Muria na iVunau ka Lomani Ira na Tani

Ni da vakasamataka na loloma, e vakavuqa ni matai ni ka e dau votu mai noda vakasama na iyaloyalo ni veidomoni, jokeliti kei na senikau. Ia na loloma—na loloma dina—e titobu cake sara ka sega ni nanumi koya ga vakalevu cake mai na veika oqori. A bula ena vukuda o Jisu Karisito ka mate ena vukuda ena vuku ni Nona lomani keda. Na ka dina, na ivunau levu e rua mo lomana na Kalou ka lomana na tamata kecega (raica na Maciu 22:36–40). Ia ena rawa vakacava ni da vakaraitaka vei ira na tani ni da lomani ira?

A wasea o Peresitedi Uchtdorf na italanoa vakaibalebale nei Karisito ni rua na gonetagane, e dua e cakacaka vei tamana ka dua e sega. E dusimaka na iVakabula ni gonetagane duadua ga ka talairawarawa vei tamana e lomani koya vakaidina. Sa vakakina, ni da talairawarawa ki na ivakaro ni Kalou, eda vakaraitaka ni da lomani Koya ka vinakata me da lesu tale Vua.

Ia me da vakaraitaka vakacava na noda lomani ira na tamata kecega? E vakamacalataka talega vaqo o Peresitedi Uchtdorf: “Kevaka eda lomana dina na kainoda, eda na soli keda me da vukei ira ‘na dravudravua kei na luveniyali, na tauvimate kei ira sa vakaleqai tu.’ O ira era dau vakayacora na cakacaka sega ni nanumi koya oqo ni yalololoma kei na veiqaravi, o ira oqo na tisaipeli i Jisu Karisito.”

Ena gauna tale o raica kina na nomu itubutubu, dua na tacimu, se dua na itokani, vakasamataka mo veiqaravi ena vukudratou me vakaraitaka na nomu taleitaki iratou. Sega walega ni na vakamarautaki iratou kei iko, ia ena vakamarautaka talega na Tamamu mai Lomalagi.