Iintliziyo zaBantwana Ziya Kubuyela
UDavid A. Bednar
WeQumrhu labaPostile Abalishumi Elinambini
Ndimema abantu abatsha beBandla ukuba bafunde malunga kwaye babenamava ngoMoya ka–Eliya.
Njekokuba sifunda, sifunde, kwaye siphile ivangeli kaYesu Krestu, ulandelelwano luyafundisa amaxesha amaninzi. Qwalasela, umzekelo, izifundo esizifundayo ngokubaluleka kwezi zinto eziza kuqala ngokomoya ukusuka kulandelelwano lweziganeko ezinkulu ezenzekileyo njengoko ukuzaliseka kwevangeli yoMsindisi kwabuyiswa kule mihla yokugqibela.
KwiHlathi eliNgcwele, uJoseph Smith wabona kwaye wathetha noBawo ongunaPhakade kunye noYesu Krestu. Phakathi kwezinye izinto, uJoseph wafunda malunga nendalo eyinyani yentloko yobuThixo kunye nokuqhubeka kwesityhilelo. Lo mbono unobungangamsha ungeniswe “kwixesha lokuzihlanganisela lenzaliseko yamaxesha” (Abase-Efese 1:10) kwaye sesinye seziganeko esibalulekileyo kakhulu zomqondiso kwimbali yehlabathi.
Phantse kwiminyaka emithathu kamva, ekuphenduleni umthandazo onyanisekileyo ngokuhlwa kweyoMsintsi 21,1823, igumbi lokulala likaJoseph lazaliswa kukukhanya lada “ lakhanya ngaphezulu kunasemini emaqanda” (Imbali—kaJoseph Smith 1:30). Isiqu somntu savela ecaleni komondlalo wakhe, sabiza inkwenkwana ngegama, kwaye sabhengeza “wayesisimthunywa esithunyelwe sivela ebusweni bukaThixo … nokokuba igama laso sasinguMoronayi” (umqolo 33). Waye wayalela uJoseph malunga nokuza ngaphambili kweNcwadi kaMormoni. Kwaye emva koko uMoronayi wacaphula kwincwadi kaMalaki kwiTestamente eNdala, ngokwahluka kancinci kulwimi olusetyenziswe kwiNguqulelo kaKumkani uJames:
“Qaphelani, ndiya kunityhilela uBubingeleli, ngesandla sika-Eliya umprofeti, ngaphambi kokufika kwemini enkulu neyoyikekayo yeNkosi.
“… Kwaye uya kutyala ezintliziyweni zabantwana izithembiso ezenziwa kooyise, kwaye iintliziyo zabantwana ziya kubuyela kooyise. Ukuba bekungenjalo, umhlaba wonke ubuya kuphanziswa ngokupheleleyo ekuzeni kwayo” (imiqolo 38, 39).
Imiyalelo kaMoronayi kumprofeti oselula ekugqibeleni yayiquka imixholo emibini ephambili: (1) iNcwadi kaMormoni kunye (2) namazwi kaMalaki exela kwangaphambili ngendima ka-Eliya ekuBuyisweni “kweento zonke, awawathethayo uThixo ngomlomo wabo bonke abaprofeti bakhe abangcwele, kususela kunaphakade” (Izenzo 3:21). Njalo, iziganeko ezitshayelelayo zokuBuyiswa zatyhila ukuqonda okuchanekileyo kwentloko yobuThixo, zagxininisa ukubaluleka kweNcwadi kaMormoni, kwaye zawuqikelela umsebenzi wosindiso nokuphakanyiswa kwabaphilayo nabafileyo. Oku kulandelelana kukhuthazayo kuyafundisa malunga nemiba yokomoya ephambili kuThixo.
Umyalezo wam ugxile kubufundisi nakuMoya ka-Eliya oxelwe kwangaphambili nguMoronayi kwimiyalelo yakhe yokuqala kuJoseph Smith. Ndithandaza ngokunyanisekileyo ndicela uncedo loMoya oyiNgcwele.
Ubulungiseleli buka-Eliya
U-Eliya wayengumprofeti weTestamente eNdala ekwenziwa ngaye imimangaliso emikhulu. Wawatywina amazulu, yaye akuzange kune mvula kwaSirayeli wamandulo kangangeminyaka emi-3½. Wandisa isidlo somhlolokazi ne-oli yakhe. Wavusa inkwenkwana ekufeni, kwaye wabizela ezantsi umlilo ophuma ezulwini ngomceli mngeni kubaprofeti bakaBhahali. (Bona 1 OoKumkani 17–18.) Ekupheleni kobufundisi bukaEliya basemhlabeni, “wenyuka ngomoya ovuthuzayo, waya emazulwini” ( 2 OoKumkani 2:11) kwaye wathathelwa ezulwini.
