faia ma le tetei, sa faananati atu i se kesi o avanoa. Ae sei vagana ai le toalua.

O le tamaitiiti muamua, o se teineitiiti, sa meia ma faapalasi i le fola ma amata ona tagi. E ui sa lei lagonaina e le faiaoga sina ita ia te ia, ae sa lagona e le teineitiiti pei lava na ia faia se mea leaga tele ma faamimigi ai lava ma tagi lotulotu ai.

O le tamaitiiti lona lua, o se tamaitiiti laitiiti, sa pulatoa mai i le faiaoga ma le fefe ma masau atu i le faitotoa lea na nimo atu ai i lalo i le alasavali ma le saoasaoa. Sa mafaufau le faiaoga pe mata o le a toe foi ane o ia.

I lena aso, sa aoao ai e le faiaoga se lesona taua: o metotia sa ia faaaogaina i le autalavou sa lei aoga lelei i tamaiti laiti tele.

Ma o se lesona foi lena mo i tatou, mo oe ma au.

O tagata taitoatasi tatou te aoaoina o se atalii ma se afafine o le Atua ma e i ai sona uiga faaletagata.

Pe o tatou vaai atu ia i latou i le ala e silasila mai i ai lo tatou Tama Faalelagi—o ni tagata tulagaese faatasi ma o latou lava mafaufauga, lagona, tofotofoga, ma tauiviga? Pe o tatou fatuina se siosiomaga saogalemu faaleaoaoga—o se nofoaga e mafai e tagata taitoatasi ona lagonaina le malupuipuia ma le taliaina?

Po o le a lava le tatou gagana, pe o iloa e a tatou tamaiti aoga tatou te tautatala i le gagana āoāo o le alofa? Tatou te faatauaina i latou, i ai lo tatou agaalofa mo i latou, ma tatou te faaaloalo ia i latou?

Na faaalu e le Faaola le tele o Lona soifuaga ma tagata na teenaina ma agaleagaina e tagata o le nuu.

Sa mafai lava ona Ia aoaiina ma tausalaina i latou. Ae, sa Ia taliaina, faamalolo, ma faamafanafana i latou.

Ioe, sa Ia aoao i latou ia “[O] ma aua ne’i toe agasala.”² Ae i ē mamai, o ē agasala, ma ē na le atoatoa le malosi, sa Ia fetalai atu ma faatino ona o le alofa, agaalofa, ma le faaaloalo.

E silasila mai o Ia ia i tatou taitoatasi o ni atalii ma ni afafine o le Atua Silisiliese—e le i lalo ifo o Ia, ae faatasi ma le gafatia e faavavau e savavali i Ona autafa i le mamalu.

Sa taua e le tusitala maoae o le FaaKerisiano o C.S. Lewis lenei manatu ina ua ia aoao mai, “O se mea taua le ola ai i se sosaiete ua mafai ona avea ma ni atua ma atua fafine, ia manatua o le tagata sili ona le taua e te talanoa i ai atonu e i ai se aso o le a avea ma se tagata, lea ana e vaai i ai i le taimi nei, o le a faaosoosoina oe e tapuai malosi i ai.” Ma sa ia faaauau, “E leai ni tagata masani. E te lei talanoa lava i se tagata soifua. … o tagata ola pea ia tatou te tausua faatasi, galulue faatasi, faaipoipo i ai, le amanaia, ma faaaoga — tagata ola pea … i le olaga lenei.”³

A tatou taulima isi i lenei ituaiga o faaaloalo, ua tatou faasusulu atu le faataitaiga a Iesu Keriso. E pei ona Ia alofa mai, tatou alolofa faapena. E pei ona Ia siitia, tatou siitia faapena. E pei ona Ia aoao mai, tatou aoao atu faapena.

Ia tatou manatua ia alolofa atu, faaaloalo, ma siitia i latou tatou te aoaoina.

O le vaega lona tolu o le lisi e siaki ai mea o le “Aoao Atu i le Agaga.” Faamolemole mafaufau i fesili nei:

• Pe o ou saunia a‘u lava faaleagaga e aoao atu?

