Wohia Esiesiefo

Mo nuanom na nkyerɛbaa adɔfo, ɔyɛ enyigye dɛ menye hom wɔ ha. Bosoom esia a abɛsen yinom mu no, hom ada m’adwen do na wɔ me mpaabɔ mu daa. Mobɔ mpaa dɛ Sunsum Krɔnkrɔn bɛma hom atse dza Ewuradze pɛ dɛ hom tse ber a menye hom rekasa sesei.

Mowɔ ntsetsee mu dɛ ɔprehyɛn datser mfe pii abɛsen no, moboaa datser bi a orutwa nan bi a no mu roporɔw. Ɔprehyɛn no nna ɔyɛ dzen. Nkyii, dza ɔsɛɛ asɛm no, hɔn a wɔkã ho reyɛ edwuma mu baako annyɛ n’afã yie, na ɔmaa datser no no bo fuwii. Ogu du retsẽatsea mu no, ɔtoow ne sekanba no a germs wɔ ho twom no. Obesii me nsa ho!

Obiara a ɔwɔ ɔprehyɛn dan no mu—gyedɛ datser no a ɔagye nsa mu no—ho boow no kɛse wɔ dza ɔnnsɛ kor wɔ datser dwuma ho. Adom ara, germs no ammbɔ me yarba. Naaso asɛm yi ada m’adwen do daapem. Dɔnhwer noara mu no, mobɔɔ anohoba maa moho dɛ dza obesi biara wɔ me ɔprehyɛn dan mu no mo bo runnfuw ma ɔntrado dabiarada. Mehyɛɛ bɔ so dɛm da no dɛ moronntow biribiara wɔ ebufuw mu—sɛ ɔyɛ sekanba anaa nsɛmfua.

Sesei mpo, mfe du mfe du pii ekyir no, ɔyɛ a modwendwen dɛ sɛ sekanba no a bɔr wɔ ho na obesii me nsa ho no, no bɔr no sen wentwiwentwi yayaw a ɔkɔ do wɔ hɛn kasaa mu na ankorankor nkitahodzi pii mu ndɛ. Enyidzi na obu yɛ dɛ ma wɔayew wɔ mber yi mu a nkyekyɛmu na ekyingye yerɛwyerɛw atahye yi.

Kasa fĩ, kasatsia, na binom ho kasabɔn adɔɔ sõ dodow. Minyim-minyimfo, amanyɛfo, hɔn a wɔgye hɛn enyi, na nkaafo a wɔwɔ nhyɛdo no ahorbahyehyɛ kɔ do daa. Modwen ho papaapa dɛ ɔyɛ dɛ ma nkorɔfo pii gye dzi dɛ oye dɛ obiara a nnye no nnyɛ adwen no, ibu no fɔ, kasa bɔn tsia no na isɛɛ ne dzin. Pii na ahoɔhar mu wɔdze anowen sɛɛ nkorɔfo hɔn dzibew.

Ebufuw nndzi nyim dabiarada. Yerɛwyerɛwyɛ mmboa obiara. Wentwiwentwi mmfa nkenyan nyiano mmba dabiarada. Ɔyɛ yaw dɛ, ɔtɔfabi a yehu wentwiwentwi su yi mpo wɔ hɛn mu. Yɛtse hɔn a wommbu hɔn hokãfo na mba, hɔn a wɔdze ebufuw keka mu dze hyɛ binom do, na hɔn a “wɔnnkasa obi ho” dze tsea ebusua mu mba. Yɛtse mbabun na mbofra a wopuw binom na edwumayɛfo a wogu hɔn anyɛnkofo enyim ase.

Mo nuanom na me nkyerɛbaa adɔfo, iyinom nnyi dɛ ɔyɛ. Yɛyɛ Jesus Christ esuafo yi, ɔsɛ dɛ yɛyɛ fasusu wɔ mbrɛ wosi nye binom nya nkitahozi—nkanka ber a hɛn adwen nnsaa. Kwan kor a ɔyɛ mberɛw a edze botum ehu Jesus Christ osuanyi nokwafo nye ayamuhyehye kwan a ɔdze hwɛ nkorɔfo nkaa no.

