Ang Among Kaminyoon sa Templo Angay Lang sa Bisan Unsa nga Bugti

Wala kini mahitabo hangtud ang una nakong panimpalad sa negosyo naalkansi ug ang ikaduha napakyas usab nga ako nakapangutana kon makahimo ba ako sa pagdala sa akong pangasaw-unon, si Beny, ngadto sa templo. Nakadungog kami nga ang pag-adto usa ka pagsulay sa pagtuo, apan sa dihang among gihimo nga tumong ang pagminyo sa templo, wala kami ideya kon hangtud kanus-a masulayan ang among hugot nga pagtuo.

Si Beny ug ako nagkita sa among yutang natawhan sa Panama human sa pagserbisyo og misyon. Tungod sa mga balaod sa Panama, ang mga magtiayon nga gustong magminyo sulod sa templo kaslon una sa sibil sa dili pa mobiyahe sa pinakaduol nga templo, sa Templo sa Guatemala City, Guatemala. Dako kini og gasto ug malisud nga biyahe, apan ang pagka-sealed usa ka panalangin nga dili mahimong wala kanamo.

Sa adlaw nga kini akong giplano, nawad-an ako og trabaho. Wala mabalaka, mihukom ako nga mangwarta pinaagi sa mga pag-bus tour. Ang akong bus naguba sa una nakong gabii. Nabalaka apan determinado, sunod nakahukom ko sa pagpamiligya og T-shirt. Nianang pagkabuntag miadto ako aron kuhaon ang mga t-shirt gikan sa kompanya, akong nahibaloan nga ang building nahurot og kaugdaw sa milabay nga gabii. Ingon og ang akong mga paglaum nawala usab sama sa aso.

Pipila na lamang ka bulan ang nahibilin sa dili pa moabut ang sunod nga eskedyul sa pagbiyahe paingon sa templo, sa gihapon niini nga punto, ang matag paningkamot nga akong gihimo nga makakwarta misangput sa grabeng kapakyasan. Akong gitalikdan ang nagkaguba nga paglaum ug miadto sa pagpangita ni Beny.

“Wala akoy bisan gamay natigom,” ako siyang giingnan. “Tingali dili ka angay makigminyo kanako.”

“Kon magminyo man ako tungod sa kwarta, minyo na unta ko,” siya miingon. “Apan dili ako makigminyo tungod sa kwarta. Makigminyo ko nimo tungod kay nahigugma ko nimo.”

Sinugdanan kadto sa kausaban. Among gibati nga nakapasar kami sa importante nga pagsulay. Samtang mipadayon kami uban sa hugot nga pagtuo, ang mga pultahan nagsugod sa pag-abli. Nakatrabaho ko sa pagpanghimo og furniture, bisan og ang sweldo dili igo sa among panginahanglan. Dayon ang usa ka buotan nga bishop mitanyag sa pagtabang kanamo sa among plite sa bus. Makapaikag man ang iyang tanyag, wala kami mobati nga husto kini. Among tuyo nga makabarug sa kaugalingon. Apan nakita ang tinud-anay niyang tinguha sa pagtabang, siya hinoon among gihangyo kon makahatag ba siya og trabaho ni Beny. Siya mihimo.

Human makaangkon og igong kwarta sa sa pagbiyahe ngadto sa templo, nagpakasal kami sa sibil ug sa katapusan mibiyahe padulong sa Guatemala kauban sa 10 ka laing mga miyembro sa Simbahan. Apan ang among pagsulay wala pa mahuman.

Ang lapad kaayo nga welga sa transportasyon mipahunong kanamo dapit sa may utlanan sa Costa Rica. Human sa paghulat og duha ka adlaw, ang among driver mihukom sa pagbalik. Apan si Beny ug ako, kauban sa duha ka brother ug usa ka magtiayon, mihukom sa dili pagkawala sa paglaum. Human magtan-aw sa among bus nga mituyok ug mibiya kanamo, nanglakaw kami ngadto sa Costa Rica. Padayon kaming naglakaw, nangatulog sa mga landong sa daplin sa karsada, hangtud nga miabut kami sa utlanan sa Nicaragua. Gikan didto nahimo namo ang pagsakay og taxi ngadto sa ulohan nga siyudad, diin nakapalit kami og ticket sa bus padulong sa utlanan sa Honduran. Duha ka adlaw—ug duha pa ka bus ang sakyan—sa wala madugay miabut na gyud kami sa templo. Mga hugaw kami ug gipangkapoy, ug migasto og sobra kay sa among naplano, apan kami malipayon.

Sa pagkasunod adlaw, human sa tanan namong mga pagsulay ug kalangay, sa katapusan na-sealed kami sa kahangturan isip bana ug asawa. Ang among kalipay—napuno igo sa among kahago, sa paghulat, ug sa mga—kabalaka!

Dili tanan nga magminyo sa templo magsagubang og ingon nga mga hagit, apan alang kang Beny ug kanako (ug sa uban nga miadto sa templo dungan kanamo), kini nga mga kasinatian mga proseso sa paghashas. Usa kadto sa pinakatalagsaong mga kasinatian sa akong kinabuhi.

Kon ang among tumong sa pagminyo sulod sa templo alang lamang sa kalibutanong paghigugma, dili unta namo kadto mahimo. Apan tungod kay kami mituo sa gahum sa priesthood sa pag-seal nga gipahiuli sa atong panahon, wala kami mohunong, nasayud nga ang kaminyoon sa templo—alang niini nga panahon ug sa kahangturan—igo sa bisan unsang sakripisyo nga among buhaton.