E Tolu Malumalu ua Fofogaina Mai
Ua fuafuaina ni Malumalu mo Port-au-Prince, Haiti; Abidjan, Faga o Ivory; ma Bangkok, Taialani, na fofogaina mai e Peresitene Thomas S. Monson i le taimi o le sauniga i le taeao o le Aso Sa o le konafesi aoao. I tulaga taitasi, o le malumalu muamua lea o le a fausia i lona atunuu. O nofoaga tonu o malumalu, o le a fofogaina atu i se taimi mulimuli ane.
“E ofoofogia faamanuiaga ua faapopoloina mo au paia faamaoni i nei nofoaga, ma, e moni lava, i soo se mea o loo i ai malumalu i le lalolagi atoa,” na saunoa ai Peresitene Monson.
Malumalu o Port-au-Prince Haiti
O Haiti o se nofoaga mau lea i le silia ma le 20,000 o le Au Paia o Aso e Gata Ai i se malo pe tusa ma le 10 miliona tagata. Na amata aloaia le galuega faafaifeautalai i le 1980. O le malumalu aupito lata ane o le Malumalu o Santo Domingo Dominican Republic. E ui lava o loo i ai i le motu lava lea e tasi, ae o lena malumalu e toetoe lava o se aso le mamao e malaga ai.
Malumalu o Abidjan Faga o Ivory
O le Faga o Ivory (Côte d‘Ivoire) o se nofoaga mau i le silia ma le 27,000 tagata o le Ekalesia i se malo pe tusa ma le 20 miliona tagata. Na amata aloaia le galuega faafaifeautalai i le 1988. O le malumalu aupito lata ane o le Malumalu o Accra Ghana, lea e 340 maila (550 km) le mamao.
Malumalu o Bangkok Taialani
O Taialani o se nofoaga mau i le pe a ma le 19,000 o le Au Paia o Aso e Gata Ai i se malo pe tusa ma le 67 miliona. Na faatulagaina aloaia le Ekalesia i Taialani i le 1966. O le a auauna atu le Malumalu o Bangkok Taialani i le Au Paia o Aso e Gata Ai i Taialani, faapea foi ma tagata uma i Asia Sautesasae. O le taimi nei, o le malumalu aupito lata ane i Taialani o le Malumalu o Hong Kong Saina, e silia ma le 1,000 maila (1,610 km) le mamao.
Tala Fou o Malumalu Faaopoopo
Ua fofogaina atu ia fale tatala, faafiafiaga faaleaganuu, ma aso e tatala ai ia malumalu e lima mo le 2015 i Córdoba, Atenitina; Payson, Iuta, ISA; Trujillo, Peru; Initianapoli, Initiana, ISA; ma Tijuana, Mekisiko. O le a toe faapaiaina foi i le 2015 le Malumalu o Mekisiko Aai o Mekisiko lea na toe faafouina.
Mo le lua tausaga ua mavae, na taulai atu taumafaiga a le Ekalesia i le faamaeaina o malumalu ia na fofogaina atu muamua. E faaopoopo atu i malumalu fou e 3, ua 144 malumalu o loo faaaogaina, 5 o loo toe faafouina, 13 o loo fausiaina, ma le 13 lea na fofogaina talu ai nei o loo i ai i vaega eseese o sauniuniga ao lei amata le fausiaina.