O Se Lagona Sili
E alala le tusitala i Colorato, ISA.
Ua sese Paulo. O le a se mea e mafai ona ia faia?
Ina ua alu ae Paulo mai le vai, sa faia e ia ma Tama ni ofu mago. Ona faaee lea e Tama ma Tamamatua, ma le epikopo o latou lima i luga o lona ulu ma faamauina o ia. O lenei ua avea o ia o se tagata o Le Ekalesia a Iesu Keriso o le Au Paia o Aso e Gata Ai.
“Ua ou lagonaina lava le fiafia tele,” o le tala lea a Paulo. Sa ia pai atu i lona fatu. “Iinei.”
Sa fusi mau o ia e Tina. “E mafua mai ona sa e mauaina le meaalofa o le Agaga Paia ina ua faamauina oe.”
Sa luelue le ulu o Paulo. Sa lei manao o ia e faia soo se mea e mafai ai ona alu ese lena lagona sili.
Ae o le aso lava na sosoo ai, na malepe ai i lona uso laitiiti o Carlo le vaalele meataalo a Paulo. Na sefeina e Paulo se tupe mo se masina atoa e faatau ai!
“Vaai i le mea ua e faia!” Na ee atu ai Paulo. “Aisea e le mafai ai ona e tuua au mea?”
“Ou te faamalie atu,” o le mumumumu lea a Carlo. Na tafe ifo loimata i ona alafau. “Atonu e mafai ona ta toe fauina.”
“O le a le toe tutusa lava!”
Na tamoe Carlo i fafo o le potu ma tagi.
Na maua e Paulo se lagona leaga i totonu. Sa ia iloaina o le a le ee atu Iesu pe ita. Pe o le a ia toe mauaina ea lena lagona ina ua uma lona papatisoga?
“Sa ou folafola atu o le a ou taumafai e avea faapei o Iesu,” sa ia tau atu ia Tina, ma lona leo ua gatete. “Ae ua uma ona ou sese.”
“Ua e faia se mea sese,” le fai atu lemu a Tina. “Ae o Iesu foi na tuuina mai ia i tatou se ala e toe maua le Agaga Paia faatasi ma i tatou pe a uma ona tatou faia se mea sese.”
Na iloa e Paulo le mea o le a ia fai mai. “Ua ou iloa. Salamo. Ou te talosaga atu mo se faamagaloga.”
Sa luelue le ulu o Tina. “Ona oo lea ina e ai i le faamanatuga, o le a faafouina le folafolaga na e faia e mulimuli ia Iesu. Ma o le a e matuai mama lava e pei ona e i ai ina ua uma ona e papatiso ma faamauina.”
Na alu atu Paulo e sue Carlo. “Ou te faamalie atu sa ou ee atu ia te oe,” o lana tala lea. “Sei o ta toe fauina faatasi le vaalele.”
Sa ataata Carlo, ma na lagonaina e Paulo e pei sa ia faia le mea semanu e fai e Iesu. Ina ua ia faia lana tatalo i lena po, sa ia ole atu i le Tama Faalelagi e faamagalo mai o ia ma fesoasoani ia te ia ia sili atu ona agalelei ia Carlo. Sa i ai se filemu mafanafana i lona loto.
I lena aso Sa i le lotu, sa atili le gauai atu o Paulo i tatalo o le faamanatuga. Sa ia faalogologo ma le faaeteete i upu. Ao ia tagofia le areto ma le vai, sa ia lagonaina le alofa o le Tama Faalelagi mo ia. Na sa’o lava Tina. Na toe maua mai lena lagona sili!