Ko Hono ʻAi e Konifelenisí ke Hoko ko e Konga ʻEtau Moʻuí

Peesi 86: Naʻe fakaafeʻi kitautolu ʻe Palesiteni Thomas S. Monson, ke tau lau e Tohi ʻa Molomoná he ʻaho kotoa pē, mo ne palōmesi mai, “ʻE fakahaaʻi atu ʻe he Laumālie Māʻoniʻoní ʻa hono moʻoní kiate koe.” Makehe mei hoʻo ako fakatāutahá, te ke lava ʻo ʻulungaanga ʻaki haʻamou ako fakaʻaho e Tohi ʻa Molomoná mo ho fāmilí. Te mou lava foki ʻo fakafaivaʻi ha ngaahi konga pe fanga kiʻi vaʻinga ke tokoni ke mou manatuʻi ai e ngaahi vēsí mo e talanoá. Hū ki he friend.lds.org pea vakai ki he ʻū makasini Liahona 2016 ke maʻu ai e ngaahi talanoa, saati laukonga mo ha ʻū meʻa lahi ange ʻo fekauʻaki mo e Tohi ʻa Molomoná.

Peesi 117: Ko e fakamatala ʻa ʻEletā Gary E. Stevenson ki he founga ne fakafanongo ai ʻene tamaí ki he Laumālie Māʻoniʻoní pea fakahaofi ia mei ha ngatá. Kole ki hoʻo mātuʻá pe ʻe lava ke mou aleaʻi fakafāmili e fehuʻi, ʻE tokoniʻi fēfē koe ʻe he Laumālie Māʻoniʻoní? Vahevahe ha ngaahi taimi kuo fakatokanga, fakafiemālieʻi pe fakamoʻoni atu ai e Laumālie Māʻoniʻoní. Te ke lava ʻo tohiʻi kinautolu ke faʻu ʻaki ha tohi.

Peesi 87: Ko e akoʻi mai ʻe Sisitā Joy D. Jones te ke lava ʻo teuteu ke fai e ngaahi fuakava toputapú ʻamuiange ʻi hoʻo ako ke tauhi he taimí ni hoʻo ngaahi palōmesí. Fokotuʻu ha taumuʻa peá ke palōmesi ke muimuiʻi ia. Kole ki haʻo kaungāmeʻa ke ne toutou vakaiʻi atu kiate koe pe ʻokú ke tauhi hoʻo palōmesí.

Peesi 90: Naʻe vahevahe ʻe ʻEletā Yoon Hwan Choi ha faleʻi mei heʻene tamaí: “ʻOua ʻe toe sio holo, sio ki ʻolunga!” ʻOku faʻa tohoakiʻi ʻetau tokangá he taimi ʻe niʻihi pea ngalo ai ke tau tokanga taha pē ki he Tamai Hēvaní mo Sīsū Kalaisi. Ko ia, manatuʻi ke ke sio hake! Te ke lava ʻo tautau ha tā ʻo Sīsū ʻi ho lokí. Hu ki tuʻa ʻo sio ki he langí. Toʻo ha kiʻi momeniti lōngonoa he ʻaho kotoa pē ke fakakaukau ai ki he Tamai Hēvaní mo Sīsū mo ongoʻi e Laumālié.

Peesi 93 mo e 117: Kuó ke fehuʻi loto nai: Ko e hā ha founga ke nofoʻia maʻu ai pē au ʻe he Laumālie Māʻoniʻoní? Te u ʻiloʻi fēfē ʻa e Laumālie Māʻoniʻoní? ʻOku tokoniʻi fēfē au ʻe he Laumālie Māʻoniʻoní? Naʻe tali mai ʻe ʻEletā Ronald A. Rasband mo Gary E. Stevenson e ongo fehuʻí ni pea mo ha ngaahi fehuʻi kehe. Naʻe pehē ʻe ʻEletā Rasband, “ʻOku tau maʻu e fatongia toputapu ke ako ke fakatokangaʻi Hono ivi tākiekiná ʻi heʻetau moʻuí pea tali ki ai.” Te ke lava fēfē ʻo fakahoko e fatongia ko iá?

Peesi 33: Naʻe lau mai ʻe ʻEletā Ulisses Soares ha konga ʻo e kaveinga ʻo e Mutualé: “Kole ʻi he tuí, ʻo taʻe-fakataʻetaʻetui. He ko ia ʻoku fakataʻetaʻetuí ʻoku hangē ia ko e peau ʻo e tahí ʻoku fakateka mo felīlīaki ʻe he matangí” (Sēmisi 1:6). Ko e hā ha founga te ke lava ʻo fakaʻehiʻehi ai mei he fakataʻetaʻetuí? Kamata ʻaki hono fakamālohia hoʻo tui kia Sisu Kalaisí. Ako lahi ange fekauʻaki mo Ia. Manatuʻi e ngaahi taimi kuó ke ongoʻi ai ʻene ʻofá mo e melinó.

