Si Max ug si Mia Nakahimo og Kaayohan

Andam si Max nga magdula og superhero. Gisul-ob niya ang iyang pula nga t-shirt. Iyang gisul-ob ang iyang kapa sa superhero. Dayon miadto siya sa kwarto sa iyang manghud nga babaye.

“Dali, Mia,” miingon si Max. “Maghimo na ta og kaayohan!”

Si Max ug si Mia miadto sa sala. Nakakita sila og basket nga puno sa mga sinina.

“Makatabang ba mo nako?”nangutana si Mama.

“OK,” miingon si Max. “Dayon maghimo na mi og kaayohan.”

Si Max ug si Mia mitabang ni Mama sa pagpilo sa mga sinina ug mihipos niini.

Dayon nakakita si Max og basura diha sa salog. “Puniton nato ang tanang basura,” miingon si Max. “Dayon maghimo na ta og kaayohan.”

Si Max ug si Mia milibut sa balay. Ilang gilabay ang tanang basura nga ilang makit-an.

Ilang nakita si Mama nga nanilhig sa salog sa kusina. “Makatabang mi nimo,” miingon si Max.

Gigunitan ni Mia ang dustpan samtang nanilhig si Max sa salog.

“Karon maghimo na ta og kaayohan,” miingon si Max.

Mitan-aw si mama sa palibut sa limpyo nga balay. Dayon iyang gigakos si Max ug Mia. “Sa akong pagtuo nahimo na ninyo!”