Kuht Kuh in Oruh Wo Liki ac In Woyak Likina Met ah

Tamuhlwel sacohk wiyuck, nga enganwack in liye kowos ke toeni se ke u fokoko se luhn Leum suc ma sruok pristut la an. Kowos pa u fokoko se ke ma wo! Kuht luhngse kowos. Kuht pruhe keiwos. Ac yohk na kuht sruikeiwos.

In pacl inge nga sifacna puhlakihn muh nga fototoyang nuh ke mwe luti luhn Leum ma ituckyang nuh sel Mwet Pahluh Joseph Smith: “Nimet fahk kuhtwena ma sahyacn auliyak nuh sin fihl se inge.”¹ Mwe fahkwack se inge kwacna kalweniyuck lun ma suhmuhslah uh.² Mokwlweyuck ke kihsensiyuck na kahlwem se: “Kuh mwet nuhkwewa enenuh in auliyak?” Top an pa ahok.

Puhs mwet nuhnkuh na muh auliyak uh mwacta koluk se—sie ma in lusrongyuck sahyacn na ma sikyak upac emet uh. Tuhsruhktuh puhla se ke nuhnuhkweyuck inge tuhkuh sel Satan. El srihke in tulokihn kuht in ngwet luhkwel JisusKraist,³ suc tu ke paho ikacklah,⁴ finsrak ac mwesahs in onwelah, nuhnakmuhnahs, ahkkweye, ahknwacsnwacsye, ac ahkmuhtahlye kuht.

Kahs se nuh ke auliyak ke Wuhlweacng Sasuc ke kahs Greek uh pa metanoeo. Kahs se met meta- kalmac pa “eklac.” Kalmacn pohloh kahs sahflah -noeo oacna kahs Greek pa “insifac,” “etwacack,” “nguhn,” ac “momong.”⁵

Oruh, ke Jisus El siyuck sihk ac suwos in “auliyak,”⁶ El suli kuht in ekuhllah ma luhn insifacsr, etuh lasr, nguhnasr—finne ohiyacn momong lasr. El siyuck sesr in ekuhllah ohiyacn luhngse lasr, nuhnak, kuhlwacnsap, eis pacl lasr, karihngihn muhtwacn kiyacsr, luti tuhlihk nahtuhsr, ac finne karihngihn mahnosr.

Wacngihn ma mwesahs, fuhlwact, kuh yohk srihpac nuh ke kapwack sifacna lasr liki na lohacng lasr nuh ke auliyak lwen nuhkwewa. Auliyak uh tiac pa mukwikwi sikyak se; el ma ahkfahsryeyuck se. Pa inge ki in puhla engan ac mihslac in nuhnak uh. Fin kuht oruh ke luhlahlfongi, auliyak uh kuh in ikacslah nuh sesr kuh luhn Iwaclah luhn Jisus Kraist uh.⁷

Lah kowos oaru in fahsr ke inkacnek luhn wuhlweacng, kuh puhtatlac kuh som liki inkacnek luhn wuhlweacng, kuh tiac kuh in liye inkacnek luhn wuhlweacng ke acn lowos ingena, nga kwacfe kowos in auliyak. Puhlakihn kuh luhn auliyak lwen nuhkwewa—oruh wo ac in woyak kuhtuhsrihk likina met ah.

Ke kuht sulwaclah in auliyak, kuht sulwaclah in eklac! Kuht lwelah Mwet Lahngo Elacn ikihlkuhtlac sifacna nuh ke mwet wo emet. Kuht sulwaclah in kapwack ke nguhn ac eis engan—engan luhn molwelah Kacl.8⁸ Ke kuht sulwaclah in auliyak, kuht sulwaclah in moul oacna Jisus Kraist!⁹

Tamuhlwel, kuht enenuh in oruh wo ac inl woyak likina met ah mweyen kuht oasr ke mweun se. Mweun lain ma koluk uh ma na pwacye se. Mwet lokoalok sac el sang lihksrweni kuhiyacl in ahkkolukye testimoni uh ac tulokihn orekma luhn Leum uh. El ahkkweye mwet lal ke kuhfwen mwe mweun in tulokihn kuht in tiac ipeis ke engan ac luhngse luhn Leum.¹⁰

Yohk srihpac kuht in auliyak in tiac puhla kweok ke srihpen mwe sruhf luhn ma koluk. Leum El tiac enenuh kuht in suwohswohs ingena ke pacl in kapkapwack lasr uh. Tuhsruhk El sanwe kuht in eklac nwacsnwacslah liki met ah. Auliyak lwen nuhkwewa pa inkacnek nuh ke moul nwacsnwacs, ac nwacsnwacs uh use kuh fokoko. Nwacsnwacs lasr sifacna kuh in oruh kuht in kuhfa fokoko ke poun God. Auliyak lasr—nwacsnwacs lasr—ac fah ahkkweye kuht in kahsruh oracni luhn Mwet Israel.

