Upwe Kuna I Sefan

Am semirit aua mefi pwe aua auchea ngeni semem we. A tongeikem me epwe muttir omusano tipisim kewe. A achocho ne tumunuoch pwe emon me emon am aua pwapwa, me a afatta pwe a mochen met mi och fan item. Ua fakkun tongei i.

Nupwen ua fiti sukkun fan ewe onuen ier, semei we a mano non eu aksiten non chitosa. Am me ai we famini aua fakkun netipechou. A fakkun watte ewe pwang non am famini. Semei we i ewe emon ua anongonong won, ewe emon ua feino kapas ngeni ika a wor ai osukosuk. Nap seni ai kutta aninis, ua mut ngeni ewe song me feingaw epwe chok nonnom. Iwe ua fini pwe a fis pwe tipisin Kot. Use chuen anneani nei kewe pukfel me use chuen iotek. Ua fiti fan pokiten chok Inei we a mochen ai upwe fiti. Ua achocho ai upwe touau seni Semei won Nang.

Iwe fan eu ua fiti an Ekkewe Fopun sai ren ewe aewin fansoun. Ua sani ai upwe chiechi ngeni aramas minefo, nge use chuen anneani nei kewe pukfel. Saingon pwinin, a fis ewe mwichen kapasen pwarata. Ua mefi eu mettoch use fakkun mefi non fansoun nangatam: ewe Ngun mi Fel. Ua tongei ekkewe nengin ra uta me kapasen pwarata, nge ua chok mommot pokiten ua ekiekin pwe ese wor ai kapasen pwarata. Iwe ua chok mefi pwe mi namwot pwe upwe uta. Ua suki awei, nge ua ekieki usun met upwe apasa. Iwe ua apasa pwe ua kinisou ren an Ekkewe Fopun sai. Mwirin ua kuna pwe ua pwisin apasa pwe ua sinei Jises Kraist a mano fan itei me Semei won Nang a tongei ei me ewe Mwichefen mi ennet.

Ua uren kinamwe mi amwarar. Pokiten ei fansoun ua tongeni apasa pwe ua sinei upwe kuna semei we fan eu pokiten an ewe Chon Amanau we Achasefan me Manausefanita.