“Sifunda kwisityhilelo semihla yokugqibela ukuba u-Eliya wayephethe amandla okutywina obuBingeleli bukaMelkitsedeke kwaye wayengumprofeti wokugqibela ukwenza njalo phambi kwexesha likaYesu Krestu.” (Bible Dictionary, “Elijah”). Umprofeti uJoseph Smith wacacisa, “Umoya, namandla, kunye nokubizwa kuka-Eliya, kukuba nibe namandla okubamba isitshixo … sokuzaliseka kobubingeleli bukaMelkitsedeke … ; kwaye … nokufumana … yonke imimiselo ebukumkanini bukaThixo” (Teachings of Presidents of the Church: Joseph Smith [2007], 311; ugxininiso longezelelwe). Eli gunya lokutywina elingcwele liyimfuneko kwimimiselo yobubingeleli ukuba isebenze kwaye ibophe emhlabeni nasezulwini.
U-Eliya wavela noMoses kwiNtaba yoTshintsho (bona Mateyu 17:3) kwaye eli gunya walinika uPetros, noYakobi kunye noYohane. U-Eliya wavela kwakhona noMoses nabanye ngoTshazimpunzi 3, 1836, kwiTempile yaseKirtland kwaye wanika izitshixo ezifanayo kuJoseph Smith no-Oliver Cowdery.
Isibhalo sibhala ukuba u-Eliya umprofeti wema phambi kukaJoseph no-Oliver wathi:
“Qaphelani, ixesha lifikile ngokuzeleyo, ekwakuthethwe ngalo ngomlomo kaMalaki—engqina okokuba lowo [uEliya] umele ukuthunyelwa, phambi kokuba imini enkulu neyoyikekayo yeNkosi ize—
“Kubuyiselwe iintliziyo zooyise kubantwana, neentliziyo zabantwana kooyise, hleze umhlaba wonke ndiwuchithe ngokuwuphanzisa—
“Ke ngoko, izitshixo zeli xesha lokuzihlanganisela zinikelwe ezandleni zenu; kwaye ngoku ninokwazi okokuba imini enkulu neyoyikekayo yeNkosi ikufuphi, nkqu eminyangweni” (IMfundiso&neMinqophiso 110:14–16).
Ukubuyiselwa kwegunya lokutywina ngu-Eliya ngo-1836 kwakuyimfuneko ukulungiselela umhlaba ukuza kweSibini koMsindisi kwaye kwaqalisa umdla owandileyo kunye nowomhlaba wonke kuphando lwembali yosapho.
UMoya kunye Nomsebenzi ka-Eliya
UMprofeti Joseph Smith wabhengeza, “Uxanduva olukhulu kulo mhlaba uThixo alubeke phezu kwethu kukuba sikhangele izinyanya zethu. … Kuba kuyimfuneko ukuba amandla okutywina abesezandleni zethu ukutywina abantwana bethu kunye nabafileyo bethu ngenxa yenzaliseko yexesha—ixesha lokuhlangabezana nezithembiso ezenziwe nguYesu Krestu phambi kokusekwa kwehlabathi kusindiso lomntu. … Yiyo loo nto uThixo wathi, ‘Ndiza kuthumela u-Eliya umprofeti’” (Teachings: Joseph Smith, 475).
UJoseph waphinda wachaza:
“Kodwa yintoni injongo [yokuza kuka-Eliya]? okanye kuya kuzalisekiswa njani? Izitshixo kufuneka zisiwe, umoya ka-Eliya uza kuza, iVangeli kufuneka imiselwe, abaNgcwele bakaThixo bahlanganiswe, iZiyon yakhiwe, nabaNgcwele beze phezulu njengabasindisi eNtabeni yeZiyon [bona Obhadiya 1:21].
“Kodwa bangaba ngabahlanguli njani kwiNtaba yeZiyon? Ngokwakha iitempile zabo … kwaye nokuhamba phambili kwaye besamkela yonke imimiselo … egameni labo bonke ookhokho babo abafileyo … ; kwaye nalapha nali ikhonkco elibopha iintliziyo zooyise ebantwaneni, kwaye abantwana kooyise, okufezekisa uthumo luka-Eliya” (Teachings: Joseph Smith, 472–73).
UMdala Russell M. Nelson ufundisile ukuba uMoya ka-Eliya “ukukubonakaliswa koMoya oyiNgcwele onika ubungqina bendalo yobuthixo yosapho” (“A New Harvest Time,” Ensign, Canzibe 1998, 34). Le mpembelelo yahlukileyo yoMoya oyiNgcwele itsala abantu ukuba bachonge, babhale, kwaye baxabise ookhokho babo kunye namalungu osapho—bobabini abadlulileyo nabakhoyo ngoku.