• Pe o ou tali atu i uunaiga faaleagaga e uiga i manaoga o tagata aoao?

• Pe o ou fatuina ni faatulagaga ma ni avanoa mo tagata aoao ina ia aoaoina e le Agaga Paia?

• Pe o ou fesoasoani i tagata aoao e saili, iloa, ma faatino faaaliga faaletagata lava ia?

• Pe o ou molimau soo atu ma uunaia tagata aoao ia faia lea lava mea e tasi?

Ou te taumafai lava e faamanatu soo ia te a’u lava e faapea i a’u taumafaiga uma lava e aoao atu le talalelei ma aumai tagata ia Iesu Keriso, e le mafai ona ou liuaina se tasi.

E na o le Agaga Paia e mafai ona faia lena mea.

E mafai ona tatou tautatala i upu, ae o le liuaina o se mataupu a le Agaga. E tupu pe a pa’i atu le Agaga Paia i le loto ma tali mai se tagata i Ana faatosinaga e ala i le mulimuli i le Faaola.

Ona o ni upu faatauanau po o ni finauga susua, afai e “faatalitonuina” ai se tasi e mulimuli ia Iesu Keriso, o lena talitonuga atonu e lē tumau e pei o le fatu e pa’ū i luga o nofoaga papa.⁴

O le tatou galuega e le o le liuaina. E le o se tatou tiutetauave lena.

Ae o le a la le tatou galuega? O le aoao atu lea o le tala fiafia a Iesu Keriso ma Lana talalelei ua toefuataiina i o tatou taimi! Ma o le tatou galuega o le faamautu ma lagolago a tatou upu i a tatou galuega faamaoni ma le amiotonu! O tatou olaga, le auala tatou te ola ma amio ai.

Pe tali mai se tagata pe leai i mea tatou te aoao atu i ai o le va lena o i latou ma le Atua. Ae mafai ona avea i tatou ma ala laupapa e faafesootaia i latou ma le Agaga Paia. E mafai ona avea i tatou ma faamalama e ulufale atu ai le Agaga Paia i o latou olaga. E mafai e a tatou upu ma a tatou amioga ona aoao atu le mataupu faavae a Keriso i se ala e fesoasoani ai i tamaiti aoga ia lagonaina le faatosinaga a le Agaga Paia.

E pei ona aoao mai Elder Dallin H. Oaks i se tasi taimi, “O le suesue ma mafaufau e mafai ona maua ai le upumoni, … ae ua na o faaaliga e mafai ona faamautu ai.”⁵

Se’i o’u toe ta’ua lena fuaiupu: “O le suesue ma mafaufau e mafai ona maua ai le upumoni, … ae ua na o faaaliga e mafai ona faamautu ai.”

E i ai taimi e pei ai o tatou moesavali i le olaga. Tatou te vaai atu i mea ae ua tau le manatuaina. O faasalalauga faapisinisi, upusii a le Pinterest, e oo i faailo auala. O le tele o na mea ua na ona pisia ai o o tatou mafaufau e aunoa ma le ulufiaina o o tatou loto.

Ae afai e fetalai atu le Agaga Paia i lou agaga, i lo’u agaga, oe ma a’u, e le mafai la ona galo ia i tatou, ona e suia ai oe; e suia ai tatou. Manatua tama a Iosefa Samita ina ua uma ona faitau i le Iakopo 1:5: “E leai se isi lava mau mai tusitusiga paia na matua ootia ai se loto o se tagata i le mana malosi nai lo le ootia o lo’u loto i lea lava taimi.”⁶

E mafai e le Agaga ona ave se mafaufauga masani na tautalaina i se ala masani ma faia ia mu e pei o se afi.

O le liuaina o se isi tagata e le faalagolago i le lelei o a tatou upu po o lo tatou atamamai i tusitusiga paia. E le faalagolago i le lelei o lo tatou aoao atu po o le puipuiina o aoaoga faavae. E le faalagolago i lo tatou atamai, uiga, po o se atamai i le gagana.

