“O le a se mea e tatau ona ou faia pe a tauemuina a’u i le aoga ona o le mulimuli i tulaga faatonuina o le Ekalesia?”

Pe a faifai mai tagata ia te au i la’u aoga, ou te mafaufau i le faaaliga lea sa maua e Liae e uiga i le fale tele ma le ateatea: “Sa tumu i tagata, o e matutua ma e iti, o tane atoa ma fafine; ma o o latou ituaiga ofu sa matua lelei lava; ma sa latou peiseai o faatauemu ma tusitusi mai o latou tamatamailima i e na o mai ma aai i le fua” (1 Nifae 8:27). O le a ou pei o Liae. O le a ou le faamaamuluina lava lenei ai uamea lea e tau atu i le ola e faavavau.

A o ma faamaeaina ma se uo le galuega faatino o le tulaga faatauaina o le mama mo le Alualu i Luma o le Tagata Lava Ia, sa ma faitauina le Tusi a Mamona i le aoga i le taimi o malologa. Na amata ona faifai mai lo ma faiaoga ma a ma uo ia i maua. E i ai taimi sa ou manao ai e taofia le faitauina, ae na le mafai ona ou tuua a’u tusitusiga paia i le fale. Sa faaauau pea ona ma faitau i le aoga, ma na iu lava na le toe ulagia i maua. Na amata ona sagisagi fiafia mai se tasi o a ma uo i le talalelei ma i le Alualu i Luma o le Tagata Lava Ia. Na ma tuu atu ia te ia le tamaitusi ma se fusi tolu, ma e talu mai lena taimi o loo ma ta’u atu pea ia te ia le talalelei. Na oo foi ina sagisagi fiafia mai lona tuagane i le talalelei. O loo la taufai faitauina uma le Tusi a Mamona.

I la’u aoga, e le toatele ni tamaiti aoga e masani i le talalelei. Ou te manatu o le mea sili e mafai ona e faia o le faaali atu lea i tagata o le auala e mafai ai e le ola i le talalelei ona aafia ai oe mo le lelei. E ala i le agalelei ma le faaaloalo e tusa lava po o a a latou tala e fai atu ia te oe, ia e faia lava se faataitaiga matagofie, ma o le a i ai ia i latou se faaaloalo sili mo oe ma ou talitonuga. O le manatuaina o au faataitaiga, e ono naunau ai na lava tagata e aoao atili e uiga i le talalelei i se taimi mulimuli ane!

O le taimi lava e te iloa ai faamanuiaga ia e mulimuli mai i le ola ai i tulaga faatonuina, e te le tau lagonaina le maasiasi pe a tauemuina. E mafai ona e aoao atu tulaga faatonuina ma faasoa atu se molimau o le ola ai i na mea. E mafai ona aoao lau tupulaga ma faatumulia i le Agaga ona ua e faasoa atu se molimau o le talalelei.

Mo mea e tutupu i le aoga, e fai mai tamaiti o la’u vasega ia te au e oo lava i au uo e fai ia ofu e le talafeagai ma le silafaga a le Atua. Latou te fai mai, “E tatau ona e foliga aulelei. E tatau ona e foliga ese.” O nisi taimi latou te fai mai faapea e tatau ona ou faagaloina o’u talitonuga ina ia mafai ona ou fetaui lelei i lenei lalolagi. Ae o la’u tali lava i taimi uma o le leai. Ou te iloa o le avea ai ma a’u moni lava, o le faamaoni lea ma tulaga ese mai le lalolagi. E le afaina pe afai latou te le fiafia mai ia te au mo le tagata ua ou avea ai. E le o faatatau i mea e ta’u mai e isi; e faatatau i le mulimuli i auala o le Tama Faalelagi.

Sa ou maua le tele o aafiaga e faatatau i le ola ai i tulaga faatonuina o le talalelei i le aoga. Sa ou aoaoina o se taimi sili lea ona lelei mo i tatou e faamalolosia ai a tatou molimau ma auai ai i le galuega faafaifeautalai. Soo se taimi lava ou te oo ai i se tulaga faapenei ma tausisia le maualuga o o’u tulaga faatonuina, ou te lagona le fiafia ia te au lava mo le faatinoina e pei ona finagalo le Atua ia ou faia. Aua lava nei tuu atu i se tasi se mafuaaga e masalosalo ai po o ai oe ma mea e te talitonu ai.