Dungang Magtuon sa mga Pakigpulong sa Komperensya

Sa daghang katuigan among natagamtam ang pagbasa sa isyu sa komperensya isip pamilya, usa ka artikulo matag higayon. Sa among pagsugod, magpundok mi sa lamesa ug puli-puling magbasa og usa ka paragraph. Apan among namatikdan nga gibasa ra namo ni aron mahuman, dili mohunong aron sabton ang mga mensahe.

Aron mas makapahimulos sa among gibasa, ang akong asawa ug ako mipalit og kopya sa isyu sa komperensya para sa matag sakop sa pamilya ug miplano kon pila ka pakigpulong among tun-an matag semana aron among mabasa tanan sa dili pa ang sunod nga kinatibuk-ang komperensya. May mga semana mobasa mi og usa, sa ubang semana duha, apan ang tanan kinahanglang magtuon ini ug i-highlight ang mga parte nga ilang ganahan. Dayon sa family home evening among itudlo sa usag usa ang among gi-highlight.

Kasagaran ang among mga anak adunay mga pangutana nga among mahisgutan, o ang akong asawa ug ako mangutana. Among gihataga’g bili nga makadungog sa among mga tin-edyer nga ipasabut ilang tubag, ipakigbahin ilang nakat-unan sa seminary, simbahan, o sa ilang personal nga pagtuon. Kini nahimong talagsaong paagi sa pagpaminaw sa dili pormal nga pagpamatuod sa usag usa sa komportable kaayo nga palibut.

Sa wala madugay ingon ini na usab ang among matag buntag nga pagtuon sa kasulatan. May mga adlaw nga pipila lang ka bersikulo among mabasa sa dili pa mahurot ang oras sa paghisgut kabahin niini nga mga bersikulo ug sa unsang paagi magamit kini sa among sitwasyon.

Ang among buntag puno na sa pag-istoryahanay, katawa, ug panaghiusa sa dili pa mi mobuhat sa tagsa-tagsa namong buluhaton. Kami may lig-ong pagpamatuod sa tambag sa atong propeta nga dungang magtuon ug mag-ampo kada adlaw. Ang among pamilya nagkat-on ug nalig-on na sa usag usa. Kining tanan resulta sa gustong mas makapahimulos sa kinatibuk-ang komperensya.