Nakomai nakon Kristo
Kairake n ataeinimwaane man te Nakoanibonga ae te Aaron, te ririki aio ara botoniango ibukin te Iwawaki ni kaungako n iangoa bukin am reitaki ma Iesu Kristo, ara Tia Kamaiu ao Tia Kabooira, ao ko na kanga n riki n Aiarona. Ara botoniango bon “Nakomai nakon Kristo, ma ni kakororaoaki irouna, ao man kakeai mai iroumi bwaai ni kabane aika tiaki aron Atua” (Moronaai 10:32).
Aio bon te kakao ae tabu ni kaaniko nakon Natin te Atua. Ibukin ana Mwakuri ni Kamaiu, ti kona ni karekea te mwaaka ni mwakuri, ni kakeai mai iroura bwaai aika tiaki mai iroun te Atua inanon maiura, ao n namakina Ana tangira ae akea tokina. Ngkana ti karaoia, ti na kunea te rau ao te kukurei ae koaua.
Ngkana ko mwakuri i aon te kakao n nakomai nakon Kristo, ko na roko n ataa tabem ae tabu ni “kaoia ni kabane n nakomai nakon Kristo” (D&C 20:59) naba. Nanom e na kaonaki ma te tangira ni kairiia tabeman Nakoina bwa aonga ni kona ni karekea te kakabwaia n aron are ko a tia ni karekea ao n reitianako ni karekea.
Temanna te kairake n ataeinimwaane, Michael, e kakoroa nanon te tabe aio man buokan Jose, raoraona man te reirei.
Te bong teuana, Jose e titirakinna, “Michael, bukin tera ko kukurei n tainako?”
E taku Michael, “Bon bukina bwa I mwakuri.”
“Bukin tera ko mwakuri?”
“Ibukina I taua te nakoanibonga ao bon tabeu,” e roko te kaeka.
E taku Jose, “I tangiria ni kan ataa riki taekan te nakoanibonga.”
Michael e kaoa Jose nakon ana bootaki ni kakukurei te Ekaretia ao imwiina nakon ana bootaki te Ekaretia. N tokina Jose ao ana utu a reireinaki irouia mitinare ao a bwabetitoaki. E taku Jose, “Te mwakuri ni mitinare bon aan ara Ekaretia. Ngkana ti na tamaroa man raoiroi n arora ni katoabong, ngkanne naake a katobibiira a na noori arora ao n titiraki ibukira n aron are I karaoia. Michael bon te bwai ni mwakuri inanon ana babaire ae kakannato te Atua.”
Ngkai ko a roko ni kaniia te Uea, ko na karekea te tangira ni beku ibukiia tabeman n aron are e karaoia Michael. Ngkana ko karaoia, ko na kunea te berita aio iroun Beretitenti Henry B. Eyring, te Moan Kauntira n te Moan Beretitentii, bwa e koaua: “Ngkana ko anga nanom nakon kaoakiia aomata n nakomai nakon Kristo, nanom e na bitaki. Ko na karaoa Ana mwakuri ibukina. Ko na kunea bwa E kawakina ana berita n riki n ti teuana ma ngaia inanon am mwakuri. Ko na nakoina n ataia. Ao inanon te tai ao nakoina n riki n Aiarona ao ni kakororaoaki irouna.’”2
Anne nanon te botoniango n te ririki aio.