Agyenkwa no ma ɔdaa edzi pefee wɔ Ne nsɛm kã wɔ wiadze afamu ebien nyina. Ɔkãa dɛ, “Nhyira akã esiesiefo.”¹ “Obiara a ɔbɛpaa w’aso nyimfa mu no, dan kor no so ma no.”² Na nkyii, nyew, Ɔmaa hɛn afotu yi a ɔyɛ dzen ma hɛn mu kor biara yi: “Hom ndodɔ hom atamfo, hom nhyira hɔn a wɔkã hom ndom, hom nyɛ papa mma hɔn a wɔtan hom, na hom nsɔr mma hɔn a wobu hom enyimtsia na wɔtseetsee hom.”³

Ansaana Obowu no, Agyenkwa no maa N’Asomafo Duebien no mbrasɛm dɛ wɔndodɔ hɔnho nkorkor dɛ mbrɛ Ɔno dze dɔɔ hɔn no.⁴ Na nkyii Ɔdze sɔɔw do dɛ, “Ɔnam iyi do na nyimpa nyina bohu dɛ hom yɛ m’esuafo, sɛ hom wɔ ɔdɔ ma homho nkorkor a.”⁵

Agyenkwa n’asɛm no yɛ pefee: N’esuafo nokwafo ma ntowdo, pegya, hyɛ nkuran, na wokenyan—mbrɛ gyinabew no si yɛ dzen biara. Jesus Christ esuafo nokwafo yɛ esiesiefo.⁶

Ndɛ yɛ Mberɛnkɔnson Kwesida. Yɛreyɛ ahoboa ahyɛ dza osii wiadze mu a ohia tsitsir na ɔkrɔn kɛse a wɔakyerɛw, a ɔyɛ Jesus Christ No Werdambɔ na Wusoɛr no. Kwan papa ara yie kor a yebotum ahyɛ Agyenkwa no enyimnyam nye yɛbɛyɛ esiesiefo.⁷

Agyenkwa No Werdambɔ no ama kwan ma yebotum edzi bɔn nyina do konyim—a wentwiwentwi kã ho. Mma nnyɛ mfomdo wɔ ho: wentwiwentwi yɛ abɔnsamdze! Jesus Christ paa mu kãa dɛ “Obiara a “wentwiwentwi sunsum” wɔ no mu no nnyɛ [ne]dze, mbom “ɔyɛ abɔnsam dze, ɔno nye wentwiwentwi n’egya, na [abɔnsam] nunu nyimpa hɔn akoma ma wɔdze ebufuw dzi aper.’’⁸ Hɔn a wɔma wentwiwentwi kwan no reyɛ dza Satan yɛ ara pɛr, sɛ wonyim anaa wonnyim o. “Obiara nntum nnsom wuranom beenu.”⁹ Yennkotum dze hɛn ano nsɛm ahwe binom dze ama Satan abamba na nkyii yɛadwen dɛ yɛrosom Nyame.

Mo nuanom na nkyerɛbaa adɔfo, mbrɛ yesi hwɛ hɛn ho do yie ho hia! Mbrɛ yesi kasa kyerɛ binom na yɛkã fa hɔnho wɔ fie, asɔr, edwuma mu, na online do hia papaapa. Ndɛ, mereserɛ hɛn dɛ yɛnye nkaafo nya nkitahodzi wɔ krɔnkrɔnyɛ kwan a ɔkrɔn do. Meserɛ, tsie no ahwɛyie mu ara. “Sɛ ɔbra pa, dza ɔyɛ fɛw anaa ɔwɔ dzin pa anaa ɔsɛ nkamfo”¹⁰ a yebotum akã afa obi ho—wɔ n’enyim anaa n’ekyir—ɔno na ɔwɔ dɛ ɔyɛ hɛn nkitahodzi ho esusudze.

Sɛ awarfo bi a wɔwɔ wo ward gyaa awar, anaa asɛmpasomafo aberantsɛba anaa akatasiaba san ba fie ntsɛm, anaa abasirba bi gye ne dasegye ho kyim a, wonnhia w’atsɛmbu. Wohia dɛ wonya Jesus Christ no dɔ mapã no a ɔda edzi wɔ wo nsɛm na wo ndzeyɛɛ mu.

Sɛ nyɛnko bi a ɔwɔ social media do wɔ amanyɛsɛm adwenkyerɛ bi anaa adwenkyerɛ bi a otsia biribiara egye dzi, w’ebufuw na anoyawsɛm rommboa. Wɔreyɛ dza hom benya homho ntseasee behia wo mbɔdzembɔ, na dɛm ara na wo nyɛnko no hia.

