Faasoaina Atu o le Talalelei i le Lalolagi Atoa

I aluga o seneturi, sa i ai le aao o le Alii e musuia ia tagata e fatu ni meafaigaluega e faafaigofie ai le faasalalauina o le talalelei. Ua faaaogaina ma taliaina e le Ekalesia na meafaigaluega, e aofia ai le lolomiina, faasalalau i ala o faasalalauga, ma le taimi nei i le initoneti ma faasalalauga faaagafesootai.

O le initoneti ma ala o faasalalauga faaleagafesootai e mafai ai e tagata uma ona faailoa atu o latou leo, ma o se lalolagi ua faafouina. O lenei mea ua faafaigofieina ai se talanoaga i le lalolagi atoa e toetoe lava o mataupu uma, e aofia ai le lotu, ma e toetoe lava o tagata uma e mafai ona auai.

O le upu talanoaga e taua. O loo i ai talanoaga o loo faia pea e uiga i le Ekalesia. O na talanoaga o le a faaauau pea ona faia e tusa pe tatou te filifili e auai atu i ai pe leai. Ae e le mafai ona tatou tutu i autafa ae o loo taumafai isi, e aofia ai ma le au faitio, e faauiga mea o loo aoaoina atu e le Ekalesia. E ui o nisi talanoaga o loo i ai ni tagata maimoa e fiaafe pe fia foi miliona, ae o le tele lava, e matuai toalaiti lava. Ae o talanoaga uma lava e i ai se aafiaga ia i latou e auai atu i ai. O manatu e uiga i le Ekalesia e faatulagaina i le tasi le talanoaga i le taimi.

Ua outou silafia uma o loo faamanatu mai pea e le aunoa ma uunaia pea lava tagata o Le Ekalesia a Iesu Keriso o le Au Paia o Aso e Gata Ai e faasoa atu le talalelei i isi. O loo vaavaai pea le Ekalesia i taimi uma mo ni auala e sili ona lelei e folafola atu ai la tatou savali.

O le tala’iina o le Toefuataiga o le talalelei sa faapitoa lava ia te a’u i taimi uma. Sa ou fiafia e avea ma se faifeautalai i Egelani. Sa ou fiafia i le avea ai ma se peresitene o le misiona i Kanata. Ma ou te fiafia i lo’u valaauga i le taimi nei, lea e mafai ai ona ou maua avanoa e faasoa atu ai le savali o le Toefuataiga o le talalelei i le lalolagi ma molimau atu o le Atua le Tama ma Lona Alo, o Iesu Keriso, na faaali mai ia Iosefa Samita i le 1820. Na ala mai ia Iosefa, le toe aumaia o le talalelei lea na faatuina e Iesu i le vaitaimi o le Feagaiga Fou. Sa le toe i ai i le maliliu ai o Aposetolo anamua. E mafai ona ou faasoa atu i le lalolagi faapea o le malamalama o le pule o le perisitua, le aoaoga faavae, ma sauniga o le Ekalesia o le Feagaiga Fou ua toe i ai nei i le lalolagi. O le galuega sili lenei ona taua e mafai ona tatou auai.

Ou te fia talosaga atu nei, ina ia outou auai i le talanoaga e ala lea i le auai i luga o le initoneti, aemaise lava i agafesootai o faasalalauga, e faasoa atu ai le talalelei ma faamalamalama atu i ni faaupuga faigofie, ma le manino le savali o le Toefuataiga.

O le toatele o outou ua silafia e tele auala e amata faasoa atu ai mea ua outou iloa e moni. E mafai ona e sii maia vitio mai le Ekalesia ma isi saite talafeagai ma faasoa atu i au uo. E mafai ona e faaali atu ni faamatalaga i mea e uiga i le Ekalesia, ma faaleo ou manatu i le sa’o atoatoa o na faamatalaga. O le mea moni, e manaomia ai outou, ma tagata uma o le Ekalesia, ia malamalama i mataupu faavae, ma autu o le talalelei.

O isi ua faamaumauina ma tuuina i luga a latou molimau i le Toefuataiga, o aoaoga o le Tusi a Mamona, ma isi mataupu o le talalelei i luga o le YouTube ma isi saite lauiloa e faasoa ai vitio. E mafai foi ona e ta’uina atu lau tala ia i latou e le o ni tagata o le Ekalesia i lenei auala. Faaaoga tala ma upu o le a malamalama ai tagata. Talanoa faamaoni ma le agalelei e uiga i le aafiaga o le talalelei ua i ai i lou olaga, e uiga i le auala na fesoasoani ai ia te oe e faatoilalo vaivaiga po o luitau, ma fesoasoani e faamalamalama ou tulaga faatauaina. O lau aufaitau atonu e masani ona toalaiti, ae o le aafiaga tele o le faitau afe o na ituaiga tala e mafai ona maoae. O le taumafaiga tuufaatasi e matua aoga lava le taunuuga e tusa lava pe ua na o ni nai tagata ua aafia i au upu o le faatuatua ma le alofa i le Atua ma Lona Alo, o Iesu Keriso.

O le Toefuataiga o le talalelei a Iesu Keriso, e leai se masalosalo na i ai se aafiaga mamana i lou olaga. Na ia, mamanuina i se vaega le tagata ua e i ai ma po o le a lou lumanai. Aua e te fefe e faasoa atu i isi lau tala, lou aafiaga o se soo o le Alii o Iesu Keriso. E tofu uma lava tatou ma tala matagofie na faatosina ai lo tatou faasinomaga. O le faasoa atu o na tala o se ala e le taufaamata‘u e talanoa ai i isi. E mafai foi ona e fesoasoani e faatoilalo le tele o vaaiga sese e uiga i le Ekalesia e ala i lau lio o faatosinaga.

O soo uma o Keriso o le a sili ona mataalia ma faia le mea sili ona lelei e ala i le taliaina o se uiga e agavaa ai mo se soo o le Faaola o le lalolagi. O talanoaga e taulai atu i le fesiligia, finau, ma le masalosalo i mataupu faavae o le talalelei e itiiti lava se mea e fausia ai le malo o le Atua. Ua apoapoai mai le Aposetolo o Paulo ia i tatou ina ia aua nei “maasiasi i le talalelei a Keriso: aua o le mana lava lea o le Atua e ola ai” (Roma 1:16). Ia tatou tutu mausali ma talanoa ma le faatuatua i le faasoaina atu o la tatou savali i le lalolagi.

A o outou auai i nei talanoaga, ia manatua po o ai oe. O oe o se Au Paia o Aso e Gata Ai. E le manaomia ona misa pe finau ma isi e faatatau i o tatou talitonuga. E le manaomia ona fiaamiotonu pe finauvale. Ua mausali lo tatou tulaga; e moni le Ekalesia. E na o le pau le mea tatou te manaomia o le faia o se talanoaga, e pei o ni uo i le potu e tasi, e taialaina e le aunoa i uunaiga a le Agaga ma manatua pea le Togiola a le Alii o Iesu Keriso, lea e faamanatu mai ai ia i tatou le taua tele o fanau a lo tatou Tama i le Lagi.

Ia faamanuia atu le Alii ia te oe, taialaina oe, musuia oe, ma faamalamalamaina lou mafaufau, ina ia e iloa le ala e te auai ai i lenei talanoaga tele, o loo faia i le lalolagi atoa. Ia lagonaina lou leo i le folafolaina atu o le savali sili ma le mamalu o le Toefuataiga o le atoaga o le talalelei e faavavau a Iesu Keriso.