ຕ້ອງການຜູ້ສ້າງຄວາມສະຫງົບສຸກ

ໂດຍ ປະທານຣະໂຊ ເອັມ ແນວສັນ

ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ

ທ່ານມີອຳເພີໃຈທີ່ຈະເລືອກການຂັດແຍ້ງ ຫລື ການປອງດອງກັນ. ຂ້າພະເຈົ້າຮຽກຮ້ອງໃຫ້ທ່ານເລືອກເປັນຜູ້ສ້າງຄວາມສະຫງົບສຸກ, ດຽວນີ້ ແລະ ຕະຫລອດໄປ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຊ່າງເປັນຄວາມຊົມຊື່ນຍິນດີແທ້ໆທີ່ໄດ້ມາຮ່ວມກັບທ່ານ! ລະຫວ່າງຫົກເດືອນຜ່ານມານີ້, ທ່ານໄດ້ຢູ່ໃນຈິດໃຈ ແລະ ໃນຄຳອະທິຖານຂອງຂ້າພະເຈົ້າສະເໝີມາ. ຂ້າພະເຈົ້າອະທິຖານວ່າພຣະວິນຍານບໍລິສຸດຈະສື່ສານສິ່ງທີ່ພຣະຜູ້ເປັນເຈົ້າປະສົງໃຫ້ທ່ານໄດ້ຍິນ ຂະນະທີ່ຂ້າພະເຈົ້າກ່າວກັບທ່ານຕອນນີ້.

ລະຫວ່າງທີ່ຂ້າພະເຈົ້າຝຶກງານເປັນໝໍຜ່າຕັດດົນນານມາແລ້ວ, ຂ້າພະເຈົ້າໄດ້ຊ່ວຍໝໍຜ່າຕັດຄົນໜຶ່ງ ທີ່ກຳລັງຕັດຂາອັກເສບ ເນື້ອຕາຍເນົ່າຮ້າຍແຮງ. ການຜ່າຕັດນັ້ນຫຍຸ້ງຍາກ. ແລ້ວ, ເພື່ອເພີ່ມຄວາມຕຶງຄຽດ, ຜູ້ໜຶ່ງໃນທີມພັດປະຕິບັດງານບໍ່ດີ, ແລະ ທ່ານໝໍໄດ້ລະເບີດອາລົມດ້ວຍຄວາມໃຈຮ້າຍຢ່າງແຮງ. ໃນທ່າມກາງອາລົມສຸນສຽວ, ທ່ານໝໍໄດ້ໂຍນມີດຜ່າຕັດຂອງເພິ່ນ ທີ່ເຕັມໄປດ້ວຍເຊື້ອໂຣກ. ມີດດວງນັ້ນໄດ້ຕົກໃສ່ກົກແຂນ ຂອງຂ້າພະເຈົ້າ!

ທຸກຄົນຢູ່ໃນຫ້ອງຜ່າຕັດ—ຍົກເວັ້ນແຕ່ທ່ານໝໍທີ່ລະງັບອາລົມບໍ່ໄດ້—ເກີດຄວາມຢ້ານກົວ ເພາະການລະເມີດການຜ່າຕັດທີ່ເປັນອັນຕະລາຍນີ້. ໂຊກດີທີ່, ຂ້າພະເຈົ້າບໍ່ຕິດເຊື້ອ. ແຕ່ປະສົບການນີ້ເຮັດໃຫ້ຂ້າພະເຈົ້າຈື່ຈຳບໍ່ເຄີຍລືມ. ໃນຊົ່ວໂມງນັ້ນເອງ, ຂ້າພະເຈົ້າໄດ້ສັນຍາກັບຕົວເອງວ່າ ບໍ່ວ່າຈະມີຫຍັງ ເກີດຂຶ້ນໃນຫ້ອງຜ່າຕັດ ຂອງຂ້າພະເຈົ້າ, ຂ້າພະເຈົ້າຈະ ບໍ່ມີວັນ ສູນເສຍການຄວບຄຸມອາລົມ. ຂ້າພະເຈົ້າກໍໄດ້ສາບານວ່າ ຈະບໍ່ໂຍນສິ່ງຂອງໃດໆດ້ວຍຄວາມໃຈຮ້າຍ—ບໍ່ວ່າຈະເປັນມີດຜ່າຕັດ ຫລື ຄຳເວົ້າ.

