Veika Vakasakiti mai nai Ka 186 ni Koniferedi Raraba Vakayabaki

A wasea vakadodonu sara o Peresitedi Thomas S. Monson e rua na itukutuku ena koniferedi raraba oqo. Ena mataka ni Siga Tabu, a vakadindinataka o koya na ituvatuva cecere ni Kalou baleta na nodra bulamarau na tamata kecega. A vakavulica na itavi bibi i Jisu Karisito ena ituvatuva ni veivakabulai oqo vakakina na noda itavi ena kena rawati na noda bulamarau ni sa inaki ni Kalou. (Raica na draunipepa e 80.) Ena soqoni raraba ni matabete, a vakamatatataka kina o Peresitedi Monson na veivakalougatataki ena lako mai ni da talairawarawa ki na ivakaro ni Turaga kei na kena vakamuri ena yalodina na Vosa ni Vuku (raica na draunipepa 78).

E drau vakaudolu na marama, goneyalewa, kei na goneyalewa lalai mai na yabaki walu era soqoni vata mai ki na Vale ni Koniferedi kei na veivanua e vuravura raraba me mai dolavi kina na ono na soqoni ni koniferedi raraba ni soqoni raraba ni marama.

Ena soqoni ni yakavi ni Vakarauwai, a vakatikori na emeritesi ki na va na Vakaitutu Raraba ni Vitusagavulu, a vakacegui kina e dua na Vitusagavulu ni iWasewase, ka kacivi e rua tale na Vitusagavulu ni iWasewase (raica na draunipepa 39). Ena Siga Tabu, a vosa vakacaucau kina o Elder Dale G. Renlund ena Kuoramu ni iApositolo Le Tinikarua me vakananumi kina o Elder Per G. Malm, e dua na lewe ni Vitusagavulu ka a takali ena i ka 26 ni Julai, 2016. (raica na draunipepa 121).

E dau vakayacori na koniferedi raraba ni Lotu ena veiyaono na vula, ena kena kaburaki bula tiko mai na Vale ni Koniferedi e 21, 000 na kena idabedabe mai Salt Lake City, Utah, me yacovi ira yani e milioni na tamata e vuravura raraba. A vakadewataki vakagusu na koniferedi ka sa tu talega ena onolaini ena 80 vakacaca na vosa ka tabaki vakaivola ena 34 na veimataqali vosa ena mekasini ni Lotu.