Leum El lotwel Mwet Pahluh Joseph Smith “lah suwohs luhn pristut uh tiac kuh in fahsrwelihk liki kuh luhn inkuhsrao, ac kuh luhn inkuhsrao tiac kuh in orekmakihnyuck kuh karihngihnyuck fin wacngihn ip yohk luhn suwohswohs.”¹¹

Kuht etuh lah meac kuh in use kuh yohklacna luhn inkuhsrao nuh sesr uh. Kuht oacyacpac etuh ma tulokihn kapkapwack lasr—ma kuht enenuh in tui tilac oruh in ahkyohkye kuh lasr in eis kuh luhn inkuhsrao uh. Tamuhlwel, suk ke pruhe in kahlwem lah meac tulohkihn kowos in auliyak uh. Konwacack ma tulokihn kowos in auliyak. Ac na, eklac! Auliyak! Kuht nohfohn kuh in oruh wo liki met ah ac moul wo liki met.¹²

Oasr ohiyac kuh ma kuht kuh in kapkapwack kac. Sie pa ohiyacn karihngihnyacn mahnosr. Nga lut ke ma usrnguck luhn mahno uh. Pa sie ma oreklac na wowo, enenweyuck nuh ke kais kuhtuh kapkapwack nuh ke finsrak muhtahl lasr. Fin wacngihn na kuht tiac kuh in kihluckyak. Ke El use mwe sang ke mahnohsr, God El lwelah kuht in fahsr nuh met in eklac oacna El.

Satan el kahlwem ke ma se inge. El ahngyahng ke ma pwacye lah forlah liki ma pwacye lal met ah eislah kuh se inge luhkwel, elan puhla lwemta ac ahngyahng pacl nuhkwewa. Pa oruh puhs, finne inkaiyacn, mwesruhf el sang nuh ke inkacnek lasr oruh kuht in ahkkolukye mahnohsr kuh monun mwet sahyac. Ke srihpen Satan el ahsor muh wacngihn mahnohl, el ke kuht in ahsor pac ke srihpen mahnohsr.¹³

Monuwos pa tempuhl sifacna lowos, in sruokyac nguhn ma pahtpaht lowos.¹⁴ Yohk srihpac kowos in karihngihn tempuhl lowos. Inge, nga siyuck suwos, tamuhlwel, kuh kowos lohacng nuh ke luhngse luhn facluh ke nuknuk lowos yohk likina kena lowos in ahkpwacrye God? Top lowos nuh ke kihsensiyuck soko inge sang pweng se nuh Sel ke puhla lowos ke mwe sang sacohk Lal nuh suwos. In ahkfuhlwactye mahnohsr, tamuhlwel, nga muh kuht kuh in oruh wo likina met ah ac in woyak likina met ah.

Ohiyac se sahyac kuht kuh in oruh wo likina ac in woyak liki na met ah pa ohiyacn ahkfuhlwact lasr nuh sin muhtwacn uh ke moul lasr, muhtwacwack ke muhtwacn kiyacsr ac muhtwacn nahtuhsr, ninac kiyacsr ac tahmtahel wiyacsr uh.¹⁵

Mahlwem ekahsr tari ah, nga eis lwacta na ahsor se sin tahmtahel sacohk se. El suhmuhslah: “[Muhtwacn nuhtihk ac nga] kuht puhlakihn toasr ke lainyacn lohacng luhn mukul tuhmwacsr ac wen nahtuhsr, ke tuhkahkihnyacn ma sikyak ke ip luhn sritacl 24/7, video games, ma sikyak ke stock market, [ac] sramsram puhs ac liyeyacn akuhtuhn ke srihtacl poro nuhkwewa. Kuht puhla muh kuht kuf ke lohacng luhn mukul tuhmwacsr ac wen nahtuhsr ke srihpen lohacng lalos nuh ke [srihtacl].”¹⁶

Tamuhlwel, kunohkohn se emet ac yohk srihpac emet ke mwet sruok pristut an pa luhngse ac karihngihn muhtwacn kiyowos. Eklac ma sefanna yohrohl. Oruh kom in kawuck lal. Oruh in fihsrwacsr nuh sel in luhngse ma lom. Wacngihn kena lowos sahyac ke moul luh enenuh in yohk srihpac liki kuhpahsr lowos yohrohl an. Wacnighn ma ke TV, tacluhfon, kuh computer yohk srihpac liki engan lal. Lohacng nuh kac lah kowos sislah pacl lowosfuhkah ac lah meac kowos sang kuh lowos nuh kac uh. Ma sacn ac fah ahkkahlwemye nuh suwos acn insiowos asr we an. Pruhe tuh insiyowos in fototo nuh ke insiyacn muhtwacn kiyowos an. Suk in ahkpwacryacl. Suk kahsruh lal, ac lohng. Kahsruh lal ac fah ahkkweye mukwikwi lowos.

