Tera ae I kona ni karaoia ngkana Irawawata (karoroaki) n aki maeka ni kaineti ma ana kainibaire te Ekaretiairouia tabeman kairake ake bon kaain te Ekaretia naba aika kakaonimaki? I aki kan tara n raoiroi riki nakoia aomata tabeman ke ni momotikitaeka.

Kam a tia ni karekea te ninikoria n tei ibukin ana kainibaire te Ekaretia, e ngae ngke e roko te rawawata mairouia tabeman kairake Aika Itiaki ake a atai kainibaire ao ake a taku n aia iango bwa ko tara ni kan raoiroi. E nga iai ngkanne ae e na karika te kaangaanga: te aki ongotaeka nakon ana tua te Uea ke ni kaan taraki bwa aongkoa te aomata ae ongeaba n tuua bwa e aonga n tara n raoiroi i mataia am roro? (Ngkai, ngkana a karawawatako bwa ko na karaoa te bwai ae ko namakinna i bon iroum bwa ko aki mwengaraoi ke are e urua te kainibaire are e kateaki irouia am utu nakon ae n te Ekaretia, ko kona n tei i bon ibukim man taekinna ni kangai bwa ko aki kan karaoia ao ko bubutia bwa a na karinea am namakin.)

E koaua, ko riai n taobara te kaangaanga anne ma te karaurau.“N aron te burabeti ae Aramwa ngke e tuanga natina ae mitinare ae Tiburon, “Ninikoria, man tai kairoro” (Aramwa 38:12). Akea kainnanoan te kabuakaka ae matoatoa ke te katei ni kamangori. Ko ti kona ni kaotiko nakoia aomata bwa kainibaire ra aika ko rinei ni maiuakin. Ao ngkana a tuangko kaain te Ekaretia aika a matoatoa bwa ko na urui ana kainibaire te Ekaretia aika kamatataki ao aika a tuai, uringa te bwai are e taekinna Beretitenti Dieter F. Uchtdorf, te Kauoman ni Kauntira n te Moan Beretitentii, e taku: “Riiki bwa te rao nakoia ni kabane, ma tai kamangori taekan am kainibaire”¹