Pagpangandam alang sa Ikaduhang Pag-anhi
Gikan sa usa ka fireside sa Church Educational System alang sa mga young adult, “Terror, Triumph, and a Wedding Feast,” [Kahadlok, Kadaugan, ug Kasaulogan sa Kasal] gihatag niadtong Septyembre 12, 2004. Alang sa kompleto nga teksto sa Iningles, bisitaha ang speeches.byu.edu.
Bantugang mga lalaki ug babaye sa miaging mga kapanahonan nakahimo sa pagpadayon, pagpamatuod, pagpaningkamot sa pagbuhat sa ilang labing maayo, dili tungod kay sila nasayud nga sila magmalampuson apan tungod kay sila nasayud nga kamo magmalampuson.
Si Kristo sa Pula nga Kupo, ni Minerva Teichert © IRI, sa maayong kabubut-on sa Church History Museum.
Gipakatawo kita niining labing mahinungdanon nga dispensasyon sa ebanghelyo nga gihatag ngadto sa katawhan, ug kinahanglan nga pahimuslan nato kini.
Ganahan ko sa usa ka linya gikan ni Propeta Joseph Smith nag-ingon nga ang unang mga propeta, mga pari, ug mga hari “ila kining gilauman uban sa malipayon nga pagpaabut sa adlaw diin kita magpuyo; ug gidasig uban sa langitnon ug mahimayaon nga mga pagpaabot ilang giawit ug gipanangna kining atong panahon.”1 Timan-i kining susama nga pagpamatuod ni President Wilford Woodruff: “Ang mga mata sa Dios ug sa tanang balaang propeta nagtan-aw kanato. Mao kini ang mahinungdanon nga dispensasyon nga gipamulong gikan pa sa pagsugod sa kalibutan.”2
Aduna koy teyoriya kabahin niadtong unang mga dispensasyon ug ang mga lider, mga pamilya ug ang mga tawo nga nagpuyo kaniadto. Kanunay ko silang gihunahuna ug sa makadaot nga mga kahimtang nga ilang giatubang. Nag-atubang sila og lisud nga mga panahon ug, sa kasagaran, wala magmalampuson sa ilang mga dispensasyon. Sa pagkatinuod, ang tibuok punto sa Pagpahiuli sa ebanghelyo niining ulahing mga adlaw mao nga ang ebanghelyo wala makalahutay sa nag-unang mga panahon ug busa kinahanglan nga maestablisar sa katapusang higayon.
Usa ka Dispensasyon Nga Dili Mapakyas
Sa laktud, lain-laing matang sa apostasiya ug pagkagun-ob sa katapusan maoy nahitabo sa matag kinatibuk-ang dispensasyon sa milabay nga mga panahon. Apan mao kini ang akong teyoriya. Ang akong teyoriya mao nga kadtong bantugang mga lalaki ug babaye, ang mga lider sa miaging kapanahonan, nakahimo sa pagpadayon, sa pagpamatuod, sa pagpaningkamot sa ilang labing maayo, dili tungod kay sila nasayud nga sila magmalampuson apan tungod kay sila nasayud nga kamo magmalampuson. Nagtuo ko nga sila nagmaisugon ug naglaum dili kaayo tungod sa ilang kaugalingong kahimtang apan tungod sa inyoha—usa ka talagsaon nga mga kongregasyon sa kabatan-onan nagpundok sa gatusan ka libo sa tibuok kalibutan sa usa ka determinado nga paningkamot aron makita nga ang ebanghelyo nagpatigbabaw ug nagmadaugon.
Si Moroni miingon, namulong kanato kinsa makadawat sa iyang rekord sa katapusang mga adlaw:
“Tan-awa, ang Ginoo nakapakita ngari kanako niini nga mahinungdanon ug kahibulongan nga mga butang mahitungod niana nga sa dili madugay moabut, ug niana nga adlaw sa panahon nga kini nga mga butang moabut diha kaninyo.
“Tan-awa, ako namulong nganha kaninyo ingon og kamo ania, ug gani kamo wala. Apan tan-awa, si Jesukristo mipakita kaninyo ngari kanako, ug ako nasayud sa inyong binuhatan” (Mormon 8:34–35).
