Faalogo Mulimuli Ane

Ao ou i ai i le kolisi, sa faamanuiaina au i se galuega faamasani faigata i se aai e mamao ese mai lou aiga. Sa nofo latalata ane sau uo ua leva, ma e ui lava e le tutusa o ma talitonuga faalelotu, ae le i taofia ai i maua mai le avea ma se uo masani.

Faatoa ou feiloai lava ia Mateline (ua suia le igoa), ina o matou faigaluega faatasi ma se tasi o tamaitai talavou lea na avea ma se faataitaiga maoae o se Au Paia o Aso e Gata Ai. Ou te manatuaina le faasino mai e le Agaga o ni eseesega laiti i le va o tamaitai talavou taitasi, ma faamalamalama mai le auala e mafai ai e oo lava i ni filifiliga laiti ona faatulagaina se ala o le olaga i le lumanai. Sa ou manatuaina moni lava nei uunaiga faaleagaga mo le tele o tausaga.

O lenei la ua ma toe fesootai ina ua mavae ni nai tausaga, sa ma fuafuaina ma Mateline se taimi e faatasi ai. Ina ua oo mai le afiafi, sa amata ona ou lagona le popole. Sa ou alu i se nofoaafi i lona nuu, ma a o ou latalata atili atu, sa faapea mai se leo i totonu o lou mafaufau ma lou loto, “E tatau ona e tafao faamasani tau lava o tagata e maualuluga o latou tulaga faatonuina.”

“E le o se tafaoga faamasani lenei mea,” o lou mafaufau lea. “Ua na o se ma faatasiga ma se uo ua leva.” Na toe musumusu mai e le Agaga le lapataiga, ma uunaia mai seia oo ina ou iloaina e sao lava o se tafaoga faamasani ma na amata ona ou mafaufau i tulaga faatonuina ma le ituaiga olaga o loo ola ai lau uo. “Ua na iloa o au o se AAG,” sa ou taumafai e fetuutuunai. “Ua masani o ia i ou tulaga faatonuina, ma o le a leai se faafitauli.”

Ae ui i lea, na amata ona ou mafaufau pe o “eseesega laiti” ia na ou matauina muamua na mafua ai ona sili atu ona eseese o ma ala nai lo le mea na ou faamoemoeina. O lea na ou mulimuli ai i le uunaiga a le Agaga, ma na ou valaau atu i lau uo ua le oo le ma feiloaiga. Sa matuai ou fefe lava e faatiga ia te ia. E faapefea ona ou faamalamalama atu ni uunaiga faaleagaga i se uo e le faatauaina le misiona a le Agaga Paia?

Sa ou faamalamalama atu ou te lei mauaina se lagona toafilemu i se tasi o gaoioiga na ma fuafuaina ma faamoemoe o le a avea lea ma se mafuaaga talafeagai e aloese ai mai le gaoioiga o le afiafi. Sa le fiafia o ia ma ofo mai e sui a ma fuafuaga. Sa ou fiafia ma ioe i le suiga aua na ou manatu, “Masalo o le gaoioiga le mafuaaga na lapatai ai au e le Agaga.” Ae peitai na le mafai lava ona aluese lou lagona popole.

Sa ma maua se taimi fiafia i lena po, ae peitai na tau mai e le Agaga ia te au mai lea taimi i lea taimi, e taua le lapataiga na ou maua muamua. E lei i ai se mea na foliga faapopoleina i le taimi muamua, ae ao faagasolo le afiafi, sa amata ona manino mai atonu e ui e tutusa o ma siosiomaga, ae o loo ma agai atu i auala e matua eseese lava. Sa le tutusa o ma tulaga faatonuina—e oo lava i mea laiti. Ina ua ia okaina le uaina, sa ou faamalamalama atu o le a ou le totogia lava se mea inu malosi. Sa ia faaaloalo i ou manaoga ma totogi lava e ia.

Na faaauau le faatupulaia o lou popolega faaleagaga ao faagasolo le afiafi. Ao faaiuiu le aiga o le afiafi, ua ou nofo i le pito o lou nofoa, sauni e alu, aua na ou iloa ua toeitiiti alu le nofoaafi mulimuli ma e mamao tele le mea ou te nofo ai ou te alu ai i se taavale laupasese. I le iloa mai o lou popole, na fai mai ai lau uo e mafai ona ou moe i lona fale. O le taimi la lea ua le mafai ai ona tuua au e le Agaga, i le faamautinoa mai o le mea ua leva ona ou iloa: o le nofo ua le o se filifiliga.

Ao ma savavali e momoli o ia i le fale, sa ou taumafai malosi e faailoa atu le to’a. “E te mo’i e te le fia nofo?” o lana fesili lea. Na ou mautinoa. E lei faamalosia mai pe na le mafaufau o ia, ae na sili atu le manino o le musumusu mai o le Agaga nai lo le leo o le faititili. E le tatau ona misi lau nofoaafi!

Sa ou faatali seia ou iloa ua i ai o ia i totonu o le fale, ona ou momo’e saoasaoa lea ina ia ou taunuu i le taimi sao i le nofoaga o nofoaafi. Sa le mafai ona tea ma lo’u mafaufau Iosefa i Aikupito ina ua ia solaese mai le faaosoosoga (tagai i le Kenese 39:7–12).

A o ou toe mafaufau i tua i mea na tutupu i lena po, ou te lagonaina le fefe ma le faafetai: fefe mo le mea semanu e tupu ma le agaga faafetai mo le mafutaga a le Agaga Paia. Na talanoa mai le Agaga, ma e ui lava sa tatau ona ou vave usitaia, ae ou te faafetai na iu lava ina ou faalogo.

Na iloagofie lava le matua le manino o lau vaaiga i le mea na tupu i lena po e pei o le silafaga a le Alii. E pei ona faamaumauina e Isaia:

“Aua o o’u manatu e le o outou manatu, o o’u ala e le o outou ala, ua fetalai mai ai Ieova.

“Aua e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu” Isaia 55:8–9).

O nisi o filifiliga tatou te feagai ai i le olaga e vave ona faia ma faagaloina. E i ai isi filifiliga e o mai faatasi ma lesona e lelei mo i tatou pe a aua nei faagaloina. Ou te matuai faafetai lava i le iloa afai tatou te faalogo i musumusuga a le Agaga Paia—ma pe a tatou faia vave o lea—o le a sili atu le faigofie ona tatou tumau ai i le ala na faataatia e Iesu Keriso mo i tatou e mulimuli ai.