Naʻe Feʻunga Pē ʻa e Kiʻi Meʻa Siʻi Naʻá ma Maʻú

Naʻe ofi mai e Kilisimasí, ka ʻi he taʻú ni, he ʻikai ke ma fakamanatu ia ʻaki ha meʻatokoni pe ngaahi meʻa vaʻinga. Ne mālōlō e tangataʻeikí, pea kuo kamata ke maʻu e kiʻi vāhenga fakauitou ʻo e fineʻeikí, mo ha kiʻi paʻanga totongi fale.

Naʻá ma ʻi he loki talanoa ʻo homa kiʻi fale nofo-totongí ʻi Lio ti Sinelo, ʻi Palāsila. Naʻe lōngonoa e lokí. Fakafokifā pē kuó ma fanongo ki ha meʻa ʻo hangē naʻe ʻi ai ha taha ʻi he tuʻafalé.

Ne u tuʻu hake ʻo sio ki tuʻa he puipui ʻo e matapā sioʻatá, he ne u lava pē ʻo sio mei ai ki he hūʻanga ki homa falé. Ne u sio atu ki ha fefine tukuhausia. Naʻá ne toʻotoʻo ha fanga kiʻi tangai pea naʻe mahaehae hono valá. Ne u siofi ia ʻi ha ngaahi momeniti siʻi, he naʻá ku fie ʻilo pe ko e hā ʻene meʻa ʻe faí. Naʻá ne fakaava hake ha kiʻi tangai pepa ʻe taha, toʻo ki tuʻa ha fanga kiʻi pisikete ʻo kamata kai. Taimi siʻi pē naʻá ne fakaava hake mo ha kiʻi tangai ʻe taha naʻe ʻi ai ha fanga kiʻi sēniti ʻo kamata ke ne lau.

Naʻe ongo ʻeni ki hoku lotó, peá u lea leʻosiʻi atu pē ki heʻeku faʻeé, “ʻOku ʻi ai ha fineʻeiki toulekeleka ʻi tuʻa. Haʻu ʻo sio.” Naʻe sio ki ai ʻeku faʻeé pea naʻe ongo foki ki hono lotó. Naʻá ne kole mai ke u ʻomai ʻa e kapa naʻe tauhi ai haʻama kiʻi paʻanga siʻisiʻi, pea naʻá ne hū fakalongolongo ki tuʻa mei homa lokí ʻo laku hifo e paʻanga pepá mei he matapā sioʻata ʻi he holó.

Ne u tuʻu pē homa veʻe matapā sioʻatá ʻo sio ʻi he ngangana hifo ʻa e paʻanga pepá. Naʻe sio e fineʻeiki toulekeleká ki he tō hifo ʻa e laʻi paʻanga ʻe taha mo e taha mo e taha. Naʻá ne sio ki he ngaahi matapā sioʻata ʻo e falé ʻo feinga ke ʻiloʻi pe ko e haʻu ʻa e paʻangá mei fē. Ne mapuni kotoa pē ia. Naʻe hoko leva ha meʻa fakaʻofoʻofa. Naʻá ne hanga hake ki he langí pea fakamafao atu hono ongo nima kuo mingimingí. Naʻá ne hili leva hono ongo nimá ʻi hono fatafatá ʻo fakamālō ʻi he meʻaʻofa kuó ne maʻú.

Naʻá ma tangi loto he fakamālō mei he tuʻa puipui ʻo e matapā sioʻatá ʻi he feʻunga ʻa e kiʻi meʻa siʻi naʻá ma maʻú ke fiefia ai ha taha naʻe toe siʻisiʻi ange ʻa e meʻa ia naʻá ne maʻú.