“Moy, Lakeg”

Pi walageg, gomow e ppin rog I Wendy e gomo falfalen’ ni gomow ba’ romed ko re Madnom ney ni kadbul. Bo’or e n’en nike buch napan fare general conference nike thimur. Temple nib bi’ech e kan ngongliy u Concepción, Chile; Barranquilla, Colombia; and Rome, Italy Ku thamiyed e Kan Nthothup niba’ ko pi’ney ni yibe rrin’.

Gube pining e magaer ngak e ppin (nge pumo’on) ni kafin bi’eged fare ke Babyor ku Mormon mar nangd e falfalen’ nge tin falel’ ban’en. Kug falfalen’ pi ma’ang’ang nge mornga’agen e n’en nike buch.

Ku falfalen’ ko pagael nib 11 e duw roraed ni, ni yib deacon e chiney, nima pi’ e sacrament ko gubin e Madnom. Yaed ma un ko ppin ni 11 e duw roraed nga temple, ni chiney e yaed ba adag ni ngar filed ban’en mar pigpig gaed ni yaed e Beehives. Yaed gubin ma yaed be machib nag e tin riyul’ ko gospel u fithik e pagan’ nge tamilang.

Gube falfalen’ ko bitir ni yaed be ayuw ngar machib niged e gospel u lane tabinaew roraed napan ni yaed be un ko galabthir roraed i, rrin’ e tin Galasia ban’en.

Ke yib e re sassing ney ngomow ni ya’an Blake ni aningeg e duw rok, ni, reb e kadbul ko Sabado, me feek e babyor ko Galsia me ga’ar, “Ba tu’uf ni nggu duruw’iy e ya’el rog!”

Blake, gamaed ba falfalen’ ngom nge pi’in ni kar mel’eged ni ngad duruw’iyed e ya’el roraed ni yibe suguyey ko tin riyul’ ko fare gospel rok Yesus Kristus nikan fulweg. Ma gamaed ba falfalen’ ni kan nang ni bukun e gidii’ e be thapeg gelngin Got u lane yafas roraed napan ni yaed be liyoey ma yad be pigpig u lane temple.

Oren I gimed e manang, ni tabinaew romow e ke chuw Wendy ni ppin ni faak mow ko biney e yafas nike yan dalip e pul. Oren I gimed e manang, ni tabinaew romow e ke chuw Wendy ni ppin ni faak mow ko biney e yafas nike yan dalip e pul.

Ku koel pa’ mu gog ngak gelngin nib tu’uf rog ma gub falflaen’ ni gag e chitamangin. Ku ga’ar: “Kam mabgol u lane e temple nge fulweg pi’ micheg rom. Gur e pumo’on rom e kam fakyew medlip e bitir nga lane tabinaew romew ma gimew chugliy raed kar manged gachalpen Yesus Kristus, chonggin e Galasia nib yul’yul’, ni yaed ma ayuweg e gidii’. Kar la’angiyed e pi’in e ni ku aram rogon. Papa’ rom e kari, falfalen’ ngom. Kam pi’ e falflaen’ ngog nib gel!”

Me fulweg ni ga’ar, “Kamagar, o Papa’.”

Ba ngiyal’, ni rib ga’fan mab kirbaen’ ngomow. Lane 67 e duw, ma kug murwel gow u ta’abang, tang u ta’abang, ma baga’ ni gomow ma fafel u fithik e snow. Machane re balayal’ nem, ma ku weliyew e pin’en nib ga’fan, boed e m’ag, gam’ing, fol, mich, tabinaew, tu’ufeg, nge yafas nib manemus.