UMoya ka-Eliya uchaphazela abantu ngaphakathi nangaphandle kweBandla. Nangona kunjalo, njengamalungu eBandla likaKrestu elibuyiselweyo, sinoxanduva lomnqophiso lokukhangela izinyanya zethu kwaye sizinike imimiselo esindisayo yevangeli. “Ukuze bangenziwa bagqibelele ngaphandle kwethu” (AmaHebhere 11:40; bona kwakhona Teachings: Joseph Smith, 475). Kwaye “nathi singenako ukwenziwa sigqibelele ngaphandle kwabafileyo bethu” (IMfundiso&neMinqophiso 128:15).
Ngenxa yezi zizathu senza uphando ngembali yosapho, sakha iitempile, kwaye senza imimiselo enika amava. Ngezi zizathu u-Eliya wayethunyelwe ukuba abuyisele igunya lokutywina elibophelelayo emhlabeni nasezulwini. Singabameli beNkosi emsebenzini wosindiso kunye nokuphakanyiswa okuya kuthintela “umhlaba wonke [ekubeni] uchithwe ngokuwuphanzisa” (IMfundiso&neMinqophiso 110:15) xa Yona ibuya kwakhona. Lo ngumsebenzi wethu kunye nentsikelelo enkulu.
Isimemo kwisiZukulwana Esikhulayo
Ngoku ndimema ingqwalaselo yamabhinqa aselula, nabafana abaselula, kunye nabantwana besizukulwana esikhulayo njengoko ndicacisa ukubaluleka koMoya ka-Eliya ebomini benu namhlanje. Umyalezo wam wenzelwe iBandla liphela ngokubanzi—kodwa nani ngokukodwa.
Uninzi lwenu lunokucinga ukuba umsebenzi wembali yosapho uza kwenziwa ikakhulu ngabantu abadala. Kodwa andazi mda wobudala ochazwe kwizibhalo okanye izikhokelo ezibhengezwe ziinkokheli zeBandla ezithintela le nkonzo ibalulekileyo kubantu abadala abaqolileyo. Ningoonyana neentombi zikaThixo, abantwana bomnqophiso, nabakhi bobukumkani. Anidingi ukuba nilinde de nifike kubudala obuzenzekelayo ukuze nizalisekise uxanduva lwenu lokunceda emsebenzini wosindiso wosapho loluntu.
INkosi yenze ukuba kufumaneke kumhla wethu izixhobo ezimangalisayo ezikwenza ukuba ufunde malunga nokuwuthanda lo msebenzi ochukunyiswa nguMoya ka-Eliya. Umzekelo, FamilySearch yingqokelela yamaxwebhu, nezixhobo kunye neenkonzo ezifikeleleka ngokulula kwiikhompyutha zenu kunye nezixhobo ezahlukeneyo eziphathwayo, eziyilelwe ukunceda abantu bafumane kwaye babhale imbali yosapho lwabo. Ezi zixhobo zikwafumaneka kumaziko embali yosapho akwisininzi sezakhiwo zethu zeBandla kwihlabathi liphela.
Akuyompazamo ukuba iFamilySearch kunye nezinye izixhobo zivele ngelixa abantu abancinci beqhelene kakhulu noluhlu olubanzi lolwazi kunye nobuchwephesha bonxibelelwano. Iminwe yenu iqeqeshelwe ukubhala kunye nokubhala umyalezo ukukhawulezisa kunye nokuqhubela phambili umsebenzi weNkosi—ingekuko nje ukunxibelelana ngokukhawuleza nabahlobo benu. Izakhono kunye nomxhino obonakala kulutsha oluninzi namhlanje kukulungiselela ukufaka isandla emsebenzini wosindiso.
Ndimema abantu abatsha beBandla ukuba bafunde malunga kwaye babenamava ngoMoya ka–Eliya. Ndiyanikhuthza ukuba nifunde, nikhangele izinyanya zenu, kwaye nizilungiselele ukwenza ukubhaptizela endlwini yeNkosi abantu benu abafileyo (bona IMfundiso&neMinqophiso 124:28–36). Kwaye ndiyanibongoza ukuba nincede abanye abantu babone iimbali zosapho lwabo.
Njengokuba niphendula ngokholo kwesi simemo, iintliziyo zenu ziya kubuyela kootata. Izithembiso ezenziwa ku-Abraham, no-Isake, nakuYakobi ziya kumiliselwa ezintliziyweni zenu. Intsikelelo yakho kasolusapho, kunye nokubhengezwa komnombo wayo, iya kukunxibelelanisa naba tata kwaye ibe nentsingiselo ngakumbi kuwe. Olwenu uthando nombulelo kwizinyanya zenu luya kwanda. Ubungqina benu nenguquko kuMsindisi buya kuba nzulu kwaye buya kuhlala. Kwaye ndiyanithembisa niya kukhuselwa ngokuchasene nefuthe eliqinayo lotshaba. Njengoko nithatha inxaxheba kwaye niwuthanda lo msebenzi ongcwele, niya kukhuselwa ebutsheni benu nakubomi benu bonke.
