Mary R. Durham

A o faapaleniina manaoga o le olaga o le aiga, valaauga o le Ekalesia, galuega, ma isi tiutetauave i lona olaga faaipoipo, na matauina e Mary Richards Durham afai la te faamuamuaina ma lona toalua le Alii, o le a sologa lelei mea uma. “O se mea matagofie. Afai e te talitonu, o le a faamanuia oe e le Alii,“o lana tala lea.

O se manatu autu sa ia ta‘ua soo faafia. Sa valaauina o ia e auauna atu o se peresitene o Tamaitai Talavou a le uarota a o auauna atu lona toalua i le au peresitene o le siteki. Mulimuli ane sa la auauna atu faatasi ao pulefaamalumalu lona toalua i le Misiona a Iapani Tokyo mai le 2000 i le 2003. O lenei la o le a ia auauna atu o se fesoasoani lua i le au peresitene aoao o le Peraimeri a o amataina e lana tane lana auaunaga o se Fitugafulu Eria.

“A o tatou tauave faatasi ma le tasi ma le isi faapea foi ma le Alii, o le a faigofie atu mea uma,” o lana tala lea.

Na soifua mai Mary Lucille Richards i le aso 15 Mati, 1954, i Portsmouth, Virginia, ia L. Stephen Richards Jr. ma Annette Richards. A o tulitulimatagauina e lona tama lona faailoga faafomai, na siitia atu le aiga i Minneapolis, Minesota, ao le i nofoia le Aai o Sate Leki, Iuta.

O le faafaileleina e ala i le faatuatua ma le alofa o ona matua ma se aiga lautele toatele, na ia iloa e moni le talalelei. “O se aafiaga fiafia le ola ai i le talalelei. Sa lei faigata. Sa fiafia,“o le tala lea a Sister Durham.

I le avea ai ma se tamaitai talavou, sa faagaeetia o ia i le taua o le mauaina o se alii talavou agavaa e faaipoipo i ai ma sa faia o se mataupu o le tatalo i aso taitasi ma anapogi faalevaiaso. Ina ua maea le aoga maualuga, sa ia auai i le Iunivesite o Polika Iaga i se sikolasipi siva ma feiloai ai ma Mark Durham, o le sa auai i le Iunivesite o Iuta. “Sa vave ona ou iloaina lona agalelei,” o lana tala lea.

Sa faaipoipo le ulugalii ia Iuni 1974 i le Malumalu o Sate Leki. E toafitu le la fanau.

Na auauna atu Sister Durham o se peresitene o le Aualofa o le siteki, fesoasoani i le au peresitene o le Aualofa a le uarota, faiaoga o Aoaoga Faavae o le Talalelei, peresitene o Tamaitai Talavou a le uarota, ma le, sili ona lata mai nei, o se tasi o le au fono aoao o le Peraimeri.