Pau le mea tatou te galulue i ai o le iloaina lea mo i tatou lava ia. Ona valaaulia lea e lo tatou Tama Faalelagi i tatou “Ia tatala atu [o tatou] gutu i taimi uma, e alaga atu [Lana] talalelei ma le leo o le olioli.”⁷ Ma afai tatou te faia lena mea, o le a molimau mai le Agaga Paia e uiga i le upumoni.

E le tau avea i tatou ma se mea e sili atu pe itiiti ifo i lo tagata e i ai i tatou, ma o fanau a le Atua ma soo o Iesu Keriso.

Faatasi ai ma le olioli, e mafai ona outou faailoa atu lo outou alofa mo le Faaola, Lana talalelei, ma Lana Ekalesia?

Afai tatou te faia la tatou vaega, o le a fai e le Agaga Lana vaega. O le auala lena tatou te “a’oa’o atu ai i le Agaga.”

O le mea lona fa i le tatou lisi o mea e siaki muamua o le “Aoao Atu le Mataupu Faavae”—ioe, e le o soo se mataupu faavae, ae o le mataupu faavae na maua e Iesu Keriso mai i Lona Tama. Sa fetalai mai le Faaola: “O la’u mataupu, e le o sa’u lava, a o lana na auina mai a’u.”⁸ Ina ia iloilo pe o le a le lelei o loo e mulimulitaia ai Lana faataitaiga, mafaufau i fesili nei:

• Pe o ou aoaoina le mataupu faavae mo au lava ia?

• Pe o ou aoao atu mai tusitusiga paia ma upu a perofeta o aso e gata ai?

• Pe o ou fesoasoani i tagata aoao e iloa ma malamalama i upumoni i tusitusiga paia?

• Pe o ou taulai atu i upumoni e fausia ai le faatuatua ia Iesu Keriso?

• Pe o ou fesoasoani i tagata aoao ia maua le faaaliga faaletagata lava ia i le aoaoga faavae?

I la tatou tisipenisione sa fetalai mai ai le Alii: “Ou te tuu atu ia te outou se poloaiga ia outou aoao i le tasi [ma le isi] mataupu faavae o le malo. Ia outou aoao atu ma le filiga ma o le a i ai lou alofa tunoa ia te outou.”⁹

O le a le mataupu faavae e ao ona tatou aoao atu?

O le afioga e sau mai tusitusiga paia ma fofoga o aposetolo ma perofeta. O i latou ia ua i ai le aia tatau ma le pule e faamalamalama ma faamanino ai mataupu faavae. Ma ua auala mai ia i latou e folafola mai ai e le aunoa e le Atua Lana afioga, e aumai ai le taitaiga ma le malamalama i Ana fanau.

O le mataupu faavae faaola ma tutotonu o Le Ekalesia a Iesu Keriso o le Au Paia o Aso e Gata Ai e faapea, o Iesu Keriso o le Faaola ma le Togiola o tagata uma. O le Aposetolo o Paulo, sa vaai ma talanoa ma le Faaola toetu, sa tusi atu i tagata Korinito, “Ou te faailoa atu ia te outou le tala lelei na ou folafolaina atu ia te outou … na maliu [Iesu le] Keriso ma sui o a tatou agasala … na tanu foi o ia, ma toe tu mai i le aso tolu … na iloa foi o ia e Kefa, ona iloa lea e le toasefulu ma le toalua.”¹⁰

Ua poloaiina i tatou ia “piimau i luga i le afioga a le Atua, lea ua vave ma mamana … ma taitai atu ai le tagata o Keriso i le ala lauitiiti ma vaapiapi … ma faatulaueleele o latou agaga, ioe, o latou agaga ola pea, i le aao taumatau o le Atua i le malo o le lagi.”¹¹

I le avea ai ma faiaoga, e le tatau ona tatou ma i le talalelei a Iesu Keriso.¹² Ae, e tatau ona tatou sii ae ma le olioli o tatou leo i le aoaoina atu o Lana mataupu faavae e tusa lava pe foliga mai o se maa tu’ia i nisi ae o se mea faavalevalea i isi.¹³ “Aua o le mana lava lea o le Atua e ola ai i latou uma o e faatuatua.”¹⁴

