Sa Unsang Paagi Makatabang ang Templo

Ang matag ginikanan nasayud nga ang pagpadako og mga bata nagdala og wala paabuta nga mga hagit ug panalangin. Ang akong bana ug ako nakadiskobre nga kon among ikonsiderar ang mahangturon nga panglantaw sa buluhaton sa pagkaginikanan, bation namo ang tumang gibug-aton sa responsibilidad kauban sa dakong paglaum.

Dayag lang, ang Ginoo mihatag kanamo og espirituhanong mga gasa sa pagpasayon sa among mga palas-anon. Alang sa among pamilya, ang pinakamahinungdanon niadtong mga espirituhanong mga gasa mao ang pag-adto sa balay sa Ginoo sa pagdawat sa Iyang tabang samtang ang among mga anak nagtubo ug ang kinabuhi nag-anam og kakomplikado. Kami nakadiskobre nga mahimo namong dalhon ang piho kaayo nga mga problema ngadto sa Ginoo sa Iyang templo.

Samtang nahimong mga tin-edyer ang among mga anak among namatngunan nga sila adunay potensyal nga makahimo og seryusong mga sayop. Tingali ang labing makahahadlok nga kamatuoran mao nga nahimo na namo ang tanan nga among nahibaloan kon unsaon sa pagbuhat, bisan pa ang mga timailhan sa peligro anaa sa among atubangan.

Dayon among nadiskobrehan nga ang pagsimba sa templo mahimo nga importanting elemento sa among paningkamot sa pagtabang sa among mga anak nga mopili sa matarung. Among nakaplagan ang talagsaong kusog ug panalangin gumikan sa pagtambong sa templo diha sa espiritu sa pagpuasa ug pag-ampo alang sa among mga anak. Nag-ampo kami alang sa usa ka pagbati sa personal nga pagpangandam, alang sa tukma nga panghunahuna ug kinaiya sa dili pa mosulod sa templo. Kon angay, ang atong mga pagpamalandong samtang anaa sulod sa templo itumong mahitungod sa atong mga buluhaton isip mga ginikanan ug mahitungod sa mga panginahanglan nianang partikular nga bata.

Usahay ang mga tubag dali kaayong moabut ug tin-aw. Sa unang higayon nga nahitabo kini, kami tingali mikonsiderar niini nga sulagma lang. Apan sa wala madugay naklaro nga kami sa tinuod apil sa proseso sa pagpadangat sa mga panalangin sa langit.

Ang mga tubag usahay moabut sa porma sa katawhan kinsa miimpluwensya sa kinabuhi sa atong mga anak, sama sa usa ka mapinanggaon nga bishop kinsa mitabang sa among anak nga babaye nga nag-college sa panahon sa malisud nga krisis. Ang ubang mga bata napanalanginan sa samang paagi. Ang matag usa adunay kaugalingon niyang kabubut-on, ug sila mahimong mopili sa dili pagsanong sa pamaagi nga atong gilauman, apan kami mibati nga ang among pagserbisyo sa templo nagdala sa tabang gikan sa langit diha sa kinabuhi sa among mga anak.

Ang among mga benipisyo gumikan sa pagsimba sa templo milapas pa sa pagpanalangin sa among mga anak. Sa usa ka okasyon, ang akong bana misagubang og usa ka makapalibug nga problema sa iyang pangempleyo diin siya mihukom sa pagdala niini ngadto sa templo. Niana nga adlaw, ang Ginoo mipanalangin kaniya uban sa pagdasig nga ang usa ka piho nga kasulatan maoy tubag sa pangutana.

Sa pag-abut sa balay, mahinamon siyang miabli sa mga kasulatan ug, sa iyang kalipay, nakakaplag og tabang sa iyang problema. Kini nga kasinatian miabli og bag-ong pag-apply sa mga kasulatan. Ang Ginoo mahimong makigsulti sa Iyang mga anak pinaagi sa pagpahinumdom kanato sa mga kasulatan nga naglangkob og mga tubag sa atong mga hagit. Nagpasalamat kami niini nga baruganan nga among nakat-unan didto sa templo.

Sa kalibutan diin ang kadautan nagpasulabi ug diin si Satanas gawasnon sa paggamit sa iyang gahum sa pagguba sa mga panimalay, makahupay nga masayran nga kita mahimong moadto sa balay sa Ginoo ug makapangita og giya. Dili igsapayan kon unsa nga mga hagit ang atong giatubang samtang nag-atiman kita sa atong mga pamilya, makakaplag kita og kalipay kon kita magtinguha sa santuwaryo ug kalinaw sa templo.