ແມ່ນແຕ່ເວລານີ້, ຫລາຍທົດສະວັດມາແລ້ວ, ຂ້າພະເຈົ້າຍັງສົງໄສຢູ່ວ່າ ມີດຜ່າຕັດເປື້ອນດ້ວຍເຊື້ອໂຣກທີ່ຕົກໃສ່ແຂນຂອງຂ້າພະເຈົ້ານັ້ນ ມີພິດຮ້າຍແຮງກວ່າການຂັດແຍ້ງທີ່ເປັນພິດ ຊຶ່ງແຜ່ຂະຫຍາຍໃນຄຳເວົ້າຂອງຜູ້ຄົນ ແລະ ໃນຄວາມສຳພັນສ່ວນຕົວທີ່ຫລາຍເກີນໄປໃນປະຈຸບັນຫລືບໍ່. ຄວາມສຸພາບ ແລະ ຄວາມເໝາະສົມເບິ່ງຄືວ່າສູນຫາຍໄປໃນຍຸກຂອງການຫັນປ່ຽນ ແລະ ມີຄວາມບໍ່ລົງລອຍກັນຢ່າງຮຸນແຮງ.

ມີຄຳຫຍາບຄາຍ, ການຈັບຜິດ, ແລະ ການເວົ້າໃສ່ຮ້າຍຜູ້ອື່ນເປັນເລື່ອງທຳມະດາຫລາຍເກີນໄປ. ມີນັກຊ່ຽວຊານ, ນັກການເມືອງ, ນັກບັນເທີງ, ແລະ ຜູ້ມີອິດທິພົນອື່ນໆຢ່າງຫລວງຫລາຍທີ່ເວົ້າດູຖູກຫລາຍເກີນໄປ. ຂ້າພະເຈົ້າມີຄວາມເປັນຫ່ວງຫລາຍທີ່ຫລາຍຄົນເບິ່ງຄືເຊື່ອວ່າ ເປັນເລື່ອງທີ່ຍອມຮັບໃນການກ່າວໂທດ, ການໃສ່ຮ້າຍ, ແລະ ການດູຖູກ ໃຜກໍຕາມ ທີ່ບໍ່ເຫັນດ້ວຍກັບພວກເຂົາ. ຫລາຍຄົນເບິ່ງຄືກະຕືລືລົ້ນທີ່ຈະທຳລາຍຊື່ສຽງຂອງຄົນອື່ນ ດ້ວຍຄຳເວົ້າທີ່ໜ້າສົມເພດ ແລະ ແຫລມຄົມ!

ຄວາມໃຈຮ້າຍບໍ່ເຄີຍຊັກຊວນ. ຄວາມເປັນສັດຕູບໍ່ເຄີຍສ້າງໃຜ. ການຂັດແຍ້ງບໍ່ເຄີຍນຳໄປສູ່ການແກ້ໄຂທີ່ດົນໃຈ. ແຕ່ໜ້າເສຍດາຍ, ບາງຄັ້ງເຮົາເຫັນພຶດຕິກຳທີ່ຂັດແຍ້ງກັນ ແມ່ນແຕ່ຢູ່ໃນກຸ່ມຂອງເຮົາເອງ. ພວກເຮົາໄດ້ຍິນກ່ຽວກັບຜູ້ທີ່ດູຖູກຄູ່ຄອງ ແລະ ລູກໆຂອງຕົນ, ກ່ຽວກັບຜູ້ທີ່ໃຊ້ຄວາມໂກດແຄ້ນເພື່ອຄວບຄຸມຄົນອື່ນ, ແລະ ຜູ້ທີ່ລົງໂທດສະມາຊິກໃນຄອບຄົວດ້ວຍ “ການບໍ່ເວົ້ານຳ.” ພວກເຮົາໄດ້ຍິນກ່ຽວກັບຊາວໜຸ່ມ ແລະ ເດັກນ້ອຍທີ່ກັ່ນແກ້ງ ແລະ ພະນັກງານທີ່ໝິ່ນປະໝາດເພື່ອນຮ່ວມງານດ້ວຍກັນ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ມັນບໍ່ຄວນເປັນເຊັ່ນນີ້. ໃນຖານະສານຸສິດຂອງພຣະເຢຊູຄຣິດ, ເຮົາຕ້ອງເປັນຕົວຢ່າງໃນການປະຕິສຳພັນກັບຄົນອື່ນ—ໂດຍສະເພາະ ເມື່ອເຮົາມີຄວາມເຫັນທີ່ແຕກຕ່າງກັນ. ວິທີທີ່ງ່າຍທີ່ສຸດໃນການລະບຸ ຜູ້ຕິດຕາມທີ່ແທ້ຈິງ ຂອງພຣະເຢຊູຄຣິດຄື ວິທີທີ່ບຸກຄົນນັ້ນປະຕິບັດຕໍ່ຄົນອື່ນດ້ວຍຄວາມເຫັນອົກເຫັນໃຈ.