Karug tawreng nigew fak mow nib alamrin. Machane, bachane fare gospel rok Yesus Kristus nikan fulweg, ma ba pagan’ mow ngak. Napan ni gomow ra ulul I ta’ fan e pi m’ag romow ngak Got, ma gomow be paer u fithik e pagan’ ni gomow ra guy biyay. Napan, ni gomow be pigpig ngak Somoel u roy ma ba’ nibe pigpig Ngak u rom—u paradis.¹

Ma, ppin rog nge gag ku warow nga paradis u lane re duw ney—Paradise, California, iraram. Napan ni buch, ma chuur romow ngaram e ba ngoch ko 40 e awa ko tomuren nike chuw fak mow ko biney e yafas. Ppin rog nge gag, nib mu’un Elder Kevin W. Pearson nge June, ni ppin rok ngomow, e kan pi’ e Gidii’en Got ko Chico California Stake gelngin mad. Ku filed e mich roraed nib gel, machib roraed, nge ma’ang’ang nike buch u fithik e tin nike m’ay roraed ko fare nifiy nike urfiy yu California.

U rom, ma gamaed non ngak ba polis, I John, nib mu’un ngak e pi’in nike yani pi’ e ayuw ko fare nifiy. Ku manang gelngin nib dub’ag e lumor nike yib nga dakean yu Paradis ko November 8, 2018, napan nibe yib e nifiy nga lane donguch, nibe urfiy gubin ban’en ni dani digey ban’en ma I go’ awat nge kenggin e chimney.

15 e awa nike yan, ni I yan John u fithik e lumor ni yira mad’ad riy nibe ayuweg e gidii’, nge tabinaew ni ngan yan ko gin nib gapas—gubin ni rayog ni nge yim’ riy. Machane napan e binem nibe buch, ma n’en nike rus nag John e duwer nibe fith: “Bu’uw e tabinaew rog?” Napan nike bukun e awa, u fithik emurus, fini nang ni kab fal’ rogon e tabinaew rok.

N’en nike buch rok John nike magar nag e tabinaew rok e n’en ni gu ba adag ni nggu weliy e daba’ ngak e pi’in I gimed ni sana ke fith e biney e duwer nike chugur ko tomur e yafas rom, “Bu’uw e tabinaew rog?” Re rran nem ni bayib napan ni kam mus e yafas rom ma kan yan ko tafen e ya’el, ma gara leam nag e re duwer nem: “Bu’uw e tabinaew rog?”

Ke fil Yesus Kristus e kanawo’ ni ngan sul nga tabinaew rodaed nib manemus. Manang fan e tunom rok e Chitamangdaed nu Tharmiy ni rib fal’ rogon ngodaed ni mornga’agen rogoy nib manemus. Ya, Ir e cha’an niba’ u lukngun ni gubin. Ir e Tabiyul rodaed, Tagol rodaed, nge Tathapeg rodaed.

Napan ni kan chuweg Adam nge Eve u dakean fare Milay’ u Eden, me Yesus ni Kristus e pi’ pa’ ni nge ayuweg gubin e pi’in nike mel’eg ni nge lak. Fapi chep nib thothup, e sulsul u dakean, ni Demtrug urngin mit e denen ko gubin e gidii’, ma ba’ pa’ ni kube ki’iyag.²

Fare ya’el niba’ u fithik daed e ba adag ninge paer e tu’ufeg ko tabinaew ni nge manemus. Tang ko adag e ma pi’ e athap ni dani riyul’ ni adag e kemus e n’en nib tu’uf rom fa’anra gaba adag ni ngam pirew u ta’abang nib manemus. Oren e gidii’ e michan’ ni Yesus Kristus nike Foskoyam’ e be pi’ e micheg ni gubin e gidii’ ma yaed ba’ ko pi’in nib tu’uf roraed ko tomuren e biney e yafas.

N’en nib riyul’, e fare Tathapeg e ke yoeg nib tamilang ni napan nike Foskoyam’ nike yag nag ko gubin e gidii’ ni ir paer u dakean e fayleng ni rra foskoyam’ me fas nib manemus,³ ma bo’or e n’en nib ga’fan riy fa’anra gadaed ba adag ni ngeyag e bin nib tolang ngodaed. Thap e baga’ fan ngak e gidii’, ma falfalen’ e baga’ fan ko tabinaew.

