He ʻIkai pē Ke u Toe ʻAlu Au ʻo Faiako Fakaʻapi!

Ne fuʻu fiefia hoku foha taʻu 15 he ngaahi meʻa lahi ne hoko heʻene moʻuí—ngaahi kaungāmeʻá, papa sikeití, ʻū kaá, pea mo ʻene ngofua akoako fakaʻulí. Kae ʻikai foki ke ne fiefia ʻi hono fatongia ko e faiako fakaʻapí.

Ne u loto mamahi he Sāpate ʻe taha heʻene pehē mai, “ ʻOku fakamole taimi ʻa e faiako fakaʻapí. Te u tā ki heʻeku ʻetivaisá ʻo tala ange ke ne kumi ha taha kehe koeʻuhí he ʻikai pē ke u toe ʻalu au ʻo faiako fakaʻapi!”

Ka kimuʻa ke ne maʻu e faingamālie ke kumi e hingoa ʻo ʻene ʻetivaisa lakanga fakataulaʻeikí ʻi he tohi tuʻasila ʻa e uōtí, ne tatangi e telefoní. Ko hono hoa faiako fakaʻapi foʻou kuo toki vahe maí, ko Misa Peni Sakou, ʻa ia ne tō faka-Siamane mai ʻene leá.

Naʻá ne pehē mai, “Topi, ʻoku ou lele atu he taimí ni ke ta ō. Ko hoku hoa foʻoú koe, pea ne u fakakaukau ke ta fai ha ngaahi ʻaʻahi. Sai ia? ʻOku lelei. Nofo ā ē!

Ngalingali ne ueʻi fakalaumālie ʻa Misa Sakou ke ʻoua naʻa tatali ki ha tali, pe ko ʻene pehē ko e fakalongolongo ʻa Topi heʻene ʻohovalé ʻoku ʻuhinga pē ia ʻoku loto ki ai. Tatau ai pē, hili e miniti ʻe 10 ne fai mai ha tukituki he matapaá. Kimuʻa ke fakafepaki ʻa Topí, ne fusi ia ki tuʻa ʻe ha tangata fofonga fiefia peá ne ʻoange ha fuhinga kī meʻalele ki hono nimá.

Ne pehē ange ʻe Misa Sakou,“Ko Topi ho hingoá? Fakalata ke ta feʻiloaki. Topi, ko e ʻaho Sāpate ʻeni, pea ko ʻeku ngāue maʻuʻanga moʻuí ko e siviʻi e ngaahi kā ke lelé. ʻOku ou pehē ʻoku ʻikai ke fuʻu sai ke u fakaʻuli he Sāpaté he ko ʻeku ngāué ia. Te ke lava nai ʻo tokoni mai? ʻOku ʻi ai haʻo ngofua fakaʻuli? Te ke lava nai ʻo fakaʻuli ki heʻeta ngaahi faiako fakaʻapí?”

Ne fakamanga e ngutu ʻo Topí heʻene ʻohovale he sio ki he kā sipoti ʻo e mōtolo fakamuimui tahá ʻa ia naʻe sivi ʻe Misa Sakou he uike ko iá. Naʻá ne fakatokangaʻi vave hake ne meimei mole ʻa e foʻi faiako fakaʻapi fakangalongataʻa ko iá.

Ne na foki mai hili ha kiʻi taimi nounou, pea fakahā ange ʻe Topi kia Misa Sakou ha ngaahi nāunau fakakomipiuta foʻou, peá na talanoa ki he ngaahi huʻunga fakamuimui taha ʻi he tekinolosiá. Ne pehē ange ʻe Misa Sakou he ʻai ke ne mavahé, ʻʻ ʻOku ou pehē ʻe lelei ke ta fakaʻosi ʻeta faiako fakaʻapí he Sāpate kahaʻú. Ko e hā hoʻo fakakaukaú, Topi?”

Ne pehē hake e kiʻi tehina ʻo Topí, “ ʻE lava ke u faiako fakaʻapi mo au?”

Ne ʻikai ke toe fakatuotuai ʻa Topi ki he taimi faiako fakaʻapi mo Misa Sakoú. Hili e ngaahi māhina siʻi, ne ʻikai ke toe hoko e faiako fakaʻapí ko e faingamālie pē ki ai ke fakaʻuli he ngaahi kā fakaʻofoʻofá. Ka kuo hoko ʻa Misa Sakou ko e kaungāmeʻa moʻoni, pea kuo ako ʻa Topi ki hono mahuʻinga ʻo e faiako fakaʻapí ki he ngaahi fāmili ne na ʻaʻahi ki aí.

Ne faifai pea foki ʻa Misa Sakou mo hono uaifi ko Pāpulaá ki Siamane. ʻOku mate homau siteikí he ʻofá kiate kinaua. He ʻikai ngalo ʻiate au ʻa e faʻifaʻitakiʻanga mālohi ʻo e ʻofá ne fai ʻe Misa Sakou ki ha talavou ne fie maʻu tokoni ki heʻene fakamoʻoni ki he faiako fakaʻapí.