ພຣະຜູ້ຊ່ວຍໃຫ້ລອດໄດ້ກ່າວຢ່າງແຈ່ມແຈ້ງໃນການເທດສະໜາຂອງພຣະອົງແກ່ຜູ້ຕິດຕາມໃນສອງຊີກຂອງໂລກ. “ຜູ້ໃດສ້າງຄວາມສະຫງົບສຸກກໍເປັນສຸກ,” ພຣະອົງໄດ້ກ່າວ.¹ “ຖ້າຜູ້ໃດຕົບແກ້ມເບື້ອງຂວາຂອງເຈົ້າ, ຈົ່ງ ປິ່ນແກ້ມເບື້ອງຊ້າຍໃຫ້ຜູ້ນັ້ນນຳອີກ.”² ແລະ ແລ້ວ, ແນ່ນອນ, ພຣະອົງໃຫ້ຄຳຕັກເຕືອນທີ່ທ້າທາຍແກ່ເຮົາແຕ່ລະຄົນວ່າ: “ຈົ່ງຮັກສັດຕູຂອງເຈົ້າ, [ຈົ່ງໃຫ້ພອນແກ່ຄົນທີ່ປ້ອຍດ່າເຈົ້າ, ຈົ່ງເຮັດດີຕໍ່ຜູ້ທີ່ກຽດຊັງເຈົ້າ, ແລະ ອະທິຖານເພື່ອຜູ້ທີ່ໃຊ້ເຈົ້າຢ່າງໝິ່ນປະໝາດ ແລະ] ຂົ່ມເຫັງເຈົ້າ.”³

ກ່ອນການສິ້ນພຣະຊົນຂອງພຣະອົງ, ພຣະຜູ້ຊ່ວຍໃຫ້ລອດໄດ້ບັນຊາອັກຄະສາວົກສິບສອງຄົນໃຫ້ຮັກຊຶ່ງກັນແລະກັນ ດັ່ງທີ່ພຣະອົງໄດ້ຮັກພວກເພິ່ນ.⁴ ແລະ ແລ້ວພຣະອົງໄດ້ກ່າວຕື່ມວ່າ, “ຖ້າພວກເຈົ້າຮັກຊຶ່ງກັນແລະກັນ, ທຸກຄົນກໍຈະຮູ້ວ່າພວກເຈົ້າເປັນສາວົກຂອງເຮົາ.”⁵

ຂ່າວສານຂອງພຣະຜູ້ຊ່ວຍໃຫ້ລອດແມ່ນແຈ່ມແຈ້ງ: ສານຸສິດທີ່ ແທ້ຈິງ ຂອງພຣະອົງຈະເສີມສ້າງ, ຍົກລະດັບ, ໃຫ້ກຳລັງໃຈ, ຊັກຊວນ, ແລະ ດົນໃຈ—ບໍ່ວ່າສະຖານະການຈະຫຍຸ້ງຍາກປານໃດກໍຕາມ. ສານຸສິດທີ່ແທ້ຈິງຂອງພຣະເຢຊູຄຣິດເປັນຜູ້ສ້າງຄວາມສະຫງົບສຸກ.⁶

ມື້ນີ້ແມ່ນວັນອາທິດໃບຕານ. ພວກເຮົາກຳລັງຕຽມທີ່ຈະລະນຶກເຖິງເຫດການທີ່ສຳຄັນ ແລະ ຍິ່ງໃຫຍ່ທີ່ສຸດເທົ່າທີ່ເຄີຍບັນທຶກໄວ້ໃນໂລກ, ຊຶ່ງເປັນການຊົດໃຊ້ ແລະ ການຟື້ນຄືນພຣະຊົນຂອງອົງພຣະເຢຊູຄຣິດເຈົ້າ. ໜຶ່ງໃນວິທີທີ່ດີທີ່ສຸດທີ່ເຮົາສາມາດໃຫ້ກຽດແກ່ພຣະຜູ້ຊ່ວຍໃຫ້ລອດແມ່ນການກາຍເປັນຜູ້ສ້າງຄວາມສະຫງົບສຸກ.⁷

