“Kabaŋa Nsɔŋɔnda eke Iwaad: Etop eke Andinyaŋa ɔnɔde esɔk Mbufo,” Kabaŋa Nsɔŋɔnda eke Iwaad Mar. 2024.
Ɔfiɔŋ-ke-ɔfiɔŋ Etop emi Abaŋade Nsɔŋɔnda eke Iwaad, , Ɔyɔhɔ Ɔfiɔŋ Ita 2024
Kabaŋa Nsɔŋɔnda eke Iwaad: Etop eke Andinyaŋa ɔnɔde esɔk Mbufo
Ndausuŋ emi eyenwam mbufo ediyit mbumek mbufo ke Jesus Christ ye ke ukpepŋkpɔ Esie.
Ami Nda ke Enyin-usuŋ nyuŋ Ntuak, otode J. Kirk Richards
Kere-baŋa nte ke afo okoduŋ ke Galilee eke eset, Tɔsin isua Iba emi ekebede. Ema ekot fi ye mme ufan fo ete edi ntuakibuot eke iwaad ke synagogue eke obio, emi asaŋa-asaŋa esenowo etiŋ-ikɔ, Jesus eyen Nazareth edidude. Ndien ke ndaha kiet ke etop Esie, Jesus edikot mme iwaad emi ekedude ke otu oro ete ebup Imɔ mbume.
Nso oruk mbume ke afo ekere nte afo okpokopde?
Ami nkere ke usuk mbume okpowut ido ye mme ndaha eke eyo oro. Edi ami menehede nim ke ediwak mbume ekpebiet mbume emi nnyin inyenede mfin emi.
Nte uwutŋkpɔ, ke Obufa Testament, mme owo ema ebup Andinyaŋa mme mbume ntem:
-
Nso ke ami nnyene ndinam man nnyene nsinsi uwem?1
-
Ndi eyenyime mi? Ndi ami mmedu do?2
-
Edieke eyen-ete mi eduede mi, ikafaŋ ke ami ndidaha-de do nnɔ enye?3
-
Nso idi-tibe inɔ ererimbot emi ke ini iso? Nte ami nyebɔhɔ?4
-
Nte Afo emekeme edikɔk-udɔŋɔ eke mbon ima mi?5
-
Nsidi akpanikɔ?6
-
Didie ke ami ndifiɔk mme ami nsaŋa-ŋka nnen-nnen usuŋ?7
Ndi kpukpru nnyin isikereke ibaŋa ukem-ukem ŋkpɔ oro kini-kini? Ke mme ata ediwak isua ekebede, mme mbume oro ineheke-de ikpuhɔ ɔkpɔsɔŋ? Ndien esit-mbɔm emi Andinyaŋa enyenede ɔnɔ mbon emi ebupde mbume oro nko inyuŋ ikpuhɔke. Enye ɔdiɔŋɔ nte uwem afinade onyuŋ esinede ndutime eketre. Enye ɔdiɔŋɔ nte ememde ɔnɔ nnyin ke ndisop usuŋ. Enye ɔdiɔŋɔ ete ke nnyin ke ubak-ini imisikere ibaŋa ini-iso. Ndien Enye ɔdɔhɔ ami ye afo, ukem nte Enye eketiŋde ɔnɔ mme anditiene Enye ke anyan ini ko ete:
Ini emi afo enyenede mme akpan mbumek ndinam, Jesus Christ ye mfiak-nda-ndi ikɔ Abasi Esie edi ata eti mbumek. Ini emi afo enyenede mme mbume, Jesus Christ ye mfiak-nda-ndi ikɔ Abasi Esie edi ata eti ibɔrɔ.
Emi edi ntak eke ami mmade Kabaŋa Nsɔŋɔnda eke Iwaad: Ndausuŋ eke Edinam Mbumek. Enye anyan nnyin owut Jesus Christ man nnyin idikeme ndibɔ ɔsɔŋɔ Esie. Ami mmesin ŋwed emi kiet ke esit ekpat ɔfɔŋ-idem mi ke kpukpru ini. Nte ami nsobode ye mme owo ke ofuri ererimbot emi eyomde ndifiɔk ntak emi nnyin, nte mbon Ufɔk Abasi Jesus Christ, inamde se nnyin isinamde, ami nsibuana ndausuŋ ye mmɔ.
Kabaŋa Nsɔŋɔnda eke Iwaad ekpep nsinsi akpanikɔ abaŋa Andinyaŋa ye Usuŋ Esie. Ŋwed oro okot fi ete anam mme mbumek ɔkɔŋɔke ke mme akpanikɔ oro. Ndien ŋwed oro abuana mme edidiɔŋ emi ekeŋwɔŋɔke emi anyaŋade ekesim mbon emi editienede Enye. Mbɔk ekot, ekere-ke-esit, enyuŋ ebuana ndausuŋ emi!
Ekot Enye Esin
Jesus Christ oyom edi-di ubak ŋkpɔ ke uwem mbufo—kpukpru ini, odude kusen-kusen, ke eti ini ye ke idiɔk ini. Enye ididaha ke utit usuŋ kpɔt, ibet fi man afo asaŋa edisim Enye idem. Enye eyesaŋa ye afo ke ofuri mkpat-isaŋ ke usuŋ oro. Enye edi Usuŋ oro!
