“Sinasabi sa akin ng ilang tao na kailangan kong magkaroon ng mga kaibigan na iba ang mga pamantayan kaysa sa akin para mapalakas ko ang aking pamantayan. Totoo ba?”

Sa unang taon ko sa middle school kinabahan ako na baka hindi ako makahanap ng mga kaibigan na igagalang ang mga pamantayan ko. Pagkaraan ng maikling panahon naging mabuting magkaibigan kami ng isang kaklase ko, at sinabi ko sa kanya na Mormon ako. Tinanong niya ako tungkol dito, kaya binigyan ko siya ng polyetong Para sa Lakas ng mga Kabataan. Simula sa araw na iyon, hindi na siya nagmura sa harapan ko. Kung mga tunay na kaibigan ang mga kaibigan mo, igagalang nila ang iyong mga desisyon at tutulungan kang sundin ang iyong mga pamantayan.

Kung minsan mahirap labanan ang tukso kung sumasama tayo sa mga kaibigan na gumagawa ng mga maling pasiya o pinipilit tayong gumawa ng mga maling pasiya. Sinabi na sa atin ng mga propeta sa polyetong Para sa Lakas ng mga Kabataan na ang mga kaibigan ay “magiging impluwensya … sa inyong pag-iisip at pagkilos, at maging sa magiging pagkatao ninyo” ([2011], 16). Palagay ko dapat tayong magkaroon ng mga kaibigan na handang igalang ang ating mga pamantayan at magpakita pa ng interes sa atin sa pagsunod sa ating mga pamantayan.

Ang mga kaibigang hindi mo kapareho ang mga pamantayan ay maaari talagang pahinain at sirain ang iyong mga pamantayan. Nang una kaming lumipat sa bago kong paaralan, sinikap kong makibagay sa pamamagitan ng pagsasabi ng ilan sa mga bagay na sasabihin ng mga tao sa paligid ko. Muntik ko nang malimutan ang ilan sa mga pamantayan ko habang sinisikap kong gayahin ang lahat. Alam ko na ngayon na para mapatatag ang iyong mga pamantayan, kailangan mo ng mga kaibigan na sumusuporta at nakikiisa sa iyong mga pamantayan. Nagpapasalamat ako na kalaunan ay nakatagpo ako ng gayong uri ng mga kaibigan dahil ipinapaalala nila sa akin ang aking mga pamantayan.

Ang mga kaibigang iba ang mga pamantayan ay hindi nakapagpapatatag sa mga pamantayan mo, ngunit dahil kaibigan ka nila, mapapakitaan mo sila ng mabuting halimbawang susundan. Kapag may mga kaibigan ka na hindi kapareho ng sa iyo ang mga paniniwala, makahihikayat ito sa iyo na panatilihing mataas ang iyong mga pamantayan at tutulungan kang manindigan sa tama.

Kung hindi kapareho ng sa iyo ang mga pamantayan ng iyong mga kaibigan, maaaring mas mahirap patatagin ang iyong mga pamantayan. Ang pagbabasa ng Para sa Lakas ng mga Kabataan ay palagiang nakatulong sa akin na pumili ng mabubuting kaibigan na iginagalang ako. Ngayon ay naghahanda akong maglingkod sa misyon, at alam ko na ang mapalibutan ng mga tao na kapareho ko ang mga pamantayan ay nakatulong upang manatili akong tapat sa ebanghelyo.

Ang pagkakaroon ng mga kaibigan na may mabubuting pamantayan ang siya mismong nais mo. Nais mong palibutan ka ng mga kaibigang tutulong sa iyo na sundin ang mga kautusan at gaganyak sa iyo na mamuhay nang matwid. Manatiling nakahawak nang mahigpit sa gabay na bakal, na patungo sa punungkahoy ng buhay, hindi sa malaki at maluwang na gusali. Ang mapalibutan ka ng kasamaan ay hahantong sa mga tukso. Magkaroon ng mabubuting kaibigan na iimpluwensya sa inyo na ipamuhay ang ebanghelyo.

Matapos kaming lumipat ng pamilya ko sa isang bagong estado, patuloy kong ipinagdasal na makahanap ng mga kaibigang makakausap ko tungkol sa ebanghelyo. Habang nagdarasal ako, napanatag ako, at makalipas ang ilang buwan nagkaroon ako ng ilang kahanga-hangang mga kaibigan. Makakaasa ako sa kanilang suporta, at natulungan nila akong magkaroon ng mas malaking pagmamahal sa ebanghelyo. Alam ko na mahalaga ang mga kaibigan at magagawa nilang mas madali para sa atin na ipamuhay ang ebanghelyo.