ການຊົດໃຊ້ຂອງພຣະຜູ້ຊ່ວຍໃຫ້ລອດເຮັດໃຫ້ເປັນໄປໄດ້ສຳລັບເຮົາທີ່ຈະເອົາຊະນະຄວາມຊົ່ວຮ້າຍ ທັງປວງ —ລວມທັງການຂັດແຍ້ງ. ທ່ານສາມາດແນ່ໃຈໄດ້ວ່າ: ການຂັດແຍ້ງ ແມ່ນ ຄວາມຊົ່ວຮ້າຍ! ພຣະເຢຊູຄຣິດໄດ້ປະກາດວ່າ ຜູ້ທີ່ມີ “ວິນຍານແຫ່ງການຂັດແຍ້ງ” ນັ້ນບໍ່ໄດ້ມາຈາກພຣະອົງ ແຕ່ມາຈາກ “ມານ, ຜູ້ເປັນບິດາຂອງການຂັດແຍ້ງ ແລະ [ມານ] ໄດ້ຍຸຍົງໃຈຂອງມະນຸດໃຫ້ຂັດແຍ້ງກັນດ້ວຍຄວາມຄຽດແຄ້ນ.”⁸ ຜູ້ທີ່ສົ່ງເສີມການຂັດແຍ້ງກຳລັງເຮັດແບບດຽວກັນກັບຊາຕານ, ເຖິງແມ່ນພວກເຂົາຮູ້ຈັກຫລືບໍ່ກໍຕາມ. “ບໍ່ຫ່ອນມີຜູ້ໃດເປັນຂ້າສອງເຈົ້າ ບ່າວສອງນາຍໄດ້.”⁹ ເຮົາບໍ່ສາມາດສະໜັບສະໜູນຊາຕານດ້ວຍການທຳຮ້າຍທາງຄຳເວົ້າ ແລະ ແລ້ວຄິດວ່າ ເຮົາຍັງສາມາດຮັບໃຊ້ພຣະເຈົ້າໄດ້.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ວິທີທີ່ເຮົາປະຕິບັດຕໍ່ກັນແລະກັນມີຄວາມສຳຄັນຫລາຍ! ວິທີທີ່ເຮົາເວົ້າກັບຄົນອື່ນຢູ່ທີ່ບ້ານ, ທີ່ໂບດ, ບ່ອນທຳງານ, ແລະ ອອນລາຍ ມີຄວາມສຳຄັນແທ້ໆ. ມື້ນີ້, ຂ້າພະເຈົ້າຂໍໃຫ້ເຮົາປະຕິສຳພັນກັບຄົນອື່ນໃນວິທີທີ່ສູງກວ່າ ແລະ ສັກສິດກວ່າ. ກະລຸນາຕັ້ງໃຈຟັງ. “ຫາກມີສິ່ງໃດທີ່ເປັນຄຸນນະທຳ, ງົດງາມ, ຫລື ຈາກການລາຍງານດີ ຫລື ຄວນສັນລະເສີນ”¹⁰ ທີ່ເຮົາສາມາດເວົ້າກ່ຽວກັບຄົນອື່ນ—ບໍ່ວ່າຈະເປັນຢູ່ຕໍ່ໜ້າ ຫລື ລັບຫລັງ—ນັ້ນຄວນເປັນມາດຕະຖານຂອງການສື່ສານ ຂອງເຮົາ.

ຖ້າຫາກຄູ່ສາມີພັນລະຍາໃນຫວອດຂອງທ່ານໄດ້ຢ່າຮ້າງ, ຫລື ຜູ້ສອນສາດສະໜາໜຸ່ມກັບບ້ານໄວກ່ອນກຳນົດ, ຫລື ຊາວໜຸ່ມຄົນໃດຄົນໜຶ່ງສົງໄສປະຈັກພະຍານຂອງຕົນ, ເຂົາເຈົ້າບໍ່ຕ້ອງການການຕັດສິນຈາກທ່ານ. ເຂົາເຈົ້າຈຳເປັນຕ້ອງປະສົບກັບຄວາມຮັກອັນບໍລິສຸດຂອງພຣະເຢຊູຄຣິດ ທີ່ສະທ້ອນຢູ່ໃນຄຳເວົ້າ ແລະ ການກະທຳຂອງທ່ານ.

ຖ້າເພື່ອນຄົນໜຶ່ງຢູ່ໃນສື່ສັງຄົມມີທັດສະນະທາງດ້ານການເມືອງ ຫລື ສັງຄົມທີ່ຮຸນແຮງ ຊຶ່ງລະເມີດທຸກສິ່ງທີ່ທ່ານເຊື່ອ, ການໂຕ້ຕອບຢ່າງເຈັບແສບດ້ວຍຄວາມໃຈຮ້າຍຂອງທ່ານຈະບໍ່ຊ່ວຍຫຍັງໄດ້ເລີຍ. ການສ້າງສະພານແຫ່ງຄວາມເຂົ້າໃຈ ຈະຮຽກຮ້ອງຈາກທ່ານຫລາຍ, ແຕ່ນັ້ນຄືສິ່ງທີ່ເພື່ອນຂອງທ່ານຕ້ອງການ.