Sa usa ka paagi o sa lain, ako naghunahuna nga hapit tanan sa mga propeta ug nag-unang mga apostoles adunay panan-awon sa atong panahon—usa ka talan-awon nga naghatag kanila og kaisug sa ilang kaugalingong dili kaayo malampusong panahon. Kadtong unang mga kaigsoonan daghan kaayo og nasayran kabahin nato. Ang mga propeta sama ni Moises, Nephi, ug sa igsoon nga lalaki ni Jared nakakita sa ulahing mga adlaw sa detalyado kaayo nga panan-awon. Pipila sa ilang nakita dili makapahimuot, apan sigurado kadtong tanang unang henerasyon naglaum sa pagkahibalo nga sa katapusan adunay dispensasyon nga dili mapakyas.
Ang atoa, dili ilaha, mao ang adlaw nga nakahatag nila og “langitnon ug malipayon nga pagpaabot” ug nakapakanta nila ug nakapanagna og kadaugan. Mao kini ang panahon, namulong kabahin sa tanan, nga gipaabut sa mga propeta gikan pa sa sinugdanan sa panahon, ug kadtong unang mga kaigsoonan nga tua didto nag-awhag gihapon nato! Sa tinuod kaayo nga paagi, ang ilang kahigayunan aron makonsiderar ang ilang kaugalingon nga hingpit nga malampuson magdepende sa atong pagkamatinud-anon ug sa atong kadaugan. Ganahan ko sa ideya sa pagpakiggubat sa ulahing mga adlaw nga magrepresentar ni Alma ug ni Abinadi ug unsay ilang gipangamuyo ug magrepresentar ni Pedro ug Pablo ug sa mga sakripisyo nga ilang gihimo. Sigurado nga madasig gayud kamo niana nga matang sa buluhaton sa drama sa kasaysayan!
Pag-andam sa Simbahan ni Kristo alang sa Iyang Pag-anhi
Tuguti ko nga modugang og laing elemento niini nga talan-awon sa dispensasyon nga sa akong hunahuna mosunod dayon. Tungod kay ang atoa mao ang katapusan ug mahinungdanon sa tanang mga dispensasyon, tungod kay ang tanang mga butang sa katapusan humanon ug matuman sa atong panahon, busa, adunay usa ka piho kaayo nga responsibilidad nga anaa sa Simbahan karon nga wala sa mga miyembro sa Simbahan sa bisan unsang panahon sa una. Dili sama sa Simbahan sa kapanahunan ni Abraham o Moises, Isaias o Ezequiel, o gani sa panahon ni Santiago ug Juan sa Bag-ong Tugon, kita adunay responsibilidad sa pag-andam sa Simbahan sa Kordero sa Dios sa pagdawat sa Kordero sa Dios—sa linawas, sa madaugong himaya, sa Iyang tahas sa milenyum isip Ginoo sa mga ginoo ug Hari sa mga hari. Walay laing dispensasyon sukad nga aduna niana nga katungdanan.
Sa pinulongan sa mga kasulatan, kita mao ang gisangunan sa tanan nga kasaysayan nga kinahanglan moandam sa pangasaw-unon alang sa pag-abut sa Pamanhunon ug magpakatakus sa imbitasyon sa kasaulogan sa kasal (tan-awa sa Mateo 25:1–12; 22:2–14; D&P 88:92, 96). Namulong sa tanan—sa atong panahon o panahon sa atong mga anak o sa atong mga apo o bisan kanus-a—bisan pa niana kita adunay responsibilidad isip Simbahan ug isip indibidwal nga miyembro niana nga Simbahan nga mahimong takus nga moanhi si Kristo nato, nga mahimong takus nga Siya moabi-abi nato, ug nga Siya modawat ug mogakos nato. Ang kinabuhi nga atong ipresentar Kaniya nianang sagrado nga takna kinahanglan mahimong takus alang Kaniya!