Bazali kunye neenkokheli, ncedani nincedise abantwana benu nolutsha ukuba bafunde malunga kwaye babenamava oMoya ka-Eliya. Kodwa sukuyicwangcisa le nzame okanye ubonelele ngolwazi okanye uqeqesho oluninzi kakhulu. Mema abantu abatsha ukuba baziphononongele, bazivavanyele, kwaye bazifundele (bona Imbali—kaJoseph Smith 1:20). Nawuphi na umntu osemncinci angayenza le ndiyicebisayo, esebenzisa imisebenzi yokufunda efumaneka kwi–lds.org/familyhistoryyouth. Ubongameli bequmrhu lobuBingeleli buka-Aronkunye neklasi yaMantombazana Amancinane bunokudlala indima ebalulekileyo ekuncedeni lonke ulutsha ukuba lwazi ngezi zixhobo zisisiseko. Abantu abatsha baya befuna ukuba ngabafundi abenza izinto kwaye bafumane ukukhanya okongezelelweyo nolwazi ngamandla oMoya oyiNgcwele—kwaye ingabi ngabafundi nje abenzelwa izinto ikakhulu (bona 2 Nifayi 2:26).
Bazali kunye neenkokheli, niya kumangaliswa yindlela abakhawuleza ngayo abantwana benu kunye nolutsha lweBandla ukuba babe nezakhono eziphezulu ngezi zixhobo. Enyanisweni, niya kufunda izifundo ezibalulekileyo kolu lutsha malunga nokuzisebenzisa kakuhle ezi zixhobo. Ulutsha lunokunikela okuninzi kubantu abadala abangonwabanga okanye aboyikiswa zezobuchwephesha okanye abangaqhelananga neFamilySearch. Niya kubala iintsikelelo zenu ezininzi njengoko abantu abatsha benikela ixesha elininzi kulo msebenzi wembali yosapho kunye nenkonzo yasetempileni kunye nexesha elincinci kwimidlalo yemiboniso bhanyabhanya, nokungena kwi-Intanethi, nakuFacebook.
UTroy Jackson, noJaren Hope, kunye noAndrew Allan bangababambi boBubingeleli buka-Aron ababebizwe ngubhishophu ophenjelelweyo ukuba babe liqela lokufundisa iklasi yembali yosapho kwisebe labo. Aba bafana bamele uninzi lwenu kulangazelelo lwabo lokufunda kunye nomnqweno wokunceda.
UTroy utshilo, “Bendiqhele ukuza ecaweni ndihlale nje, kodwa ngoku ndiyaqonda ukuba kufuneka ndiye ekhaya ndenze into ethile. Sonke sinokwenza imbali yosapho.”
UJaren uxele ukuba njengoko wayefunda ngakumbi ngembali yosapho, waqonda “ukuba ayingomagama nje la kodwa ngabantu bokwenene. Ndaya ndonwaba ngakumbi ngokusa amagama etempileni.”
UAndrew waphawula, “Ndithathile kwimbali yosapho ngothando kunye namandla endingaziyo ukuba bendinawo. Njengokuba bendilungiselela iveki nganye ukuba ndifundise, bendisoloko ndikhukuliswa nguMoya oyiNgcwele ukuba ndenze kwaye ndizame ezinye zeendlela ezifundiswe esifundweni. Ngaphambili, imbali yosapho yayiyinto eyoyikisayo. Kodwa ndincediswa nguMoya ndakwazi ukunyukela kubizo lwam ndize ndincede abantu abaninzi kwisebe lethu.”
Bantakwethu noodade bam abancinci abathandekayo, imbali yosapho ayisiyo nje inkqubo enika umdla okanye umsebenzi oxhaswe liBandla; endaweni yoko, yinxalenye ebalulekileyo yomsebenzi wosindiso nowokuphakanyiswa. Nilungiselelwe le mini kunye nokwakha ubukumkani bukaThixo. Nilapha emhlabeni ngoku ukunceda kulo msebenzi uzukileyo.
Ndiyangqina u-Eliya wabuyela emhlabeni kwaye wabuyisela igunya elingcwele lokutywina. Ndiyangqina ukuba into ebotshiweyo emhlabeni ingabotshwa nasezulwini. Kwaye ndiyazi ukuba ulutsha lwesi sizukulwana sikhulayo lunendima ephambili ekufuneka luyidlalile kule nzame inkulu. Ndingqina ngokunjalo egameni elingcwele leNkosi uYesu Krestu, amen.