ການຂັດແຍ້ງຈະຂັບໄລ່ພຣະວິນຍານໃຫ້ໜີໄປ—ທຸກຄັ້ງ. ການຂັດແຍ້ງຈະຕອກຍ້ຳຄວາມຄິດຜິດໆ ທີ່ວ່າການປະເຊີນໜ້າແມ່ນວິທີດຽວໃນການແກ້ໄຂຄວາມແຕກຕ່າງ; ແຕ່ມັນບໍ່ເຄີຍເປັນເຊັ່ນນັ້ນ. ການຂັດແຍ້ງແມ່ນທາງເລືອກ. ການສ້າງຄວາມສະຫງົບສຸກແມ່ນທາງເລືອກ. ທ່ານມີອຳເພີໃຈທີ່ຈະເລືອກການຂັດແຍ້ງ ຫລື ການປອງດອງກັນ. ຂ້າພະເຈົ້າຮຽກຮ້ອງໃຫ້ທ່ານ ເລືອກ ເປັນຜູ້ສ້າງຄວາມສະຫງົບສຸກ, ດຽວນີ້ ແລະ ຕະຫລອດໄປ.¹¹

ອ້າຍເອື້ອຍນ້ອງທັງຫລາຍ, ເຮົາສາມາດປ່ຽນແປງໄດ້ຢ່າງແທ້ຈິງ—ເທື່ອລະຄົນ ແລະ ເທື່ອລະປະຕິສຳພັນໄປ. ຈະເຮັດໄດ້ແນວໃດ? ໂດຍການສະແດງວິທີຈັດການກັບຄວາມຄິດເຫັນທີ່ແຕກຕ່າງຢ່າງຊື່ສັດ ດ້ວຍຄວາມເຄົາລົບຊຶ່ງກັນແລະກັນ ແລະ ການສົນທະນາຢ່າງມີສັກສີ.

ຄວາມແຕກຕ່າງຂອງຄວາມຄິດເຫັນແມ່ນພາກສ່ວນໜຶ່ງໃນຊີວິດ. ຂ້າພະເຈົ້າເຮັດວຽກທຸກວັນກັບຜູ້ຮັບໃຊ້ທີ່ອຸທິດຕົນຂອງພຣະຜູ້ເປັນເຈົ້າ ທີ່ບໍ່ໄດ້ເຫັນບັນຫາແບບດຽວກັນສະເໝີໄປ. ພວກເພິ່ນຮູ້ວ່າ ຂ້າພະເຈົ້າຢາກໄດ້ຍິນແນວຄິດຂອງພວກເພິ່ນ ແລະ ຄວາມຮູ້ສຶກທີ່ຊື່ສັດຕໍ່ທຸກສິ່ງທີ່ພວກເຮົາສົນທະນາ—ໂດຍສະເພາະ ເລື່ອງທີ່ອ່ອນໄຫວ.

ຮູບພາບ

ປະທານດາລິນ ເອັຈ ໂອກສ໌ ແລະ ປະທານເຮັນຣີ ບີ ໄອຣິງ

ທີ່ປຶກສາທີ່ມີກຽດຂອງຂ້າພະເຈົ້າ, ປະທານດາລິນ ເອັຈ ໂອກສ໌ ແລະ ປະທານເຮັນຣີ ບີ ໄອຣິງ, ເປັນຕົວຢ່າງໃນການສະແດງຄວາມຮູ້ສຶກຂອງພວກເພິ່ນ—ໂດຍສະເພາະເມື່ອພວກເພິ່ນມີຄວາມຄິດເຫັນທີ່ແຕກຕ່າງ. ພວກເພິ່ນເຮັດດ້ວຍຄວາມຮັກອັນບໍລິສຸດຕໍ່ກັນແລະກັນ. ທັງບໍ່ມີໃຜແນະນຳວ່າ ເພິ່ນຮູ້ດີທີ່ສຸດ ດັ່ງນັ້ນຈຶ່ງຕ້ອງຍຶດໝັ້ນກັບຄວາມຄິດເຫັນຂອງເພິ່ນ. ທັງບໍ່ມີຫລັກຖານເຖິງຄວາມຕ້ອງການທີ່ຈະແຂ່ງຂັນກັບຄົນອື່ນ. ເພາະແຕ່ລະຄົນເຕັມໄປດ້ວຍຄວາມໃຈບຸນ, “ຄວາມຮັກອັນບໍລິສຸດຂອງພຣະຄຣິດ,”¹² ການພິຈາລະນາຂອງພວກເຮົາຈຶ່ງສາມາດໄດ້ຮັບການນຳພາໂດຍພຣະວິນຍານຂອງພຣະຜູ້ເປັນເຈົ້າ. ຂ້າພະເຈົ້າຮັກ ແລະ ນັບຖືຜູ້ຊາຍທີ່ຍິ່ງໃຫຍ່ສອງທ່ານນີ້ຫລາຍທີ່ສຸດ!