Fin oasr enenuh lowos in auliyak ke srihpen ohiyacn oruh lom nuh sin muhtwacn fototo emet nuh suwos an, muhtwacwacack ingena. Oacyacpac, esam lah kunowos in kahsruh muhtwacn ke moul lowos in eis mwe insewowo ma tuhkuh ke moulkihnyacn masap luhn Leum ke tiac kosro. Taran in tiac kom pa srihpac luhn sie muhtwacn in tiac eis mwe insewowo luhn tempuhl uh.

Tamuhlwel, kuht nohfohn enenuh in auliyak. Kuht enenuh in tuyak liki siah, fihlihyac remote uh, ac muhtwaclihk liki tikuclkucl in nguhn lasr uh. Pacl in nokomwacng mwe loang luhn God muh kuht in muh kuh in wi oruh orkema yohk srihpac se emet fin facluh uh. Ingena pa pacl in “orekmakihn mitmit [nahtuhsr], ac kosrwacni ke kuh [lasr], nuhnkwacsr, ac fokokoiyacsr.”¹⁷ Kuh luhn ma koluk tiac orekma upac met oacna mihsenge. Ekihn mwet kuhlwacnsap luhn Leum, kuht tiac kuh in mutul ke mweun se inge ma oasr yohrohsr.

Sucu lowos enenuh kuh lowos in kol ac luhngse. U lowos ac mwet ke ward ac pracns lowos enenuh kuh lowos. Ac mwet nuhkwewa ma kowos sun enenuh in etuh atac ac orekma luhn mwet tuhma lutlut pwacye uh.

Tamuhlwel sacohk wiyuck, kowos suleyucklac sin Pahpah tuhmwacsr in tuhkuh nuh facluh ke pacl yohk srihpac se inge ke srihpen kuh luhn nguhnuwos ke facl luhn nguhn ah. Kowos wi mwet wo, puhlaik emet suc tuhkuh nuh facluh. Satan el etuh lah suc kom an ac etwekom met, ac kahlwem ke orekma ma kuht enenuh in ahksahfyelah met liki Mwet Lahngo El fohlohk. Tukun tausin yac in ahkpahye kuhtasrihk lal, mwet lokoalok sac el pahlah ac fokoko.

Srui kaksakihn, pristut ma kuht sruok uh fokoko liki kuh luhn mwet lokoalok sac. Nga kwacfe nuh suwos in mukul ac mukulfuhsr ma Leum El enenuh kowos in eklac nuh ke. Lohacng nuh ke auliyak lwen nuhkwewa kowos in kuh in orekmakihn pristut ke kuh yohk likina met ah. Pa inge ohiyac sefanna kowos kuh in karihngihn kowos sifacna ac sucu lowos ke pacl upac ac fah tuhkuh uh.

Leum El enenuh mukul kuhlwacng ma nuhnkuh ke mwet sahyac met liki ellos sifacna. El enenuh mukul suc orekma na upac in lohacng nuh ke puhsren Nguhn ke kahlwem. El enenuh mukul olweacng suc moulkihn olwelah lalos ke orekma pwacye. El enenuh mukul suc oaru in moul nwacsnwacs—mukul muhtahl suc ahkolah pacl nuhkwewa in sang mwe insewowo ke nwacsnwacs insiyac, nwacsnwacs nuhnak la, ac paho insese. El enenuh mukul suc kena in auliyak—mukul engan in kuhlwacnsap ac wi un mwet mweun luhn Leum ke mwet suwohs suc sruok pristut an.

Nga ahkinsewowoye kowos in eklac oacna mukul inge. Nga ahkinsewowoye kowos ke puhlaik in auliyak lwen nuhkwewa ac lotwelah in orekmakihn kuh sesseslah luhn pristut. Nga ahkinsewowoye kowos in akacsruhi luhngse luhn Mwet Lahngo nuh sin muhtwacn kiyowos ac tuhlihk nuhtuwos ac mwet nuhkwewa kowos etuh. Nga ahkinsewowoye kowos in oruh wo ac wo likina met. Ac nga ahkinsewowoye kowos ke kowos oruh ma inge, kowos ac liye usrnguck ke moul lowos.

Kuht pahkuhk ke orekma luhn God Kuhlacna. Jisus pa Kraist. Kuht mwet kuhlwacnsap Lalos. Nga fahkwack ke inen Jisus Kraist, amen.