Wentwiwentwi pia Sunsum no ma ɔkɔ—mber biara. Wentwiwentwi ma ator tsipia dɛ enye bi ridzi esi nye kwan a wɔdze siesie nsonsonee, naaso ɔnntse dɛm dabiarada. Wentwiwentwi yɛ nsanmuyi. Nsiesie yɛ nsanmuyi. Ewɔ wo pɛ dɛ ibɛsan mu eyi wentwiwentwi anaa nkabɔmu. Motu hom fo dɛ hom nsan mu nyi dɛ hom bɛyɛ esiesiefo, sesei na daapem.¹¹

Enuanom na nkyerɛbaa, yebotum asesa wiadze no ampaara—nyimpa kor na nkitahodzi kor. Osi dɛn yɛ? Ber a yɛreyɛ fasusu wɔ edze obu na kasa enyidzi mu dze rohwɛ hɔn nsonsonee a ɔwɔ hɔ ampaara mu.

Adwenkyerɛ a ɔsonson kã abrabɔ ho. Da biara menye Ewuradze asomfo a woetu hɔn ho esi hɔ yɛ edwuma a nnyɛ daa na wohu asɛm wɔ kwan kor noara do. Wonyim dɛ mepɛ dɛ metse hɔn adwenkyerɛ na nokwar atsenkã wɔ adze biara a yɛpɛnsapɛnsamu ho—nkanka ndzɛmba a ɔkã akoma ho.

Mfonyin

President Dallin H. Oaks na President Henry B. Eyring

M’apamfo adehyefo beenu yi, President Dallin H. Oaks na President Henry B. Erying yɛ fasusu mapã wɔ kwan a wɔdze da hɔn nkã-tse edzi—nkanka ber a ɔson biara dze. Wɔdze ɔdɔ mapã ma hɔn ho. Hɔn mu biara nnsusu dɛ onyim mbordo ntsi otwar dɛ ɔdze enyiber bɔ ne gyinabew ho ban. Hɔn mu biara nnkyerɛ dɛ ɔnye kor no ridzi esi. Osiandɛ ayamuyie, “Christ no dɔ mapã no” ahyɛ hɔn mu kor biara mã no ntsi ,¹² hɛn dwumadzi no Ewuradze no Sunsum na ɔma akwankyerɛ. Mbrɛ misi modɔ na mehyɛ mbarimba akatakyi beenu yinom enyimnyam!

Ayamuyie nye wentwiwentwi n’edur. Ayamuyie yɛ sunsum mu akyɛdze a ɔboa hɛn ma yɛpam honammunyi a, ɔyɛ pɛsɛankonya, otwitwa gye noho, ahantan, na enyitan. Ayamuyie nye Jesus Christ akadofo nokwafo hɔn su a ɔda edzi kɛse.¹³ Osiesiefo no su ankasa nye ayamuyie.

Sɛ yɛbrɛ hɛnho adze wɔ Nyankopɔn enyim na yɛdze hɛn akoma mu ahoɔdzen nyina bɔ mpaa a, Nyankopɔn dze ayamuyie bɛma hɛn.¹⁴

Hɔn a wɔwɔ sunsum mu akyɛdze kɛse yi wɔ penkyɛr na hɔn yamu ye. Wɔnnyɛ ahoɔyaw na wɔnnhwehwɛ hɔn nko dze. Hɔn bo nnhaw hɔn na wɔnndwen binom ho bɔn.¹⁵

Enuanom na nkyerɛbaa, Christ no dɔ mapã no nye wentwiwentwi a wɔayɛ hɛn yarba ndɛ yi ho edur. Ayamuyie ma “[yɛ]soasoa kor biara n’adzesoadze”¹⁶ kyɛn yɛbɛma adzesoadze ayɛ kɛse wɔ kor biara do. Christ no dɔ mapã ma hɛn kwan ma “[ye]gyina dɛ Nyankopɔn n’adasefo aber nyina wɔ adze nyina mu”¹⁷—nkanka wɔ gyinabew horow a ɔyɛ dzen mu. Ayamuyie ma yɛkyerɛ mbrɛ Christ mbarimba na mbaa wɔ dɛ wosi kasa na hɔn ndzeyɛɛ—nkanka ber a ogya wɔ mu.

Afei, merennkasa mfa “asomdwee a wɔhyɛ wɔ wo ho.”¹⁸ Merekasa fa mbrɛ yesi nye nkorɔfo nya nkitahodzi a ɔnye eresie ahyɛmu a iridzi sacrament no eyɛ no daa. Hom bɔ anohoba dɛ hom bɛkaa Agyenkwa no aber nyina. Gyinabew horow mu a wɔafram na wentwiwentwi ahyɛ mu mã no, mesɛrɛ hom dɛ hom nkaa Jesus Christ. Bɔ mpaa dɛ ibenya akokodur na nyansa dze akã anaa ayɛ dza Ɔbɛyɛ. Ber a yɛka Asomdwee Hen do no, yɛbɛba abɛyɛ N’esiesiefo.