ຄວາມໃຈບຸນເປັນຢາແກ້ພິດຂອງການຂັດແຍ້ງ. ຄວາມໃຈບຸນເປັນຂອງປະທານທາງວິນຍານທີ່ຊ່ວຍໃຫ້ເຮົາປະຖິ້ມຄວາມເປັນມະນຸດທີ່ມີຈິດໃຈທຳມະດາ, ຜູ້ທີ່ເຫັນແກ່ຕົວ, ປົກປ້ອງຕົວເອງ, ທະນົງຕົວ, ແລະ ອິດສາ. ຄວາມໃຈບຸນແມ່ນບຸກຄະລິກລັກສະນະຕົ້ນຕໍຂອງຜູ້ຕິດຕາມທີ່ແທ້ຈິງຂອງພຣະເຢຊູຄຣິດ.¹³ ຄວາມໃຈບຸນກຳນົດຜູ້ສ້າງຄວາມສະຫງົບສຸກ.

ເມື່ອເຮົາຖ່ອມໃຈລົງຕໍ່ພຣະພັກຂອງພຣະເຈົ້າ ແລະ ອະທິຖານດ້ວຍ ສຸດ ກຳລັງແຫ່ງໃຈຂອງເຮົາ, ແລ້ວພຣະເຈົ້າຈະປະທານຄວາມໃຈບຸນໃຫ້ເຮົາ.¹⁴

ຜູ້ທີ່ໄດ້ຮັບພອນຈາກຂອງປະທານອັນສູງສົ່ງນີ້ ມີຄວາມອົດກັ້ນ ແລະ ມີຄວາມເມດຕາ. ເຂົາເຈົ້າບໍ່ອິດສາຄົນອື່ນ ແລະ ບໍ່ເຫັນແກ່ຄວາມສຳຄັນຂອງຕົນເອງ. ເຂົາເຈົ້າບໍ່ຄຽດງ່າຍ ແລະ ບໍ່ຄິດຮ້າຍຕໍ່ຄົນອື່ນ.¹⁵

ອ້າຍເອື້ອຍນ້ອງທັງຫລາຍ, ຄວາມຮັກອັນບໍລິສຸດຂອງພຣະຄຣິດ ເປັນຄຳຕອບຕໍ່ການຂັດແຍ້ງ ທີ່ເຮັດໃຫ້ເຮົາເຈັບປວດໃນທຸກວັນນີ້. ຄວາມໃຈບຸນຜັກດັນໃຫ້ເຮົາ “ແບກຫາບພາລະຂອງກັນແລະກັນ”¹⁶ ແທນທີ່ຈະເປັນກອງພາລະໃຫ້ກັນແລະກັນ. ຄວາມຮັກອັນບໍລິສຸດຂອງພຣະຄຣິດຊ່ວຍໃຫ້ເຮົາ “ຢືນເປັນພະຍານເຖິງພຣະເຈົ້າໃນທຸກເວລາ ແລະ ໃນທຸກສິ່ງ”¹⁷—ໂດຍສະເພາະ ໃນສະຖານະການທີ່ຕຶງຄຽດ. ຄວາມໃຈບຸນຊ່ວຍໃຫ້ເຮົາສະແດງໃຫ້ເຫັນວ່າ ຊາຍ ແລະ ຍິງຂອງພຣະຄຣິດ ເວົ້າ ແລະ ປະຕິບັດແບບໃດ—ໂດຍສະເພາະ ເມື່ອມີຄວາມກົດດັນຫລາຍທີ່ສຸດ.

ຕອນນີ້, ຂ້າພະເຈົ້າບໍ່ໄດ້ກ່າວກ່ຽວກັບ “ຄວາມສະຫງົບສຸກທີ່ຕ້ອງຍຶດມາໃຫ້ໄດ້ແນ່ນອນ.”¹⁸ ຂ້າພະເຈົ້າກຳລັງກ່າວກ່ຽວກັບການປະຕິບັດຕໍ່ຄົນອື່ນໃນວິທີທີ່ສອດຄ່ອງກັບການຮັກສາພັນທະສັນຍາ ທີ່ທ່ານໄດ້ເຮັດເມື່ອທ່ານຮັບສ່ວນສິນລະລຶກ. ເຮົາເຮັດພັນທະສັນຍາວ່າ ຈະລະນຶກເຖິງພຣະຜູ້ຊ່ວຍໃຫ້ລອດ ຕະຫລອດເວລາ. ໃນສະຖານະການທີ່ຄັບຂັນ ແລະ ເຕັມໄປດ້ວຍການຂັດແຍ້ງ, ຂ້າພະເຈົ້າເຊື້ອເຊີນໃຫ້ທ່ານລະນຶກເຖິງພຣະເຢຊູຄຣິດ. ອະທິຖານຂໍໃຫ້ມີຄວາມກ້າຫານ ແລະ ສະຕິປັນຍາທີ່ຈະເວົ້າ ຫລື ເຮັດສິ່ງທີ່ພຣະອົງປະສົງ. ເມື່ອເຮົາເຮັດຕາມອົງສັນຕິລາດ, ເຮົາຈະກາຍເປັນຜູ້ສ້າງຄວາມສະຫງົບສຸກຂອງພຣະອົງ.

