Vaai i Totonu!

A o lumanai le Kerisimasi na faatau mai e ou matua se atigipusa na tumu i ni kopi o le Tusi a Mamona e tuuina atu i tagata. O iina na ou maua ai se manatu e ave nisi i le aoga ma foai atu o ni meaalofa i o’u faiaoga e toatolu.

Ina ua ou taunuu atu i le potu musika, sa ou vaaia lou faiaoga ma mafaufau, “Alu loa Sophia. Tuu atu se tasi ia te ia!” Sa ou savali lemu atu i lo’u faiaoga. Ae ou te le’i maua le lototele e avatu ia te ia le tusi.

Sa ou alu i se tulimanu o le potu ma tatalo ai ma le filemu tele. “Tama Faalelagi, ou te ole atu i Lau Afio e fesoasoani mai ia te au e tuu atu lenei tusi i lo’u faiaoga.” Ina ua uma la’u tatalo, sa ou maua se lagona malosi e tatau ona ou tuu atu le tusi ia te ia. Na faafuasei lava ona ou maua le lototele.

Sa ou alu atu ia te ia. Sa ia tilotilo mai ia te au, ma ou tuu atu ia te ia le Tusi a Mamona ma faapea atu, “Faiaoga, ou te alofa ia te oe mai le ta’ele o lo’u loto, ma ou te manao e tuu atu ia te oe lenei Tusi a Mamona!”

Sa ia tago i ai ma vaai i le faavaa. “Vaai i totonu!” na ou fai atu ai. Sa ia vaaia ni nai upu na ou tusiaina.

Sa ia fusi a’u ma fai mai, “Oka, Sophia, faafetai atu mo le aumaia o lenei [tusi] ia te au!”

Ina ua uma ona ou nofo i lalo, sa ia fai mai i le vasega, “Vaai i le mea na aumai e Sophia ia te au. O le a ou faitauina i le taimi o aso malolo!”

Ina ua ou taunuu i le fale, sa ou tamoe atu i lo’u tina ma faapea atu, “Mate mai la! Sa ou avatu i lo’u faiaoga se Tusi a Mamona.”

Sa ataata o ia ma fai mai, “Lelei tele! O oe o se faataitaiga maoae ia te au, Sophia.”

Sa tonu o le a ma tatalo e faafetai atu i le Tama Faalelagi mo le tuuina mai ia te au o le lototele e avatu ai le Tusi a Mamona i lo’u faiaoga.