O le mea mulimuli i luga o le tatou lisi e siaki ai mea ae lei alu le malaga o le “Valaaulia le Aoaoina ma le Filiga.” O lenei mea o se faamanatu o le aoaoina ma le filiga tatou te faia ua na o le afa lea o le galuega e fai. O le isi afa—i le taufetuliga umi, masalo o le afa sili atu ona taua—o le aoaoina ma le filiga e fai e a tatou tamaiti aoga. O nisi nei o fesili e fesoasoani ia i tatou e iloilo ai pe o lo tatou aoao atu ma le filiga o loo taitai atu i le aoaoina mai ma le filiga:

• Pe o ou fesoasoani i tagata aoao e tauave le tiutetauave mo lo latou aoaoina?

• Pe o ou uunaia tagata aoao e suesue le talalelei i aso taitasi?

• Pe o ou uunaia tagata aoao e faasoa atu upumoni o loo latou aoaoina?

• Pe o ou valaauliaina tagata aoao e ola i mea ua latou aoaoina?

E manaomia e o tatou agaga le faafailelega tumau ina ia mafai ona avea i tatou ma tagata o le malamalama ma le mamalu na foafoaina i tatou e le Atua e avea ai. Pe a tatou suesue ma mafaufau loloto i upu a perofeta a le Atua, ua tatou inu i vai ola ma taumamafa i le afioga a Keriso.

E le lava le tau na ona faitau i na upu. E manaomia ona tatou usitai i ai; e manaomia ona tatou mafaufau loloto ma faapatinoina ia i tatou.¹⁵

Le toe faaupuina o se faataoto, “Aoao se tagata i le talalelei ona e faamanuiaina lea o ia mo se aso. Aoao se tagata e taumafa i le afioga a le Atua ma fesootai ma le Agaga Paia, ona e faamanuiaina lea o ia mo le olaga atoa.”

Ua auala mai i lenei faagasologa o musumusuga ma faaaliga faaletagata lava ia tatou te fausia ai o tatou olaga i luga o le papa o lo tatou Togiola.¹⁶ Ona mafai ai lea ona avea le talalelei a Iesu Keriso ma “se taula o le agaga.”¹⁷

O le aoao atu o le talalelei e taua. O le aoaoina o isi ia faatofu i latou lava i le tatalo, saili i le Agaga, ma faaaoga mea ua latou aoaoina, e tutusa le taua.

O’u uso e ma tuafafine, uo peleina, faiaoga pele ma le taua—ma outou uma o faiaoga; o tatou uma o faiaoga—faafetai atu mo lo outou faatuatua ma mo lo outou naunautaiga e fai mea lelei. Faafetai atu mo le tele o itula tou te faaaluina e sauniuni ai, auauna atu ai, ma aoao atu ma le olioli isi e uiga i le talalelei.

Ou te valaaulia outou ia suesue i le taiala fou Aoao Atu i le Ala a le Faaola ma faaaoga le iloiloga faaletagata lava ia e faamanatu atu ai ia te oe lou faamoemoega.

E ala i le piimau i le afioga a le Atua ma le aoaoina o isi ia faia lea lava mea e tasi—e ala i le aoao atu i le ala a le Faaola—tatou te faaali atu ai lo tatou alolofa mo le Atua ma mo o tatou uso a tagata. Ma pe a tatou savavali i le ala lauititii ma vaapiapi, ua tatou faia le vaega i lena valaauga sili ona paia o valaauga e taitai o tatou lava agaga ola pea ma agaga o isi e agai atu i le “aao taumatau o le Atua i le malo o le lagi, ia nonofo i lalo faatasi ma Aperaamo, ma Isaako, ma faatasi ma Iakopo, ma faatasi ma o tatou tamā paia uma, e le toe o atu i fafo.”¹⁸

Tau ina ia faamanuia outou e le Atua, ou tuafafine ma uso a faiaoga, au uo pele, ou uso a auauna, mo a outou galuega faamaoni e aoao atu i le suafa o le Faaola. I le suafa paia o le faiaoga silisili o le olaga atoa, i le suafa o lo tatou Matai, i le suafa o Iesu le Keriso, amene.