ໃນຈຸດນີ້ທ່ານອາດຄິດວ່າ ຂ່າວສານນີ້ຈະຊ່ວຍບາງຄົນທີ່ທ່ານຮູ້ຈັກໄດ້ແທ້ໆ. ບາງທີທ່ານອາດຫວັງວ່າ ມັນຈະຊ່ວຍໃຫ້ເຂົາເຈົ້າດີກັບທ່ານຫລາຍຂຶ້ນ. ຂ້າພະເຈົ້າຫວັງວ່າຈະເປັນເຊັ່ນນັ້ນ! ແຕ່ຂ້າພະເຈົ້າກໍຍັງຫວັງວ່າ ທ່ານຈະເບິ່ງເຂົ້າໄປເລິກໆໃນໃຈ ຂອງທ່ານ ເພື່ອເບິ່ງວ່າ ມີເສດຂອງຄວາມທະນົງໃຈ ຫລື ຄວາມອິດສາ ທີ່ກີດກັນ ທ່ານ ຈາກການກາຍເປັນຜູ້ສ້າງຄວາມສະຫງົບສຸກຫລືບໍ່.¹⁹

ຖ້າຫາກທ່ານຈິງຈັງກັບການຊ່ວຍເຕົ້າໂຮມອິດສະຣາເອນ ແລະ ກ່ຽວກັບການສ້າງຄວາມສຳພັນທີ່ຈະຄົງຢູ່ຕະຫລອດຊົ່ວນິລັນດອນ, ບັດນີ້ ເຖິງເວລາແລ້ວທີ່ຈະປະຖິ້ມຄວາມຂົມຂື່ນ. ບັດນີ້ ເຖິງເວລາແລ້ວທີ່ຈະຢຸດຕິການຢືນຢັນການໃຫ້ເປັນໄປຕາມທາງຂອງທ່ານ ໂດຍບໍ່ສົນທາງອື່ນ. ບັດນີ້ ເຖິງເວລາແລ້ວທີ່ຈະຢຸດເຮັດໃຫ້ຄົນອື່ນລະວັງຕົວຄືກັນກັບຍ່າງຢູ່ເທິງເປືອກໄຂ່ ເພາະຢ້ານຈະເຮັດໃຫ້ທ່ານບໍ່ພໍໃຈ. ບັດນີ້ ເຖິງເວລາແລ້ວທີ່ຈະຝັງອາວຸດແຫ່ງສົງຄາມຂອງທ່ານ.²⁰ ຖ້າຫາກຄຳເວົ້າຂອງທ່ານເຕັມໄປດ້ວຍຄຳເວົ້າດູຖູກ ແລະ ຂໍ້ກ່າວຫາ, ບັດນີ້ ເຖິງເວລາແລ້ວທີ່ຈະປະຖິ້ມມັນ.²¹ ທ່ານຈະລຸກຂຶ້ນເປັນຊາຍ ແລະ ຍິງທີ່ເຂັ້ມແຂງທາງວິນຍານຂອງພຣະຄຣິດ.

ພຣະວິຫານສາມາດຊ່ວຍເຮົາໃນການສະແຫວງຫາຂອງເຮົາ. ໃນນັ້ນເຮົາໄດ້ຮັບພະລັງຈາກພຣະເຈົ້າ, ເພື່ອເຮົາຈະສາມາດເອົາຊະນະຊາຕານ, ຜູ້ຍຸຍົງໃຫ້ເກີດການຂັດແຍ້ງ ທັງໝົດ.²² ຂັບໄລ່ມັນອອກໄປຈາກຄວາມສຳພັນຂອງທ່ານ! ໃຫ້ສັງເກດເຫັນວ່າ ເຮົາໄດ້ຕຳນິຜູ້ປໍລະປັກທຸກຄັ້ງທີ່ເຮົາແກ້ໄຂຄວາມເຂົ້າໃຈຜິດ ຫລື ປະຕິເສດທີ່ຈະຂຸ່ນເຄືອງ. ກົງກັນຂ້າມ, ເຮົາສາມາດສະແດງຄວາມເມດຕາອັນອ່ອນໂຍນ ທີ່ເປັນບຸກຄະລິກລັກສະນະຂອງສານຸສິດທີ່ແທ້ຈິງຂອງພຣະເຢຊູຄຣິດ. ຜູ້ສ້າງຄວາມສະຫງົບສຸກຈະຂັດຂວາງຜູ້ປໍລະປັກ.

