Auaunaga mo Vaega o Uepisaite

Ina ua taia e le Afa o Pam le tamai motu o le Pasefika o Vanuatu, o le Au Paia o Aso e Gata Ai i Aukilani, Niu Sila—faatasi ai ma fesoasoani mai le Auaunaga o Fesoasoaniga Alofa a le Ekalesia—na aufaatasi e fesoasoani atu ia i latou na faataumaoia e le matagi. Na latou tuufaatasia ni pusa meaai e 2,000 ina ia fesoasoani i le toatele o le faitau aofai na aafia e mafai ai. Na tutumu ia koneteina taitasi i falaoamata, araisa, apa fualaau suamalie, pi, pisupo, i’a, masi, vine, saimini, susu pauta sukalaki, ma se talaapa. E mafai foi ona faaaoga ia koneteina mo isi faamoemoega, e pei o le aveina o vai.

I le Ripapelika Tominika ma Kanata, sa auai tamaitai o le Au Paia o Aso e Gata Ai i le faamanatuina o le Aso o Tamaitai Faavaomalo, o se gaoioiga e lagolagoina e Malo Aufaatasi. Na silia ma le 1,200 tamaitai na potopoto i falelotu o le Ekalesia i le tele o eria o le Ripapelika Tominika e faamamaluina tamaitai mo o latou sao e tele i le lalolagi. O taitai faalelotu, faalemalo, ma le militeli sa auai i lea gaoioiga, lea na aofia ai se polokalama o musika ma lauga. I Kanata, sa faailogaina foi e tamaitai o le Au Paia o Aso e Gata Ai lea aso i le faasoaina atu o faamatalaga e faatatau i le Aualofa, matauina o se “auala maoae mo le auaunaga i le lalolagi atoa.”

O la latou sini autu o le suiina o ni ofu se 100 mo tamaiti le tagolima i Aferika, ae ina ua maea, sa suiina e tamaitai o le Uarota o Coventry i Egelani le silia ma le 230 ofu. O ofu faigofie, na faia mai tagaaluga, e faigofie ona faamaeaina. O se tasi o tuafafine, e lei suisui muamua, sa mafai ona ia faia ni ofu se 3.

Na silia ma le 600 tagata na auai i se faigalotu a le nuu o tapuaiga eseese i le autu, o le saolotoga o tapuaiga na faatulagaina e le Siteki o Little Rock Arkansas, e aofia ai ma sui mai le Katoliko, Metotisi, ma nuu Faaisalama ma se tagata faasalalau o le leitio Faaevagelia. O le faigalotu o tapuaiga eseese na aofia ai foi ma se savali na pueina i le vitio mai le lutena kovana o le setete ma se tatalo faaiu mai le senatoa o le setete, e lotu Papatiso uma. Na fai mai i latou na faamaopoopoina, o lenei gaoioiga na fausiaina “ni alalaupapa o le malamalama.”