Edi Edi idinyik-ke-nyik Usuŋ Esie isin ke uwem nnyin. Afo edikot Enye isin, oto ke mbumek mbufo. Emi edi ntak eke ndausuŋ ndinam mbumek, nte Kabaŋa Nsɔŋɔnda eke Iwaad, enehede ɔsɔŋurua. Kpukpru ini emi afo anamde edinen mbumek ɔkɔŋɔke ke mme nsinsi akpanikɔ eke Andinyaŋa, afo omowut ete ke afo omoyom Enye ke uwem fo. Mme mbumek oro eyekpɔhɔde mme inuaotop heaven, ndien ɔsɔŋɔ Esie eyediduɔhɔ oduk uwem fo.11
Enam Ediyiri mbufo Ɔsɔŋɔ
Afo emekeme editi ete ke Andinyaŋa akada mbon emi ekopde ye mbon emi enamde mme ikɔ Esie odomo ye enyene-ibuot owo emi “ɔkɔbɔpde ufɔk esie ke enyɔŋ akamba itiat.” Enye anam aŋwaŋa ete:
“Ndien edim edep, mmɔŋ ukwɔ onyuŋ edi, ofim onyuŋ abara, ebere ufɔk oro; ndien enye iduɔhɔ, koro ebɔpde enye ke enyɔŋ akamba itiat.”12
Ufɔk isibɔhɔke oyobio koro ufɔk oro ɔsɔŋidem. Ufɔk nko isibɔhɔke oyobio koro itiat oro ɔsɔŋidem. Ufɔk oro esibɔhɔ oyobio koro esɔŋɔ etuak enye eyit ke ɔkpɔsɔŋ itiat oro. Edi ɔsɔŋɔ ediyiri ke itiat oro edi se inyenede ufɔn.
Ukem-ukem oro, nte nnyin ibɔpde uwem nnyin, edi akpan ŋkpɔ ke edi-nam nti mbumek. Onyuŋ edi akpan ŋkpɔ ke ndifiɔk mme nsinsi akpanikɔ eke Andinyaŋa. Edi nsɔŋɔnda emi nnyin idiyomde man idinwana ye oyobio eke uwem edi-di ke ini nnyin iyiride mbumek nnyin ke Jesus Christ ye ke ukpepŋkpɔ Esie. Oro edi se kabaŋa Nsɔŋɔnda eke Iwaad anwamde nnyin ndinam.
Nte uwutŋkpɔ, mme ufan fo ekeme edidiɔŋɔ ke afo ududomoke editiŋ ikɔ emiom mme ikɔ ubiak. Mmɔ ekeme edikut ke afo amanwam ekpri-eyen ke ufɔkŋwed emi ediwak owo enehede esin edinwam mme kpa eyomde ndififik. Edi mmɔ ediɔŋɔ ke afo anam mme mbumek emi koro Jesus Christ ama ekpep ete “yak kpukpru owo edi nditɔ-eka iren ye nditɔ-eka iban mbufo—esinede … mme owo emi edide isio-isio kotu mbufo”?13
Mme ufan fo ekeme edidiɔŋɔ ete ke afo esika ufɔk Abasi ke ofuri usen Ederi. Mmɔ ekeme edikut ini emi afo etrede ikwɔ kiet mme esinde ikoot kiet man edikise ososio-ndise kiet. Edi nte mmɔ ediɔŋɔ ete ke afo anam mbumek emi koro afo emenyene “ɔyɔhɔ-dara ebuana ediomi ye Ete Heaven ye Jesus Christ,” ndien ke nte ubak ubiere oro man etiene Andinyaŋa, ke afo emenem-esit “ke edinyene Edisana Spirit nte ofuri-ini nsaŋa fo”?14
Mme owo ekeme edidiɔŋɔ ke afo usuŋwɔŋke min mme ediŋwɔŋ esikɔŋ mme edida ndiɔi ibɔk efen. Edi nte mmɔ ediɔŋɔ ke afo anam mbumek emi koro Jesus Christ ama ekpep ete ke “ikpɔkidem fo edi nsasana,” “enyene-nyɔ enɔ otode Ete Heaven fo,” emi ekenamde ke mbiet Esie?15
Mme ufan fo ekeme ndifiɔk ke afo unamke-utuk mme edisu-nsu ndien ke afo emesin-ifik ke ŋkpɔ ufɔkŋwed eti-eti. Edi mmɔ ediɔŋɔ ke emi edi koro Jesus Christ ama ekpep ete “ke akpanikɔ eyenam mbufo ebɔhɔ-ufin?”16
Andiwak-nkan edi, nte mme ufan fo edi” ke afo anam mme ubak mbumek eke owo mimaha man afo anam akpanikɔ ɔnɔ mme ido eke Christ koro afo emefiɔk ete ke “Jesus Christ edi odudu fo”?17
Enye Edi Odudu Fo
Ami mmɔnɔ fi ata ikɔ ntiense mi nte ke Jesus Christ edi Usuŋ adade aka ediyama ye enyene-ubɔŋ ini iso—ini iso mbufo. Ndien Enye nko edi Usuŋ adade aka ediyama ye enyene-ubɔŋ eke idahaemi. Esaŋa ke usuŋ Esie, ndien Enye eyesaŋa ye mbufo. Mbufo emekeme ndinam emi!
Mme ndima mkpri ufan mi, Jesus Christ edi odudu mbufo. Eka-iso edisaŋa ye Enye, ndien Enye eyeŋwam mbufo ndidɔk “ke mba nte ntrukpum”18 ekesim nsinsi idara emi Enye ekebeŋe-de enim enɔ mbufo.
©2024 eketode Intellectual Reserve, Inc. Ekpan kpukpru unen ndimiŋ nwed emi. Ekemiŋ ke USA. Enyime edikabare ke Ikɔ Mbakara: 6/19. Enyime ndikabare: 6/19. Ɔfiɔŋ-ke-ɔfiɔŋ Edikabare Etop eke Abaŋade Nsɔŋɔnda eke Iwaad, Ɔyɔhɔ Ɔfiɔŋ Ita 2024. Efik. 19356 553