Ho Lumela ho Kreste pele A Tla Hape

“E mong le e emong a tle a lumele hore Kreste o tla tla, ba ts´oanang ba tle ba fumane ts´oarelo ea libe tsa bona, ´me ba nyakalle ka nyakallo e fetisisang, esita le joaloka ha eka o se a ntse a tlile har´a bona ” (Mosaia 3:13; khatiselletso e ekelitsoe).

“Me ho ile ha tla lentsoe ho ´na, le re: Enose libe tsa hau li ts´oaretsoe. … Ka baka leo, molato oa ka o ile oa hlakoloa. ´Me ke ile ka re: Morena e etsoa joang? ´Me o ile a re ho ´na: Ka lebaka la tumelo ea hau ho Kreste, eo u e so kang u mo utloa pele kapa ho mo bona. Me ho tla feta lilemo tse ngata pele a tla iponahatsa ka nama; … tumelo ea hau e u pholositse” (Enos 1:5–8; khatiselletso e ekelitsoe).

“Re ne re tseba ka Kreste, ´me re ne re na le ts´epo ea khanya ea hae lilemo tse makholo a mangata pele ho ho tla ha hae. … Haholo hoo re khonang e le kannete ho laela ka lebitso la Jesu le lifate li re mamele, kapa lithaba, kapa maqhubu a leoatle.” (Jakobo 4:4, 6; khatiselletso e ekelitsoe).

“Ho ne ho ena le ba bangata bao tumelo ea bona e neng e le matla ka ho fetisisa hoo, esita le pele Kreste a tla, bao ho neng ho sita hore ba bolokoe ka har´e ho lesira, empa kannete ba bone ka mahlo a bona” (Ethere 12:19;khatiselletso e ekelitsoe).

Ha re ntse re loanela ho boloka lilekane tsa rona, re itokisetsa ho ea phela ´musong oa khanya ea letsatsi. “Hobane bonang, bophelong bona ke nako bakeng sa batho ho lokisetsa ho kopana le Molimo; ee, bonang letsatsi la bophelong bona ke letsatsi la batho ho etsa mesebetsi ea bona” (Alma 34:32).

Re menngoe ke Mookameli Russel M. Nelson ho ba karolo ea “mosebetsi o moholohali lefats´eng”—pokello ea Iseraele. “Ntat´a rona ea Maholimong o bolokile ba bangata ba meea ea hae e khabane—mohlomong, nka re, sehlopha sa hae se setle ka ho fetisa—bakeng sa mokhahlelo oa ho qetela. Meea eo e khabane—libapali tseo tse ntle ka ho fetisa, bahale bao, —ke lona!”¹

Ha Mopholosi a tla hape, ba lokileng ba tla phela ka khotso. Mopholosi o tla busa, le ho ba le leeme ho tla etsoa hore ho nepahale. “Hobane Morena o tla ba har´a bona, ´me khanya ea hae e tla ba holim´a bona, ´me e tla ba morena oa bona le mofani oa bona oa molao” (Lithuto tsa Tumelo le Lilekane 45:59).

Batho bohle ba tla tsosoa bafung. Re tla fumana ´mele e phethehileng, e sa shoeng. Re tla boela re bone baratuoa ba rona ba hlokahetseng. “Moea le ´mele li tla kopana hape ka sebopeho se phethahetseng; leoto le manonyoletso li tla tsosolosetsoa ho phetheha, esita le joaloka moo re leng ka teng ka nako ena” (Alma 11:43).