Usa Ka Kinatibuk-ang Komperensya nga alang Lamang Kanako

Nagdako ako sa usa ka panimalay diin ang kinatibuk-ang komperensya gipaabut og maayo sama sa adlaw nga walay trabaho. Nahinumduman ko isip usa ka gamay nga bata nga gihatagan og buluhaton sa Sunday School sa pagpares sa mga litrato sa Kinatibuk-ang mga Kadagkoan sa ilang mga paggula diha sa telebisyon samtang sila namulong sa panahon sa komperensya. Samtang ako nagtubo, nakat-unan ko ang pag-ila niadtong mga Kaigsoonan dili lamang sa pisikal nga mga hitsura apan usab sa ilang mga tingog ug sa mga mensahe nga ilang gihatag. Isip usa ka freshman sa unibersidad, naghinamhinam ako sa diha nga ang among choir sa institute of religion gidapit sa pagkanta sa usa ka sesyon sa komperensya diha sa Tabernacle. Sa daklit, sa pagka-edad og 20 ako diha nay espesyal nga pagbati mahitungod niadtong unang mga katapusang adlaw sa semana sa Abril ug Oktubre kada tuig.

Apan ako nagkat-on pa gihapon kon unsa ka makahuluganon sa kaugalingon ang kinatibuk-ang komperensya. Nadawat sa among stake ang mga ticket alang sa kinatibuk-ang miting sa Relief Society niadtong Septyembre 2008 diha sa Conference Center. Naghinamhinam ako nga nakigtipon sa mga sister sa among stake, nagpaabut sa madasigon nga musika ug mga pakigpulong, ug labaw nga napamainubsanon sa paghunahuna nga among madungog ang usa ka mensahe gikan ni Presidente Dieter F. Uchtdorf, Ikaduhang Magtatambag sa Unang Kapangulohan. Akong gipaminaw og maayo ang kada pulong, dali-dali sa paghimo og mubo nga mga sulat, ug mipasalig sa pagbuhat kon unsay gisugo nga among pagabuhaton. Gibati ko nga kini usa ka nindot kaayo nga pasiuna ngadto sa kinatibuk-ang mga sesyon nga mosunod sa sunod nga katapusang adlaw sa semana.

Dayon ang akong kalibutan nahugno. Samtang didto sa trabaho sa pagkasunod Huwebes, nadawat ko ang tawag sa telepono gikan sa akong doktor nga nagpahibalo kanako nga ang akong mga eksamen sa miaging semana nagpakita og cancer.

Ang sunod nga mga adlaw gisagulan og mga pagduda, kahadlok, kabalaka, kaguol, kawalay paglaum ug kasakit. Daghan kaayong nagkalain-laing mga pagbati ang akong nasinati nga ang pagkatulog wala moabut ug ang akong mga luha miagas sa kanunay. Wala ako sukad mibati og hilabihan nga kahadlok.

Sa diha nga miabut ang Sabado sa buntag, tuyo ko ang pagpaminaw sa komperensya samtang nagbuhat og laing mga buluhaton. Ang pagpabilin nga nagkapuliki, ako milaum, nga motabang sa pagpunting sa akong hunahuna palayo gikan sa akong pagsulay. Apan nakaplagan ko ang akong kaugalingon nga gibiyaan ang labhanan ug gipasagdan ang mga hugasanan diha sa lababo samtang ako nadani ngadto sa telebisyon. Ang akong kasingkasing hapit mihunong og pitik samtang si Elder L. Tom Perry sa Korum sa Napulog Duha ka mga Apostoles misugod sa unang sesyon uban niini nga pahayag: “Dili nato matag-an ang tanan nga mga kalisdanan ug mga unos sa kinabuhi, dili gani bisan ang mga butang nga anaa lang sa unahan, apan isip mga tawo sa hugot nga pagtuo ug paglaum, kita nasayud lapas pa sa bisan unsa nga pagduha-duha nga ang ebanghelyo ni Jesukristo tinuod ug ang pinakamaayo moabut pa.”¹

Sa tinuod, naghunahuna ako, ang sunod nga hilisgutan mao ang moral nga kalimpyo o ang Igpapahulay nga adlaw. Apan ang kada nagsunod nga mensahe mao usab ang kalabut sa paglaum sa mga panahon sa pagsulay!

Ang Dominggo usa ka malinawon nga adlaw samtang ang among pamilya naghiusa sa pag-ampo ug pagpuasa alang kanako. Nagpadayon akong naminaw og mga pulong sa paglaum sama lamang sa miaging adlaw, uban sa usa ka gamhanang panapos nga mensahe sa pagkahapon gikan ni Elder Quentin L. Cook sa Korum sa Napulog Duha ka mga Apostoles. “Ako nagpamatuod nga ang Pag-ula ni Jesukristo naglakip sa tanan nga mga pagsulay ug mga kalisud nga sagubangon ni bisan kinsa kanato dinhi niini nga kinabuhi,” miingon siya. “Usahay kon kita mobati nga moingon, ‘Hinaut nga nakahibalo kamo, naglisud gayud ako,’ makasiguro kita nga Siya anaa ug kita luwas diha sa Iyang mahigugmaong mga bukton.”²

Tingali ang pagpuasa o ang mga pag-ampo o sa yano ang akong mapainubsanong kahimtang sa pagbati, apan gikan sa sinugdan ngadto sa katapusan, gibati ko nga kini akong personal nga kinatibuk-ang komperensya nga usa ra ang tigpaminaw.

Ang nagsunod nga mga adlaw, mga semana, ug mga bulan midala og daghan nga mga hagit samtang ako nagsinati og mga eksamen, mga pag-opera, chemotherapy, ug radiation nga mga tambal. Nangandoy ako nga makasulti nga wala gayud ako mibati nga nawad-an og paglaum sulod niadtong 12 ka mga bulan. Akong gibuhat. Apan sulod niadto nga mga panahon, gibati ko usab nga gisuportahan pinaagi sa mga pag-ampo ug pagpuasa sa ward ug sa mga sakop sa pamilya, sa mga panalangin sa priesthood nga gihatag sa akong amahan, ug sa hugot nga pagtuo sa akong inahan. Gikompleto kog basa ang Basahon ni Mormon sulod sa unang pipila ka mga bulan sa mga pagtambal, nasayud nga ang kahupayan moabut pinaagi sa pulong sa Dios.

Apan sa labing lisud nga mga adlaw, ako kanunay nga modangop sa daan nga kopya sa Nobyembre 2008 Liahona ug gibasa pag-usab kadto nga mga pulong nga gikan sa usa ka mahigugmaong Amahan pinaagi sa dinasig nga mga sulugoon ug lahus ngadto sa akong mahinadlukon nga kasingkasing. Natingala ako sa usa ka hugpong sa mga pulong nga ako wala mahinumdom nga nagsulti si Presidente Thomas S. Monson diha sa iyang pangbukas nga pakigpulong: “Ang atong Langitnong Amahan manggihunahunaon sa kada usa kanato ug sa atong mga panginahanglan. Unta kita mapuno sa Iyang Espiritu samtang kita nagduyog sa mga kalihokan niini, ang ika-178 nga Tunga sa Tuig nga Kinatibuk-ang Komperensya.”³

Nakaangkon ako og usa ka pagpamatuod niana nga kamatuoran. Ang Langitnong Amahan nagmanggihunahunaon kanako nianang katapusang adlaw sa semana sa Oktubre. Nasayud Siya sa akong panginahanglan sa paglaum diha sa Iyang gugma ug paglaum diha sa Iyang plano alang kanako. Misulti Siya ug ako naminaw.