Berita aika Kakawaki n ana Boki Moomon

N ririki aika mwaiti aika a tia n nako I tei irarikin ana kainiwene te kairake ni karo ngke e a boni kaan matena. Buuna ma natina aika uoman a tei irarikina ma te nanokawaki. E ana baiu ni baina ao, ma taraakina ae e kani buokaki, e taku, “Bitiobi, I ataia bwa iaon kawaiu ni mate. Tuangai bwa tera ae e na riki nakon tamneiu ngkana I mate.”

I karaoa te tataro inanou ibukin ana ibuobuoki karawa ao I nooria irarikin ana kainiwene kaobiin te boki ae tabu ake teniua. I anaa te boki ao n raibaei baana. N te tai ae aki maan ao I kunea are I a tia ni kunea, n akea atakina irou, I toki n te ka 40 ni mwakoro n Aramwa inanon ana Boki Moomon. I wareki taeka aikai nakoina:

“Nooria e a bon tia ni kaotaki nakoia iroun te anera, bwa tamneia aomata ni kabane man te tai are a kitana iai te rabwata ae mamate aio, … a bon uotaki n okira mweengaia nakon te Atua are e anganiia te maiu.

“Ao … tamneiia naake a raoiroi a na butimwaaeaki nakon te aro ni kakukurei, are e bon aranaki bwa bwaretaiti, n te aro ni motirawa, te aro n rau, are a na motirawa iai man aia kaangaanga ni kabane ao man raraoma ni kabane, ma nanokawaki” (Aramwa 40:11–12).

Ngke I reitianako ni wareka taekan te Mangauti, e roko te oota nakon matan te ataeinimwaane ao te moangare e nooraki n riana. Ngke n nang oki, I kabo nakon te utu ae tamaroa aei.

Imwiina ao I noora buuna ma natina n te taunimate. I kaoka au ururing nakon te tairiki arei ngke te ataeinimwaane e titiraki ibukin te koaua ao, man ana Boki Moomon, e ongo te kaeka nakon ana titiraki.

Man ana Boki Moomon a reke berita riki tabeua aika kakawaki, n raonaki ma berita ibukin te rau, te kainaomataaki, ao kakabwaia ngkana a “bon toro iroun Atuan te aba, are bon Iesu Kristo” (Ita 2:12).

Man baana ao e roko te berita “te kukurei ae akea-tokina” nakoia “naake a kawakin ana tua te Atua. Bwa taraia, a kakabwaiaaki ni bwaai ni kabane, n te maiu n rabwata ao n tamnei” (Motiaea 2:41).

Man baana ao e roko te berita “te kimwareirei ae akea kabotauana” nakoia naake a riki bwa “bwaai ni mwakuri inanon bain te Atua” ni kamaiuia Natina mwaane ao aine aika rangin ni kakaawaki (Aramwa 28:8; 29:9).

Man baana ao e roko te berita are Natin Iteraera ake a maenako a na manga ikotaki—te mwakuri are ti bane ni katabeaki ibukina rinanon ara mwakuri ni mitinare ni kabuta te aonaaba (taraa 3 Nibwaai 16; 21–22).

Man baana ao e roko te berita are e kangai bwa ngkana ti tataro nakon te Tama n aran Iesu Kristo ae tabu, ao ana kakabwaiaki ara utu (taraa 3 Nibwaai 18:21).

Man kamatebwaiakan baana e roko koron nanon aia berita burabeti are “e na roko inanon maiumi ao inanon mweengami korakoran Tamnein te Uea, te kakorakora are ko na kona iai n nakonako n te ongotaeka nakon Ana tua, ao te kakoaua ae korakora riki ibukin koauan maiun Natin te Atua.”¹

Ao man baan ana Boki Moomon ao e roko ana berita Moronai are rinanon te tataro, ma te nano ae koaua, ao te onimaki iroun Kristo, ao ti na kona iai n atai koauan berita aikai “man mwaakan te Tamnei ae Raoiroi” (taraa Moronai 10:4–5).

Ma burabeti ake tabeman ni boong aika kaitira, I taekina kororaoin koauan te “boki ae te kabanea n eti n te aonaaba,”² ma ana Boki Moomon, bon kakoauaan taekan Iesu Kristo. Rongorongona e kaona te aonaaba ao e uoti nakoia ana tia wareware te atatai ibukin te koaua. Bon au kakoaua bwa ana Boki Moomon e bitii maiura. Ngaira n tatabemaniira nako ti na warekia ao ni manga warekia riki. Ao ti na uaia n tibwa ara kakoaua n ana berita aika kakawaki ma natin te Atua ni kabane.