Ta eo Bok in Mormon ej Katakin kōn Iakwe eo an Anij

Elōn̄ Rikristin ro remeļeļe kōn m̧wil ko an Jisōs Kraist ilo an waļo̧k ilo Baibōļ eo. Rej bwilōn̄ kōn iakwe eo Eaar kwaļo̧ke n̄an rijeramōl, rinan̄inmej, im ro enana kōm̧m̧an n̄an er. Ro rej watōk er make An rikaļoor rej barāinwōt kajieon̄ in anōk waanjon̄ak eo An im ļoore naan an Rijilōk ro An rejitenbōro: Jen yokwe doon: bwe yokwe e jān Anij; im ro otemjej rej yokwe, em̧ōj keotak er jān Anij, im re jeļā Anij. … Bwe Anij yokwe” (1 Jon 4:7–8).

Katak in ej kalikkar jān Bok in Mormon. Ej kōmeļeļeik ekōjkan an juon lo̧tak ilo Anij im ekōjkan an juon bōk kajoor n̄an iakwe āinwōt An kar. Ej kalikkar jilu pedped ko raorōk me rej bōktok kajoor in iakwe eo an Anij n̄an mour ko ad.

M̧oktata, Bok in Mormon ej katakin bwe kōjerbal tōmak ilo Kraist im deļo̧n̄ ilo juon bujen Ippān n̄an kejparok kien ko An ej ki eo n̄an bar ļotak ilo jetōb. N̄an armej ro ilo Bok in Mormon ro raar kōm̧m̧ane kain bujen in, Kiin̄ Benjamin eaar kwaļo̧k, “Im kiiō, kōnke bujen eo kom̧ ar kōm̧m̧ane naaj ān̄inn̄in kom̧ ro nejin Kraist, m̧aan ro nejin, im kōrā ro nejin, bwe lo, rainin Eaar keotak kom̧ ilo jetōb, bwe kom̧ij ba bwe buruōmi raar oktak kōn tōmak ilo Etan, kōn menin, kom̧ij lotak ilo E im kar erom m̧aan ro im kōrā ro nejin” (Mosaia 5:7).

Ruo, Rilo̧mo̧o̧r Make eaar katakin bwe kajoor eo n̄an erom ļo̧k āinwōt E ej itok kōn bōk kain̄i ko an ko̧jpeļ eo: “Kiiō en̄in ej kien eo: Ukweļo̧k, kom̧ aolep jeban ko an laļ, im itok n̄an Eō im baptais ilo Eta, bwe komin maron̄ kokwojarjar jān bōke Jetōb Kwojarjar, bwe kom̧in maron̄ jutak ilo ejjeļo̧k lipijinjin im̧aō ilo raan eo āliktata” (3 Nipai 27:20).

Jilu, Eaar kōketake kōj n̄an ļoor waanjon̄ak eo An: “Armej rot kom̧ij aikuj in āinwōt?” Eaar kajjitōk menin. Uwaak eo An: “Em̧ool Ij ba n̄an kom̧, em̧ool āinwōt N̄a ij” (3 Nipai 27:27). Em̧ool, E ekōņaan bwe jān erom ļo̧k āinwōt E.

Jet iaan waanjon̄ak ko rem̧m̧an kōn iakwe eo An rej waļo̧k ilo Bok in Mormon. Waanjon̄ak kein remaron̄ waļo̧k ilo mour ko ad make ilo ad kajieon̄ in erom ļo̧k āinwōt Irooj.

Ekar iakwe eo An n̄an Liai im baam̧le eo an Liai—im iakwe eo aer n̄an E—me eaar bōktok er n̄an America, ānen kalim̧m̧ur eo aer, ijo raar jeram̧m̧an ie.¹

Ekar iakwe eo an Anij n̄an kōj me ekar im̧we E buki iiō ko remootļo̧k n̄an kakien rikanaan ro an RiNipai n̄an kejparok ļo̧o̧k ko rekwojarjar an armej ro aer. Katak ko me kar ļo̧o̧kii me rejelet lo̧mo̧o̧r eo ad im mour ijo eutiejtata. Katak kein rej kiiō pād ilo Bok in Mormon. Jeje in ekwojarjar ej jutak āinwōt kein kam̧ool loe kōn iakwe eo an Anij n̄an aolep ajri ro Nejin ipeļaakin laļ in.²

Ekar iakwe eo an Kraist n̄an “sip ko jet” An me kar bōktok E n̄an Laļ eo Ekāāl.³ Jān Bok in Mormon jej ekkatak bwe jorrāān eo eļap im jilu raan in marok eaar bōk jikin ilo Laļ eo Ekāāl ilo iien mej eo an Irooj ilo Laļ eo M̧okta. Innām aiboojoj im jerkakpeje eo Irooj eaar wanlaļtak jān lan̄ im kwaļo̧k ilubwiljin armej ro ilo Laļ eo Ekāāl.