Bia dɛm ber yi erodwen dɛ asɛm yi behia obi a inyim no ara yie. Bia w’enyi da do dɛ ɔbɔboa no ma onye wo edzi no yie. Mowɔ enyidado dɛ ɔbɛyɛ.! Mbom mowɔ enyidado so dɛ ibɔhwɛ wankasa w’akoma no bun mu ahwɛ sɛ ahantan anaa enyitan nketsenketse a osiw wo kwan dɛ ebɛyɛ siesiefo nnhyɛ hɔ a.¹⁹

Sɛ w’enyi aber dɛ ibɔboa ma wɔaboaboa Israel ano na erekyekyer nkitahodzi a obetsim wɔ onnyiewie mu nyina a, sesie nye ber a edze ayawdzi bɔto nkyɛn. Sesei nye ber a ibegyaa dɛ otwar dɛ ɔyɛ wo kwan nko. Sesei nye ber a ɔwɔ dɛ egyaa dɛ eyɛ ndzɛmba a ɔnnkɛma nkaafo esuro dɛ wɔbɛbɛn wo. Sesei nye ber a ɔsɛ dɛ hom sie hom ɔkõ ho akodze.²⁰ Sɛ wo kasa a edze twuw no ahorba na kasatsia ahyɛ mu mã a, sesei nye ber a edze bogu nkyɛn.²¹ Ibɔsoɛr dɛ sunsum mu Christ mu ɔbarimba anaa ɔbaa a ɔwɔ ahoɔdzen.

Temple no botum aboa hɛn wɔ hɛn ahwehwɛdze mu. Hɔ na wɔdze Nyankopɔn no tum hyira hɛn, a ɔma yetum dzi Satan, wentwiwentwi nyina do onunufo no, do konyim.²² Pam no fi wo nkitahodzi mu! Hom nhyɛ no nsew dɛ yɛkã abɔnsam n’enyim ber biara a yesiesie ekyingye anaa yɛnnhaw. Mbom, yebotum akyerɛ ehumbɔbɔr adɔyɛ a ɔyɛ Jesus Christ esuafo nokwafo no hɔn su. Esiesiefo siw abɔnsam kwan.

Dɛ yɛyɛ ɔman yi hom mma yɛmbɛyɛ nokwar kan no wɔ koko do—kan a “wonntum mmfa nnsuma.”²³ Hom ma yɛnkyerɛ dɛ asomdwee, obu kwan wɔ hɔ a wɔdze siesie nsɛm a ɔyɛ dzen na enyibue kwan wɔ hɔ a wɔdze yɛ ekyingye ho edwuma. Ber a hom kyerɛ ayamuyie dɛ Jesus Christ akadofo nokwafo no, Ewuradze bɛma hom mbɔdzembɔ no ayɛ kɛse atra hom adwen do korakora.

Asɛmpa asawu no nye asawu a ɔsõ papaapa wɔ wiadze mu. Nyankopɔn ato nsa afrɛ obiara dɛ ɔmbra Ne nkyɛn, “bibinyi na borɔnyi, akowa na fahodzinyi, ɔbarimba na ɔbaa.”²⁴ Kwan da hɔ ma obiara. Mbom kwan biara nnyi hɔ ma enyimtsiabu, afɔbɔ, anaa wentwiwentwi biara.

Mo nuanom na nkyerɛbaa adɔfo, dza ɔkrɔn no mbrɛana ɔreba ma hɔn a wɔhwer hɔn abrabɔ dze tow nkaafo no. Ndɛ moto nsa frɛ wo dɛ hwehwɛ w’osuanyiyɛ mu wɔ mbrɛ isi hwɛ nkorɔfo. Mihyira wo ma edze ayɛ nsakyer biara a obehia ama wo suban ahyɛ huam, obu na ayɛ Jesus Christ ananmusinyi kãdofo nokwafo.

Mihyira wo dɛ edze ntotɔserɛ besesa begyabegyayɛ, na ntseasee asesa ɔtan, asomdwee asesa wentwiwentwi.

Nyame tse ase! Jesus nye Christ no. Ogyina Asɔr yi ne tsir. Yɛyɛ N’asomfo. Ɔbɔboa hɛn ma yɛabɛyɛ N’esiesiefo. Megye ho dase wɔ Jesus Christ ne dzin krɔnkrɔn no mu, amen.