Motoyil ko pi thin ney nike yoeg Somoel ni Yesus Kristus nga e profet Rok: “Gubin e m’ag, babyoren, chiyliy, murwel, micheg, tin riyul’, murwel, tha’, fagar, fa tin ni yi ba adag, ni daworun rrin’ ni daworin chiyliy ko fare Kan ni Thothup ko m’ag … e dariy fan, dani mangil, dabin towasor nag ma tomuren nikan foskoyam’; ma gubin e m’ag ni daworun ngongliy u ba’ney e ke m’ay napan nike yim’ e gidii’.”⁴

Ere, mang e ba tu’uf ko tabinaew ni nge falfalen’ nib manemus? Rayog e re m’ag nem ngodaed ni ngan ngongliyed ngak Got, man cha’ariy e pi m’ag nem, man thapeg e pi gam’ing nib ga’fan.

Biney e ba riyul’ ko somm’on. Adam nge Eve, Noah nge ppin rok, Abraham nge Sarah, Lehi nge Sariah, nge kuboech e gachalpen Yesus Kristus nib yul’yul’—tabolngin nikan sunmiy e fayleng—nikan ngongliy <50>ta’ab mit e m’ag ngak Got. Kar thapegned ta’ab gam’ing ni gadaed e chonggin e Galasia rok Somoel nikan fulweg e daba’: fapi micheg nikan thapeg ko tawfe nge lane temple.

Be pong e Tathapeg nag gubin e gidii’ ni ngan lak nga miraen ko tawfe, ma ngiyal’ nike taw, man ngongliy boech e m’ag ngak Got u lane temple man thapeg man yul’yul’ ko tinef e gam’ing ni kab ga’fan. Gubin e pinn’ey ma baga’ fan fa’anra gadaed ba adag ni ngad pired rok e tabinaew rodaed nge Got nib manemus.

Kirbaen’ u lan gumircha’eg e bukun e gidii’ nib tu’uf rog, ni gu ba adag dakean, ma gube ta’ fan raed e kar siyeged e pong Rok. Kar siyeg ned e wenig rok Yesus Kristus napan ni pong nibe ga’ar, “Moy, lakeg.”⁵

Ku nang fan ko mongfan nima yoer Got.⁶ Kugube yoer nag e pi tafagar nge tabinaew. Yaed e mo’on nge ppin nib mangil, ni rib tu’uf e tabinaew roraed roraed nge tin nib mil fan ngoraed. Kar pired ko ngiyal’ roraed nib yad ba gol, ni yaed ba gel, nib ga’fan. Ma fare fayleng e ba mangil niba’ e murwel roraed riy. Machane kar mel’eged ni dabri ngongliyed e m’ag ngak Got. Dawori thapeged e pi gam’ing ni yaed e tabinaew roraed ni ngad falfalen’ gaed ni nge chiliy raed nga ta’abang nib manemus.⁷

Rugu ba adag ni nggu waen gu guy raed mug pining raed ngad leam niged e motochiyel rok Somoel. Ku ug tafney nag ko mang e ra gog ya ngar thamiyed gelngin ni yaed ba tu’uf rok e Tathapeg nge gelngin ni ba adag ni ngar nanged rogon ni rayog ni nge thapeg e pumo’on nge ppin e “falfalen’ nib gel ni kar fal’eged e m’ag.”⁸

Ba tu’uf ni ngar nanged fan ba’ e gin’en ni fan ngoraed ko tomuren e biney e yafas—ni ba’ e ppin nge pumo’on nib mangil ni kar mel’eged ni dabir ngongliyed em’ag ngak Got—binem e gathi gin ni ra gak e tabinaew ngay ni rayog ni ngar pired u ta’abang nib manemus. Binem e gathi gin ni yaed ra nang e falfalen’ nib gel—falfalen’ ni darma mus nge rogoy ni yibe mangil. ⁹ Pi tawa’ath ney e kemus ni rayog ni nge yib ni yibe paer u tafen Gor, ni Chitamangdaed ni Manechubog; Faak, ni Yesus Kristus; nge chonggin e tabinaew rodaed, nib falel’, nib yul’yul’, ni yib mangil.

Gube thamiy ni nggu non ngak e fagar rog ni yad ba palog:

“Lane biney eyafas, ma dariy bi;id nikam paer ko ban’en ni bin migid ko bin tha’abi mangil. Machane, napan ni gara siyeg fare gospel rok Yesus Kristus nikan fulweg, ma gabe mel’eg ni ngam paer ko bin nib migid ngay.

