E Kona n Noorai?

Bon te moaningabong ae kakantaningaia natiu te mwaane, Taniera, bon ana moanibong nakon te kintakaten, ao e karako tabeaiangana ibukin kitanan te mwenga n nako n reirei. I kan kakoaua raoi bwa ngkana e namakinna bwa e bon tauraoi n rinanon kakaewenako n te “aonaaba ae koaua.” I tuanga Taniera ae N na rangin miti ngaia ngkana e a nako. I kakoaua nakoina bwa e ngae ngke I aki kona ni mena irarikina n te reirei, e aki riai ni maku ke ni maroa ibukina bwa e na bon tararuaia Tamana are i Karawa. I kauringnga bwa e kona n tataro n tabetai, n te tabo teuana ao bwa te Atua e na ongo irouna n tainako.

Ngke I taetae, Taniera, ae ai tibwa nimaua ana ririki ni maiu, e kakauongo raoi ma nanona. I mwin ana iango teutana ao e kaeka, “E kona n noorai ngkana I mena n au auti?”

“Eng,” I kakoaua bwa e kona.

“E kona n noorai ngkana I mena i tinaniku?” e titiraki.

“Eng, E kona n noriko n tainako,” I kaeka.

E tara ni kukurei Taniera ao e waekoa ni biri nako tinanikun te auti. I karaurau n ririmwina. E tararake Taniera nakon te nang, karawa ae buruu ao e titiraki, “Ngkana I tararake n tara karawa ao ni moangare, E kona n noorai ao E na moangare nakoiu?”

I aki kona n taetae ibukina bwa te bwai are e taekinna e karika ae kanga I a rangin rootaki iai, ma I katoutoua atuu ni kaotia bwa, “Eng!”

Inanon tararakena, e taratara nako ao ni kakaea karawa, kanga ai aron ana onimaki te ataei, ae kororaoi. E titiraki Taniera n iango, “I kona n Nooria?”

“Ko aki kona n Nooria,” I kaeka, “ma ko na ataia bwa E mena ikekei ibukina bwa ko na namakina Moangarena inanom.”

E tei ni moangare Taniera ngkai e kamwataua n tara karawa. Man tarakin ubuna ae rau ae e ubu n anera, I ataia bwa e namakina te moangare are mai karawa i kabin nanona.

Mai nanon wiia ataei aika uarereke (akea aia bure) ti reiakina ae bati n taekan te onimaki—te onimaki are ti kantaningaia are a na nim ma ngaia n aki toki. Ni koauana a kunea bwa e ngae ngke e tamaroa te maiu, n tabetai e boni matoatoa. Ti tataro bwa aia onimaki e na kona ni buokia n teimatoa ni kaitarai (taai akana a matoatoa akanne).

Ngkana iai taai aika a matoatoa inanon maiu, I uringa ana katoto Taniera, ao ma aron aia onimaki ataei are a kona ikawai ni karikirakea mai nanoia ao I tararake ni kakae nako karawa ao n titiraki, “E kona n noorai?” Ngkanne, n ai aron Taniera, I iango ma te karaurau, “I kona n Nooria?” Ngkana I iango n aron ana nanoanga nakoia aika mwaiti inanon maiu, e kakoaua te Tamnei ae Raoiroi nakoiu bwa I a tia n namakina raoi ana tangira te Tama are i Karawa ni boou inanon au onimaki ao ni kaungaki n te onimaki, e kakoaua te Tamnei nakoiu bwa I kona n tainako n namakina ana tangira te Tama are i Karawa.