Ij Ke Mour “ilo juon Wāween Elem̧ōņōņō”?

Pija

jodikdik ro

Kōmeļeļe jān Alyssa Gonzalez

Jidik iien tokālik jenolo̧k eo aer jān riLeman ro, Nipai ekar ba kōn armej ro an “rekar mour ilo juon wāween elem̧ōņōņō” (2 Nipai 5:27). Ļōmņak bwe ekar bar wōr juon kūrub in armej rekar kōņaan in m̧an er (lale 2 Nipai 5:1–6, 14), menin emaron̄ bar kabwilōn̄lōn̄. Ewi wāween an jabdewōt armej maron̄ in m̧ōņōņō ium̧win kain jekjek kein?

M̧oktata, keememej bwe jekar “mour ilo wāween elem̧ōņōņō” ejjab meļeļein “aolep kajjojo riNipai rekar m̧ōņōņō 24/7.” Ej meļeļein rekar mour ilo kain wāween eo, im kain wāween ko, me rej tōlļo̧k n̄an lem̧ōņōņō. Ilo aolepān, men̄e apan̄ ko, ekar juon iien m̧ōņōņō.

Kōn menin, ta in “ilo wāween elem̧ōņōņō”? Ewi wāween an bar kōm̧m̧ane ilo mour ko ad make, eo ej barāinwōt apan̄? Jen lale!

• Pokake. “Jej lale n̄an kōjparok … kien ko an Irooj” (2 Nipai 5:10).

  Mour kōn gospel eo ej Bun̄tōn 1. Kwomaron̄ in m̧ōņōņō jidik iien ilo jerawiwi, ak eban aitok kitien. Ilo m̧ool jab pokake Anij ejjab “ilo wāween elem̧ōņōņō” (lale Alma 41:10).

• Pukot jeje ko rekwojarjar. “Im n̄a, Nipai, … iaar barāinwōt būki ļo̧o̧k ko kar m̧wijit ioon pileij brass ko” (2 Nipai 5:12). “Kōm̧ … ar lin̄ōri im lo bwe raar lukkuun kāitoktok-limo; aaet, em̧ool aer aorōk eaar ļap n̄an kōm,” (1 Nipai 5:21) .

  Armej ro an Nipai rekar pād ippāer jeje ko rekwojarjar. Im ekar jab baj pād wōt ippāer—rekar lin̄ōri er.

• Ron̄jake ritōl ro aer. “N̄a, Nipai, iaar kōjenolo̧k Jekab im Josep, bwe ren pris im rikaki ro ioon āneo āneen … armej ro aō” (2 Nipai 5:26).

  Rūkaki rein rekar kōjerbal jeje ko rekwojarjar n̄an aer unin tōl (lale 2 Nipai 4:15; 6:4).

• Etal n̄an tampeļ (im jikin ko jet rekwojarjar). “N̄a, Nipai, iaar kalōk juon tampeļ” (2 Nipai 5:16).

  Eaorōk bwe en wōr ippād jikin ko rekwojarjar āinwōt m̧ōnjar ko im tampeļ ko bwe rikaļoor ro an ren aiintok doon im kabun̄jar. (Jemaron̄ ļōmņak riNipai ro rekar jab baj wōr ippāer juon tampeļ—rekar lukkuun kōjerbale.) Eļan̄n̄e kwojjab maron̄ etal n̄an juon tampeļ ilo nememein armej, komaron̄ aolep iien kōm̧m̧ane jerbal in menmenbwij eo.

• Kōm̧m̧an tōprak. “Ikar katakin armej ro aō n̄an kalōk m̧ōko, im n̄an jerbal. … [Ikar] kōm̧m̧an bwe armej ro aō ren wāmourur, im bwe ren jerbal kōn peier” (2 Nipai 5:15, 17).

  M̧ōttan wōt “wāween elem̧ōņōņō” ej wōr juon men n̄an kōm̧m̧ane! Juon ijjitōn̄, juon jerbal, juon eddo—juon men eo me ej lewaj juon jibadbad im kōttōbar (kon juon iien kakkije ekkar n̄an kakkije, aaet). Epen n̄an maron̄ m̧ōņōņō eļan̄n̄e ejjeļo̧k men kwoj kōm̧m̧ane aolep iien.

Ta eo kwonaaj ba bwe kwoj kiiō mour ilo wāween elem̧ōņōņō? Eļan̄n̄e jaab, bōlen waanjon̄ak eo an Nipai emaron̄ lewaj ļōmņak ko n̄an kilen kōkōm̧anm̧anļo̧k.