“N̄a ij meram eo im mour eo an laļ,” Eaar jiron̄ er, “im Iaar idaak jān kap meo̧ eo Jema eaar letok n̄an Eō, im kar kaiboojoj Jema ilo bōk Io̧ō jerawiwi ko an laļ” (3 Nipai 11:11).

Innām Eaar letok juon iaan jeļā ko repaak tata jabdewōt emaron̄ bōke Ippān. Eaar kūr er n̄an en̄jake kinej eo ilo Ikatin im jeno̧k in dila ko ilo Pein im neen, bwe ren jeļā ilo m̧ool bwe E ej “Anij in Israel, im Anij an aolepen laļ, im [kar] mane kōn jerawiwi ko an laļ” (3 Nipai 11:14).

Innām Jisōs eaar leļo̧k mālim n̄an rikaļoor ro An n̄an peptaij, n̄an leļo̧k menin letok eo an Jetōb Kwojarjar, im n̄an leto letak kwojkwoj eo. Eaar leļo̧k n̄an er kajoor eo n̄an kajutak Kabun̄ eo An ilubwilijier, kar tōl jān jon̄oulruo rijilōk ro.

Eaar leļo̧k n̄an er jet iaan pedped in katak ko Eaar leļo̧k n̄an rikaļoor ro An ilo Laļ eo M̧okta. Eaar kemour rinan̄inmej ro aer. Eaar bukwelōlō im kar jar n̄an Jemen ilo naan ko rekajoor im rekwojarjar me rejjab maron̄ ļo̧o̧ki. Kar kanooj in lukkuun kajoor jar eo An jon̄an ro me raar ron̄jake E raar obrak kōn lan̄lōn̄. Obrak kōn iakwe eo An n̄an er im kōn tōmake eo aer ilo E, Jisōs Make eaar jan̄. Eaar kanaan kōn jerbal eo an Anij epepen ko ļo̧k kōn itok eo an eo kar kalim̧m̧ur kōn Itok eo An Kein Karuo.⁴

Innām Eaar ba n̄an er n̄an bōktok ajri ro nejier n̄an E.

“Im Eaar bōk ro re dik nejier, juon ilo̧k juon, im kōjeram̧m̧an er, im jar n̄an Jemān kōn er.

“Im ke Eaar kōm̧m̧ane men in Eaar bar jan̄;

“Im Eaar kōnono n̄an jarlepju eo, im ba n̄an er: Kom̧in lale ro re dik nejemi.

“Im ke raar reilo̧k n̄an lale raar bōk mejāer im reilo̧k n̄an lan̄, im raar lo be lan̄ ko re peļļok, im raar lo enjel raņ rej wanlaļ tak im jepooļe ro re dik ipeļaakier, … im raar pooļ kōn kijeek; im enjeļ ro raar jipan̄ er” (3 Nipai 17:21–24).

Ej iakwe eo erreo im kajoor an Anij, āinwōt an kwaļo̧k ilo Bok in Mormon.

Ilo raan kein āliktata kōj ro rejeram̧m̧an n̄an wōr Bok in Mormon, n̄an erom membōr ro an Kabun̄ eo an Irooj, n̄an wōr ko̧jpeļ in An, im n̄an kejparok kien ko An jeļā juon men kōn iakwe eo indeeo an Anij. Jejeļā ekōjkan kōm̧m̧an bwe eo An en ad make. Ilo ad erom rikaļoor ro An rem̧ool, jej bōk kajoor n̄an iakwe āinwōt An iakwe. N̄e jej kejparok kien ko An, jej erom ļo̧k āinwōt E. Jej kōdepakpak ļo̧k doulul in iakwe eo ad ilo ad jipadōkļo̧k armej in laļ ko otemjej, bwij, im lo.

Kōn naan in kamoolol kōn mour in waanjon̄ak eo An, jemaron̄ kōm̧m̧ane bwe jeje in ekwojarjar en ad jon̄ak: “Jar n̄an Jemād kōn aolep kajoor in bōro, bwe kom̧in maron̄ obrak kōn iakwe eo An, eo Eaar leļo̧k ioon aolep ro rej ri kaloor ro an rem̧ool an Nejin, Jisōs Kraist; bwe kom̧in maron̄ erom m̧aan [im jiron̄] ro nejin Anij; bwe n̄e Enaaj waļo̧k jenaaj āinwōt E, bwe jenaaj lo E ilo lukkuun nememen” (Moronai 7:48).⁵