Ngaahi Kongakonga Lalahi mei he Konifelenisi Lahi Fakavaeuataʻu Hono 186

Vahevahe ʻe Palesiteni Thomas S. Monson ha ongo pōpoaki fakahangatonu lolotonga e konifelenisi lahí. ʻI he pongipongi Sāpaté, naʻá ne fakamoʻoni ia ki he palani maʻongoʻonga ʻa e ʻOtuá ki he fiefia ʻa e kakai kotoa pē. Naʻá ne akonaki fekauʻaki mo e konga mahuʻinga ne fakahoko ʻe Sīsū Kalaisi ʻi he palani ʻo e fakamoʻuí, kae pehē ki hotau fatongia ʻi hono maʻu e fiefia naʻe fakataumuʻa mai ʻe he ʻOtuá. (Vakai peesi 80.) Lolotonga e fakataha lahi ʻa e lakanga fakataulaʻeikí, naʻe fakamamafaʻi ai ʻe Palesiteni Monisoni e ngaahi tāpuaki ʻoku maʻu mei he talangofua ki he ngaahi fekau ʻa e ʻEikí kae pehē ki hono tauhi faivelenga e Lea ʻo e Potó (vakai ki he peesi 78).

Naʻe fakataha mai ha kau fafine, kau finemui pea mo ha fānau fefine ʻe lauafe ʻo kamata pē mei he taʻu valu, ki he Senitā Konifelenisí kae pehē ki ha ngaahi feituʻu ʻi he funga ʻo e māmaní, ke kamata e ngaahi fakatahaʻanga ʻe ono ʻo e konifelenisi lahí, ʻaki e fakataha lahi ʻa e kakai fefiné.

Lolotonga e fakataha ʻo e hoʻatā Tokonakí, naʻe fokotuʻu ai ha Kau Fitungofulu Taki Māʻolunga ki he tuʻunga mālōlō fakalāngilangí, tukuange ha Fitungofulu Fakaʻēlia ʻe taha, pea uiuiʻi ha ongo Fitungofulu Fakaʻēlia ʻe toko ua (vakai ki he peesi 39). ʻI he ʻaho Sāpaté, naʻe fakalāngilangiʻi ai ʻe ʻEletā Dale G. Renlund ʻo e Kōlomu ʻo e Kau ʻAposetolo ʻe Toko Hongofulu Mā Uá ha mēmipa ʻo e Kau Fitungofulú ko ʻEletā Per G. Malm, ne siʻi mālōlō he ʻaho 26 ʻo Siulai 2016 (vakai ki he peesi 121).

ʻOku fakahoko e ongo konifelenisi lahi ʻa e Siasí ʻi he māhina ʻe ono kotoa pē, ʻi he Senitā Konifelensí ʻi Sōleki Siti, ʻIutā ʻoku lava ke haofia ʻe ha kakai ʻe toko 21,000 pea ʻoku aʻutaki atu ia ki ha kakai ʻe laui miliona he funga ʻo e māmaní. Naʻe liliu e konifelenisí pea lava ke maʻu he ʻinitanetí ʻi ha lea fakafonua ʻe 80 tupu pea pulusi ia ʻi ha lea fakafonua ʻe 34 ʻi he ngaahi makasini ʻa e Siasí.