“Pagpaambit sa Ebanghelyo sa Tibuok Kalibotan,” Alang sa Kalig-on sa mga Kabatan-onan, Hunyo 2021, 8–11.
Pagpaambit sa Ebanghelyo sa Tibuok Kalibotan
Himoon natong tanan nga ligdong nga mobarog ug mamulong uban sa hugot nga pagtuo diha sa pagpaambit sa atong mensahe ngadto sa kalibotan.
Gikuha gikan sa Brigham Young University–Hawaii commencement address nga gihatag niadtong Disyembre 15, 2007.
Nakahinumdom ko sa dihang ang akong amahan nagdala sa unang telebisyon ngadto sa among kasilinganan. Ang tanan nakong mga higala miadto sa among balay ug nanan-aw nga adunay kahibulong kon sa unsang paagi ang litrato nga itom ug puti mosalida pinaagi nianang gamay nga 12 pulgadas nga kahon.
Dihang nagsugod ko sa akong misyon sa England niadtong 1948, ang labing komon nga paagi sa mga tawo sa pagdawat og mga balita gipaagi sa pamantalaan ug radyo.
Pagkalahi na sa inyong kalibotan karon. Ang kalibotan nga inyong masinati lahi ra kay sa karon ug sa nanglabay, inubanan sa mga imbensyon nga mas mga maayo pa kay sa nahunahunaan nga moabut diha sa inyong kinabuhi. Unsaon ninyo sa paggamit kining talagsaong mga imbensyon? Sa mas direkta sa punto, unsaon ninyo sa paggamit niini aron mapadayon ang buhat sa Ginoo?
Mga himan sa Pagpakigbahin
Sa mga siglo, ang Ginoo adunay kalambigitan sa pagdasig sa mga tawo sa pag-imbento og mga himan nga mopahiluna sa pagpakatap sa ebanghelyo. Ang Simbahan misagop ug mihangop niadtong mga himan, lakip sa pagprinta, pagsibya sa media, ug karon ang internet ug social media.
Ang internet ug social media nagtugot sa tanan nga ilang mapadangat ang ilang opinyon, ug kini nakapausab sa katilingban. Kini nakapahiluna sa usa ka tibuok kalibotan nga panag-istoryahanay sa hapit matag hilisgutan, lakip sa relihiyon, ug hapit ang tanan makaapil.
Apil sa Panag-istoryahanay
Ang pulong panag-istoryahanay importante. “Adunay mga panag-istoryahanay nga makanunayong gipadayon kabahin sa Simbahan. Kadto nga mga panag-istoryahanay mopadayon bisan kon kita mopili sa pag-apil niini o dili. Apan dili mahimong mopahipi lang kita samtang ang uban, lakip sa mga tigpanaway, mosulay sa paghubit kon unsa ang gitudlo sa Simbahan. Samtang ang ubang panag-istoryahanay adunay liboan o gani minilyon nga tigpaminaw, kadaghanan niini mas gagmay ra. Apan ang tanang mga panag-istoryahanay adunay epekto niadtong moapil niini. Ang mga pagtan-aw kabahin sa Simbahan ma-establisar diha sa usa ka panag-istoryahanay sa kada higayon.
Kamong tanan nasayud nga ang mga miyembro sa Ang Simbahan ni Jesukristo sa mga Santos sa Ulahing mga Adlaw kanunayng gipahinumduman ug kanunayng gi-awhag sa pagpaambit sa ebanghelyo ngadto sa uban. Ang Simbahan kanunayng nangita og labing epektibo nga paagi sa pagpahayag sa atong mensahe.
Ang pagsangyaw sa Pagpahiuli sa ebanghelyo kanunay nga espesyal ngari kanako. Ganahan ko sa akong pagkamisyonaryo didto sa England. Ganahan ko sa akong pagkapresidente sa misyon didto sa Canada. Ug ganahan ko sa akong kasamtangang calling, nga nagtugot kanako og mga oportunidad sa pagpaambit sa mensahe sa Pagpahiuli sa ebanghelyo ngadto sa kalibotan ug sa pagpamatuod nga ang Dios nga Amahan ug ang Iyang Anak, si Jesukristo, mipakita kang Joseph Smith niadtong 1820. Pinaagi ni Joseph, ang ebanghelyo nga gitukod ni Jesus panahon sa Bag-ong Tugon nahibalik na. Nawala kini tungod sa kamatayon sa mga Apostoles sa karaan. Makapaambit ko sa kalibotan sa kahibalo nga ang awtoridad sa pagkapari, ang doktrina, ug mga ordinansa sa Simbahan sa Bag-ong Tugon sa makausa pa ania sa yuta. Kini mao ang labing importante nga buhat nga kita makaapil.
Karon, hangyoon ko kamo sa pag-apil sa panag-istoryahanay pinaagi sa pagsalmot diha sa Internet, ilabi na gamit ang social media, sa pagpakigbahin sa ebanghelyo ug sa pagpasabot diha sa yano, klaro nga mga termino sa mensahe sa Pagpahiuli.