Kinahanglan nga Madawat Kita Niya
Natingala ko, uban sa dili hitupngan nga pagbati sa katungdanan sa pag-andam sa akong kinabuhi (ug kutob sa akong mahimo, sa pagtabang sa pag-andam sa mga kinabuhi sa mga miyembro sa Simbahan) alang nianang dugay nang gipanagna nga panahon, sa pagbalhin niana nga awtoridad, sa higayon nga kita mopresentar sa Simbahan Kaniya kansang Simbahan mao kini.
Inig abut ni Kristo, ang mga miyembro sa Iyang Simbahan kinahanglan makita ug molihok sama sa angayng lihokon sa mga miyembro sa Iyang Simbahan aron Iyang madawat. Kinahanglan naghimo kita sa Iyang buhat, ug kita kinahanglang nagsunod sa Iyang mga pagtulun-an. Kinahanglan dali ug sayon kita Niyang mailhan nga Iyang mga disipulo. Si President J. Reuben Clark Jr. ((1871–1961), kanhi Unang Magtatambag sa Unang Kapangulohan, kausa mitambag: ang atong hugot nga pagtuo kinahanglan dili mahimong lisud mamatikdan.3
Oo, kon nianang katapusan nga oras kita moingon nga kita mga tumutuo, nan kinahanglang ipakita nato kana. Ang Magbalantay nasayud sa Iyang mga karnero, ug kinahanglang mailhan kita nianang adlawa isip Iyang mga sumusunod sa buhat ingon man usab sa pulong.
Akong hinigugmang batan-ong mga higala, mao kini ang ulahing mga adlaw, ug kamo ug ako kinahanglang mao ang labing maayong mga Santos kutob sa mahimo. Hatagi og gibug-aton ang mga santos, palihug.
Kanus-a man kining tanan mahuman? Kanus-a man magpakita si Kristo sa publiko, magmadaugon, ug kanus-a magsugod ang Milenyum? Wala ako masayud. Unsay akong nahibaloan nga ang inisyal nga gutlo niana nga hitabo nagsugod 193 ka tuig na ang milabay. Nasayud ako nga isip resulta sa Unang Panan-awon ug ang misunod niini, kita nagpuyo sa panahon sa talagsaong mga panalangin—mga panalangin nga gihatag nato sa katuyoan sa pagpuyo nga matinud-anon ug putli aron nga kon moabut ang Pamanhunon sa katapusan ug sa madaugong paagi, personal Siyang makadapit nato sa kasaulogan sa kasal.
Akong hinigugmang kabatan-onan, akong ibilin ninyo ang akong gugma ug akong pagpamatuod nga ang Dios dili lang buhi; Siya nahigugma nato. Siya nahigugma kaninyo. Ang tanan Niyang gibuhat alang sa atong kaayohan ug sa atong proteksyon. Adunay dautan ug kasubo sa kalibutan, apan walay dautan o kadaut diha Kaniya. Siya ang atong Amahan—hingpit nga amahan—ug Siya mopanalipod nato gikan sa unos.
Sa pagkatinuod, ang kabalaka nga atong hatagan og higayon personal kaayo: Sa unsang paagi kita makapuyo sa mas hingpit, mas matinud-anon, aron ang tanan nga mga panalangin niining mahinungdanon nga dispensasyon ibu-bu sa matag usa nato ug niadtong kansang kinabuhi atong natandog?
“Ayaw kahadlok, gagmay nga panon. … Paghunahuna [ni Kristo] sa matag hunahuna; ayaw pagduha-duha, ayaw kahadlok.” “Kamo wala pa gihapon makasabut unsa ka dako ang mga panalangin sa Amahan … nga giandam alang kaninyo” (D&P 6:34, 36; 78:17).
Akong ibilin ninyo ang akong panalangin, akong gugma, ug apostolikanhong saksi sa katinuod niining mga butanga, nga ang atong dispensasyon dili mapakyas ug nga kadtong kinsa nagsunod sa mga pagtulun-an ni Kristo ug nagbuhat sa Iyang buhat mahimong takus sa usa ka pagdapit sa kasaulogan sa kasal sa pag-anhi sa Pamanhunon.