ຂໍໃຫ້ເຮົາຈົ່ງເປັນຜູ້ຄົນທີ່ກາຍເປັນແສງສະຫວ່າງທີ່ແທ້ຈິງຢູ່ເທິງຄ້ອຍພູ—ເປັນແສງສະຫວ່າງທີ່ “ຈະຖືກບັງລັບໄວ້ບໍ່ໄດ້.”²³ ຂໍໃຫ້ເຮົາຈົ່ງສະແດງໃຫ້ເຫັນວິທີທີ່ມີຄວາມສະຫງົບສຸກ ແລະ ມີຄວາມເຄົາລົບໃນການແກ້ໄຂບັນຫາທີ່ຊັບຊ້ອນ ແລະ ວິທີທີ່ໃຫ້ຄວາມຮູ້ ເພື່ອແກ້ໄຂຄວາມເຫັນທີ່ແຕກຕ່າງກັນ. ເມື່ອທ່ານສະແດງໃຫ້ປະຈັກເຖິງຄວາມໃຈບຸນໃນການເປັນສານຸສິດທີ່ແທ້ຈິງຂອງພຣະເຢຊູຄຣິດ, ພຣະຜູ້ເປັນເຈົ້າຈະຂະຫຍາຍຄວາມພະຍາຍາມຂອງທ່ານເກີນກວ່າທີ່ທ່ານຈະສາມາດຈິນຕະນາການໄດ້.

ດາງແຫພຣະກິດຕິຄຸນແມ່ນໃຫຍ່ທີ່ສຸດໃນໂລກ. ພຣະເຈົ້າໄດ້ເຊື້ອເຊີນ ທຸກຄົນ ໃຫ້ມາຫາພຣະອົງ, “ດຳ ແລະ ຂາວ, ຂ້າທາດ ແລະ ເປັນອິດສະລະ, ຊາຍ ແລະ ຍິງ.”²⁴ ຍັງມີບ່ອນວ່າງສຳລັບທຸກຄົນ. ເຖິງຢ່າງໃດກໍຕາມ, ຈະ ບໍ່ ມີບ່ອນວ່າງສຳລັບອະຄະຕິ, ການກ່າວໂທດ, ຫລື ການຂັດແຍ້ງໃດໆ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ສິ່ງດີໆທີ່ສຸດຍັງບໍ່ມາເຖິງເທື່ອ ສຳລັບຜູ້ທີ່ໃຊ້ຊີວິດຂອງເຂົາເຈົ້າເພື່ອເສີມສ້າງຄົນອື່ນ. ມື້ນີ້ຂ້າພະເຈົ້າຂໍເຊື້ອເຊີນທ່ານໃຫ້ກວດສອບການເປັນສານຸສິດຂອງທ່ານ ໃນສະພາບການຂອງວິທີທີ່ທ່ານປະຕິບັດຕໍ່ຄົນອື່ນ. ຂ້າພະເຈົ້າອວຍພອນທ່ານໃຫ້ທຳການປັບປ່ຽນທີ່ຈຳເປັນ ເພື່ອວ່າພຶດຕິກຳຂອງທ່ານຈະມີກຽດ, ໜ້ານັບຖື, ແລະ ເປັນຕົວແທນຂອງຜູ້ຕິດຕາມທີ່ແທ້ຈິງຂອງພຣະເຢຊູຄຣິດ.

ຂ້າພະເຈົ້າອວຍພອນທ່ານໃຫ້ປ່ຽນການຜິດຖຽງເປັນຄວາມກະລຸນາ, ການກຽດຊັງເປັນຄວາມເຂົ້າໃຈ, ແລະ ການຂັດແຍ້ງເປັນຄວາມສະຫງົບສຸກ.

ພຣະເຈົ້າຊົງພຣະຊົນຢູ່! ພຣະເຢຊູຄືພຣະຄຣິດ. ພຣະອົງເປັນພຣະປະມຸກຂອງສາດສະໜາຈັກນີ້. ພວກເຮົາແມ່ນຜູ້ຮັບໃຊ້ຂອງພຣະອົງ. ພຣະອົງຈະຊ່ວຍໃຫ້ເຮົາກາຍເປັນຜູ້ສ້າງຄວາມສະຫງົບສຸກຂອງພຣະອົງ. ຂ້າພະເຈົ້າເປັນພະຍານໃນພຣະນາມອັນສັກສິດຂອງພຣະເຢຊູຄຣິດ, ອາແມນ.