Ko Ha Koloa Ne Fuoloa ʻEne Molé

Ne ʻikai fuʻu fuoloa mei he taimi ne u tangutu ai ʻo tatali ki he polokalama kamata ʻo e fakataha lakanga fakataulaʻeikí, mo e pehē mai ʻe hoku hoa faiako fakaʻapí ko ʻeku folofolá ē ʻoku ʻi he feituʻu naʻe tauhi ai e ngaahi meʻa mole mo maʻu homau uōtí.

Ka ʻi heʻeku sio ki he tafaʻakí, naʻá ku kei maʻu pē e ngaahi folofola foʻou ne kumi mai ʻe hoku uaifí. Ka ko ʻeku ngaahi folofola motuʻá, naʻe ʻi he kato ia ofi ki ha sea ʻi homau loki ʻi muʻá. Ne u puputuʻu.

Ne fehuʻi mai ʻe hoku hoa faiako fakaʻapí, “Ko e hā e mataʻitohi kamata ho hingoa lotó?”

Ne u pehē ange, “Ko e R.”

Naʻá ne tali mai, “Ko e hingoa ia ʻoku ʻasí. Te u ʻalu ʻo ʻomai.”

Naʻá ne foki mai hili ha kiʻi taimi siʻi ʻo ʻomai kiate au ha Tohi Tapu ʻoku ʻasi tamatemate lanu koula hoku hingoá ʻi he tafaʻaki kimuʻá. Ne u fakatokangaʻi vave ia. Ne u feinga ke fakaava e takafi lanu ʻuliʻuli motuʻá. Ne ava hake e tohí ʻi he peesi ʻuluakí, ʻa ia naʻe ʻi ai ha tohi ʻi he tohinima ʻa ʻeku tamaí. Ne u lolotonga pukepuke ʻa e Tohi Tapu ne ʻomai kiate au ʻe heʻeku ongomātuʻá ʻi hoku taʻu 12.

Ne u lolotonga nofo eni ʻi ʻAlesona, pea ko e taimi fakamuimui pē ne u sio ai ki he Tohi Tapú, ʻi heʻeku kei nofo ʻi ʻIutaá, ʻo teuteu ki heʻeku ngāue fakafaifekaú. Ne u ʻalu mo ʻeku ngaahi folofola ne u fakaʻaongaʻi ʻi he seminelí ki he malaʻe ʻo e ngāue fakafaifekaú kae tuku e Tohi Tapu ko ʻení ʻi ʻapi. Ne ngali kehe kiate au ʻa e lava ke haʻu ʻeku Tohi Tapu motuʻá, hili ha taʻu ʻe 30, mei he ʻapi ʻo ʻeku ongomātuʻá ʻi ʻIutaá ki he fale lotu ʻo e uooti ne u ʻi ai ʻi ʻAlesoná.

Ko tokotaha ʻeku tamaí naʻe ako ki he ngaahi folofolá, pea naʻá ne fakatō loloto ʻiate au heʻeku kei siʻí ha holi ke lau mo ako e folofola ʻa e ʻOtuá. Naʻe ʻomai ʻe ha konga ʻo e tohi naʻá ne fai ʻi heʻeku Tohi Tapú ha faleʻi kiate au ko e puipuituʻa ki heʻeku maʻu ʻa e Lakanga Taulaʻeiki Faka-ʻĒloné:

“ Tēvita, ʻi hoʻo aʻusia ko ʻeni ho taʻu 12, te ke maʻu e lakanga fakataulaʻeiki ʻo ʻĒloné ko ha tīkoni pea hoko ko ha tamaioʻeiki ʻa e ʻEikí, ʻo hangē ko ia ne maʻu ʻe he tokotaha ʻoku fakahingoa koe ki aí, ko e tuʻi ko Tēvitá. Naʻe tāpuakiʻi ia ʻe he ʻOtuá ʻi he taimi naʻá ne ʻulungāanga fakapotopoto aí.

“Pea ʻe hoko pehē pē kiate koe. Kapau te ke ʻulungāanga fakapotopoto mo muimui ki he ʻEikí, te Ne faitāpuekina koe pea uiuiʻi koe ke ngāue Maʻana.

“Ke ke mālohi mo faitotonu, ʻe hoku Foha. Ako faivelenga ʻa e tohí ni, pea te ne ʻoatu kiate koe ha mālohi.”

ʻOku mahuʻingamālie tatau pē ʻa e ngaahi lea ʻa ʻeku tamaí kiate au he taimí ni ʻo hangē ko ia he taʻu ʻe 30 kuo hilí, kae mahalo ʻoku toe lahi ange he taimí ni. ʻOku ou fakamālō he toe maʻu ʻa e meʻaʻofa ko ʻeku ʻuluaki Tohi Tapú mo e faleʻi taʻe hano ngataʻanga ʻa ʻeku tamaí.