“Fare Tathapeg e ga’ar, ‘Lane na’un ko Chitamanig ba bo’or e senggil riy.’¹⁰ Machane, napan ni gara mel’eg ni dam ngongliy e m’ag ngak Got, ma gabe tay e chig nga dakean lolgem ni dani mangil nib manemus.”

Nggu non ngak e pi fagar rok ni nggu ga’ar:

“Pu’og gumircha’em ngak Got. Mfith Ngak ko fa’anra ba riyul’ e pinn’ey. Ta’ e ngiyal’ ni ngam fil mornga’agen e thin Rok. Ngarum fil! Fa’anra rib tu’uf e tabinaew rom ma ri ga ba adag ni gimed u ta’abang u fithik e falfalen’, mag rrin’ ban’en ngay e chiney—ningam fil mornga’agen mag meybil—ni ngam nang e pin’ey nib riyul’ nib manemus ma arame mag fol riy.

“Fa’anra danum nang ko ba’ Got fa danga’, mag tbab u rom. Mu nang ni ra dani nang Got, ma dariy bee’ ni rayog ni nge siyeg ni ba’ Got. Ere, mu tem ko gin nibe tabab I buch ban’en rom Rok. Sobutan’ nigem. Meybil ni ngeyag e sap ngom ni ngam guy pa’ Got u lane yafas rom nge lane fayleng nib liyeg nem. Mfith Ngak ni nge yoeg ngom fa’anra riyul’ niba’—fa’anra managem. Mfith Ngak rogon e tafney Rok ngom. Ma arame mag motoyil.”

Ba’ reb e fagar rog ni dani yo’or e n’en ni manang ni mornga’agen Got. Machane ba adag ni kiyow e ppin rok nike yim’. Ere nike fitheg ni nggu ayuweg. Gu pi e athamgil nga lanyan’ ni nge non ngak e tamachib rodaed ngeyag ninge nang fan fare machib rok Kristus man fil fapi m’ag ko gospel, gam’ing, nge tawa’ath riy.

Binem e ke rrin’. Ke thamiy ni n’en ni yibe yoeg e kaygi yo’or ngak ni nge thilyeg bukun ban’en u lane yafas rok. Ke ga’ar, “Pi motochiyel nir nge m’ag e kaygi momaw’ ngog. Ma, ku dabyog ni nggu pi’ e miligach, ma dariy e ngiyal’ ni rayog ni nggu pigpig u lane Galasia. Ma arame fitheg ni ga’ar, “Napan ni gura yim’, ma wenig mu rrin’ e murwel u temple ni pa’ag ni fan ko ppin rog nge gag ngeyag ni ni gomow biyay?”

Gub falfalen’, ni gathi gag e cha’ ni pufthin ko re mo’on ney. Machane gube fith e duwer ko murwel ko temple nifan ngak e mo’on nike yag ni nge tawfe u lane biney e yafas—nikan yibliy ko fare priesthood me thapeg e tawa’ath u temple napan ni ba’ u fayleng—machane ke siyeg e binem.

PI walageg, be pining daed Yesus Kristus ni ngad feked fare wo’ nib mat’aw ngak suled ngak e Galabthir rodaed u Tharmiy man paer rok e pi’in nib tu’uf rodaed. Be pong “moy, lakeg.”

Chiney, ni gub Presidnet ko Galasia Rok, ma gube wenig ngom e pi’in nima palog ko Galasia nge cha’an niba’ rom ni dawori gay rogon ni nge nang nikan fulweg e Galasia rok fare Tathapeg. Rrin’ e murwel nib thothup ni ngam pir’eg nem, wenig mu rrin’e chiney. Be ngoch e rran.

Gube micheg nib fos Got. Yesus e Ir Kristus. Galasia Rok nge ga’angin e gospel Rok e kan fulweg ni nge fal’eg e yafas rodaed ko falfalen’, u roy nge bin migid e yafas. Gube micheg u dakean fithngan Yesus Kristus, amen.