Unsay Inyong Mahimo
Kadaghanan kaninyo nakahibalo na nga adunay daghang paagi sa pagsugod sa pagpaambit sa unsay inyo nang nahibaloan nga tinuod. Maka-download kamo sa mga video gikan sa Simbahan ug sa ubang tukma nga mga site ug ipaambit kini sa inyong mga higala. Mahimo kamong mokomentaryo sa mga post kabahin sa Simbahan, ug ipabati ang inyong mga opinyon kabahin sa katukma niadtong mga gipost. Kini, siyempre, nagkinahanglan nga kamo, ug ang tanang miyembro sa Simbahan, makasabot sa nag-una, sukaranang mga baruganan sa ebanghelyo.
Ang uban mirekord ug mipost sa ilang mga pagpamatuod sa Pagpahiuli, sa mga pagtulun-an sa Basahon ni Mormon, ug sa uban pang mga hilisgutan sa ebanghelyo diha sa YouTube ug sa ubang ilado nga mga site nga mapaambitan sa video. Kamo usab makasulti sa inyong istorya ngadto kanila kinsa dili mga miyembro sa Simbahan niining paagiha. Paggamit og mga istorya ug mga pulong nga masabtan sa mga tawo. Pagsulti sa tinuod ug sinsero kabahin sa epekto sa ebanghelyo sa inyong kinabuhi, kon sa unsang paagi kini nakatabang ninyo sa pagbuntog sa kahuyang o mga hagit, ug nakatabang sa paghulma sa inyong mga mithi. Ang inyong mga tigpaminaw sa kasagaran gamay ra, apan ang tingob nga epekto sa liboan sa maong mga istorya mahimong talagsaon. Ang hiniusang paningkamot siguradong mapuslanon ang sangputanan bisan kon pipila lang ang naimpluwensya sa inyong mga pulong sa hugot nga pagtuo ug gugma sa Dios ug sa Iyang Anak, si Jesukristo.
Ang Pagpahiuli sa ebanghelyo ni Jesukristo sa walay pagduhaduha adunay gamhanang epekto sa inyong kinabuhi. Kini, sa usa ka bahin, mihulma kon si kinsa kamo ug unsa ang inyong kaugmaon. Ayaw kahadlok sa pagpaambit sa inyong mga kasinatian ngadto sa uban isip usa ka sumusunod ni Ginoong Jesukristo. Tanan kita adunay makapaikag nga mga istorya nga naka-impluwensya sa atong pagkatawo. Ang pagpaambit niadtong mga istorya usa ka dili makahulga nga paagi sa pagpakigsulti ngadto sa uban. Makatabang usab kamo sa pagbuntog sa daghang sayop nga mga hunahuna kabahin sa Simbahan pinaagi sa inyong impluwensya.
Hinumdumi Kon si Kinsa Ka
Matag disipulo ni Kristo mahimong labing epektibo ug makabuhat sa labing maayo pinaagi sa pagbaton og pamatasan nga angayan nga mahimong sumusunod sa Manluluwas sa kalibotan. Ang mga panaghisgutan nga nakatutok sa pagkwestyon, pakiglantugi, ug pagduda sa mga baruganan sa ebanghelyo diyutay ra ang mahimo sa pagpalig-on sa gingharian sa Dios. Si Apostol Pablo miawhag kanato nga dili “ikaulaw ang Maayong Balita kay kini mao ang gahom sa Dios aron pagluwas sa tanan nga motuo” (Mga Taga-Roma 1:16). Himoon natong tanan nga ligdong nga mobarog ug mamulong uban sa hugot nga pagtuo diha sa pagpaambit sa atong mensahe ngadto sa kalibotan.
Samtang moapil kamo niining panag-istoryahanay, hinumdumi kinsa kamo. Kamo usa ka Santos sa Ulahing mga Adlaw. Wala na kinahanglana nga makiglalis o makigbingkil sa uban kabahin sa atong mga gituohan. Wala na kinahanglana nga mahimong mapanalipdanon o mag-inisog. Ang atong baruganan solido, ang Simbahan tinuod. Kinahanglan lamang kita og usa ka panag-istoryahanay, isip mga higala sa samang room, nga kanunay nga gigiyahan sa mga pag-aghat sa Espiritu ug kanunayng mohinumdom sa Pag-ula ni Ginoong Jesukristo, nga nagpahinumdom kanato kon unsa ka bililhon ang mga anak sa atong Amahan sa Langit.
Hinaut ang Ginoo mopanalangin kaninyo, mogiya kaninyo, modasig kaninyo ug molamdag sa inyong hunahuna, nga kamo masayud kon unsaon sa pag-apil sa halapad, tibuok kalibotan nga panag-istoryahanay nga nagpadayon. Itugot nga ang inyong tingog madungog sa pagpahayag og mahinungdanon ug mahimayaon nga mensahe sa Pagpahiuli sa kahingpitan sa walay kataposan nga ebanghelyo ni Jesukristo.