En̄taan eo An Ekapidodoik Men ko Ad

Āinwōt juon nōōj ilo iunit eo an jikin kejparok nin̄nin̄ ej kab ļotak, Iaar kejaprok rinan̄inmej ro, jet iien ro reddik tata, nin̄nin̄ ko. Juon bon̄ kar jitōn̄ Eō n̄an juon ļaddik jidikdik eaar m̧ōkaj an ļotak 17 wiik m̧oktaļo̧k im eaar eddo in juon bauun (0.5kg). Pā ko pein raar aidiik, pā ko neen reddik enan̄in kar jon̄an wōt addi in peiū, im lo̧o̧bdeen neen renan̄in kar dettan in wōt addi lep in peiū. Kōnke kōn jorrān in an menono, taktō ro raar jab kōtmene e n̄an mour ilo bon̄ eo.

Juon ikōōn̄ eaar pād ilo aolep iunit eo ke niknik eo ej kab ļotak ej pukōt kilen an mour. Ewōr juon kar ļapļo̧k in ikūm̧kūm ippān aolep, eļaptata nōōj eo an nin̄nin̄ eo, im bon̄ eo eaar n̄a. Ro jinen im jemen raar pād ippān enan̄in aolepen raan eo, ak raar m̧ōk. Jinen eaar rool ļo̧k n̄an ruum̧ eo an n̄an an aikuj in kakkūje.

Ruum̧ eo make an nin̄nin̄ eo eaar wōr ie juon isolette (incubator), kein lale ko, ventilator, im IV baam̧ ko, ko raar kōm̧m̧an bwe en mour wōt. Kōnke eaar lukkuun in nan̄inmej eaar aikuj lukkuun in kejparok e, kar jitōj Eō n̄an ejjeļo̧k bar rinan̄inmej bon̄ōn jab eo. Iaar aikuj in pād iturin ilo aolepen bon̄ōn eo, bouk kōn kauno ko, lale, kōm̧adm̧ōd ko, im teej ko.

Ke bon̄ eo eaar wōnm̧aanļo̧k wōt, Iaar ļōmņak ekōjkan Aō naaj kar en̄jake eļan̄n̄e Iaar eo jinen. Rub bōro eo epen an naaj kar jako.

Iaar kōmeraik aō kwaļ turin mejān, kar jibwe pā ko pein im nee ko neen reddik, kar kōkōm̧anm̧ōn ukukōte im kajim̧we ilo juon būļan̄kōj emeoeo ekāāl. Iaar ļōmņak ta Imaron̄ bar kōm̧m̧an n̄an rinan̄inmej eo aō edik. Ta eo jinen enaaj kar kōm̧m̧ane? Ta eo Jemed Ilan̄ enaaj kar kōņaan bwe in kōm̧m̧ane?

In aorōk, jetōb jidikdik in ejjeļo̧k an bōd ejjab to enaaj bar rool ļo̧k n̄an ippān Jemen ilo Lan̄. Iaar ļōmņak eļan̄n̄e eaar mijak. Iaar ļōmņak kōn ajri ro nejū make. Ke eaar iddik wōt im kar mijak, Ikōn al n̄an er. “N̄a Nejin Anij” eaar al eo aer em̧m̧an tata. Kajion̄ in dāpij aō jan̄, Iaar al n̄an nin̄nin̄ eo.

Āinwōt juon nōōj Iaar lo tuub ko im bōtōktōk, kar bwini wallōn̄ im wallaļ in ubōōn nin̄nin̄ eo, ron̄jake im̧ūņm̧ūņ in menono eo an, im lali elōn̄ kein etal ko rellōn̄. Āinwōt juon Armej ro Rekwojarjar ilo Raan Kein Āliktata Iaar lo jetōb eo aiboojoj im kejōkļo̧kjōņ kōn karōk in lo̧mo̧o̧r eo.

Ilo an bon̄ōn eo wōnm̧aanļo̧k wōt, ājmour eo an eaar nana ļo̧k. Āliktata Eaar ejaake juon jekjek eo me eaar kōm̧m̧an bwe en to̧o̧rļo̧k bōtōktōk n̄an āriin.

Ilo jibbon̄ōn eo rinan̄inmej eo edik aō eaar ilo jab en̄taan eaar mej. Eaar ilo̧k jān pein eo jinen im eaar “ilo̧k n̄an jikier n̄an Anij eo eaar leļo̧k n̄an [e] mour” (Alma 40:11).

Iaar epaakeļo̧k Rilo̧mo̧o̧r eo im Jemed Ilan̄ bon̄ōn eo. Iaar kōļapļo̧k juon meļeļe eļap kōn iakwe eo an Irooj n̄an aolep armej—im iakwe eo An n̄an eō. Kar kekememej Eō, em̧ool kabwilōn̄ eō, kōn m̧wilaļ in iakwe eo Iaar en̄jake kōn E. Im Iaar en̄jake juon ikirelele n̄an ļapļo̧k aō jouj, ļapļo̧k aō em̧m̧an, ļapļo̧k aō jeorļo̧k bōd, ļapļo̧k aō meanwōd—ļapļo̧k aō āinwōt E—juon raan im juon bōk kūtwōn ilo juon iien.