Peesi 86 mo e 9: Naʻe fakaafeʻi kitautolu ʻe Palesiteni Thomas S. Monson, “Lau fakaʻaho muʻa e Tohi ʻa Molomoná, kapau ʻoku teʻeki ai ke ke fai ia.” Pea naʻe fehuʻi ʻe Sisitā Carol F. McConkie ʻo pehē: “ʻOku tau tuku nai e telefoní ki he tafaʻakí, pe lisi ʻo e ngaahi meʻa taʻefaʻalaua ke faí, pea mo e hohaʻa ki he ngaahi meʻa ʻo e māmaní? ʻOku hanga ʻe he lotú, akó mo e muimui ki he folofola ʻa e ʻOtuá, ʻo fakaafeʻi mai ʻEne ʻofa faifakamaʻa mo faifakamoʻuí ki heʻetau moʻuí.” Palani ha taimi ʻi he ʻaho kotoa pē ke lau ai e Tohi ʻa Molomoná, pea ʻai ha kiʻi tohi fakamanatu ʻi hoʻo pepa palaní pe ʻi hoʻo telefoní.

Peesi 62: Ko e hā hoʻo ngaahi taumuʻa ki hoʻo moʻuí? Naʻe akoʻi ʻe ʻEletā M. Russell Ballard, ʻoku lelei ke ʻi ai haʻatau ngaahi taumuʻa ki heʻetau ngāué, fāmilí, pea pehē ki he sipotí mo e ngaahi manakó, ka “ʻoku totonu ke fenāpasi ʻetau ngaahi taumuʻa mahuʻinga taha mo lahi tahá mo e palani taʻengata ʻa e Tamai Hēvaní.” ʻOku fenāpasi fēfē ʻa hoʻo ngaahi palaní mo e palani ko ia ʻa e Tamai Hēvaní maʻaú? Ko e hā e founga ʻe lava tokoni ke nofotaha ai hoʻo tokangá, ʻi he taumuʻa ke nofo taʻengata mo e Tamai Hēvaní mo Sīsū Kalaisi?

Peesi 39: ʻI he konga kimuʻa ‘o e taʻu ní, naʻe fakaafeʻi ai ʻe Palesiteni Russell M. Nelson ʻa e kakai lalahi kei talavoú, ke “fakatapui ha konga [honau] taimí ʻi he uike kotoa ke ako ʻa e meʻa kotoa pē naʻe folofola mo fakahoko ʻe Sīsū ʻoku lekooti ʻi he [ngaahi folofola ʻoku fakaʻaongaʻi ʻe he Siasí]” (“Kau Palōfitá, Takimuʻá, mo e Fono Faka-ʻOtuá” [fakataha lotu fakaemāmani lahi maʻá e kakai lalahi kei talavoú, Sanuali 8, 2017], broadcasts.lds.org). Naʻá ne toutou fai e fakaafe ko ʻení ʻi he konifelenisi lahí ko e taha ʻo e ngaahi ʻelemēniti mahuʻinga ʻe fā ki hono tohoakiʻi mai e mālohi ʻo e Fakamoʻuí ki heʻetau moʻuí. Ako e lea ʻa Palesiteni Nalesoní ke ʻiloʻi e founga te ke lava ai ʻo maʻu e “mālohi feʻunga ke fuesia e ngaahi kavenga mafasiá, meʻa fakatutá, mo e ngaahi ʻahiʻahi ʻo hotau kuongá.”

Peesi 100 mo e 26: Te ke fie maʻu nai ha fakahinohino ki hoʻo moʻuí? Naʻe akoʻi ʻe ʻEletā Dallin H. Oaks ʻo pehē, “Koeʻuhi ʻoku tau ʻiloʻi e moʻoni ki he Toluʻi ʻOtuá mo hotau vā fetuʻutaki mo Kinautolú, taumuʻa ʻo e moʻuí, mo e natula ʻo hotau ikuʻanga taʻengatá, ʻoku tau maʻu ai e fakahinohino aofangatukú mo e palani pau ki heʻetau fononga fakamatelié.” ʻOkú na akoʻi fakataha mai mo ʻEletā Weatherford T. Clayton, ʻe lava ke tokoniʻi ʻe he ʻiloʻi ko ia ki he palani ʻo e fakamoʻuí, ʻa hotau ngaahi faingataʻa ʻi he kuongá ní. Ako ʻena ngaahi pōpoakí pea kole ki he Tamai Hēvaní ʻa e founga ʻe tokoni ai ʻa e ngaahi moʻoni taʻengatá ke maʻu ha fakahinohino ki hoʻo moʻuí.

Peesi 104: ʻE lava ke ueʻi ʻe he ilifiá e niʻihi kehé, ka naʻe akoʻi mai ʻe Palesiteni Dieter F. Uchtdorf “he ʻikai ke teitei liliu kitautolu [ʻe he ilifiá] ke tau hoko ko ha kakai ʻoku ʻofa he moʻoní mo loto ke talangofua ki he Tamai Hēvaní.” ʻE lava fēfē ke hoko ʻa e ʻofa haohaoa ʻa Kalaisí ko e “faitoʻo fakalangi” ki hoʻo manavaheé?

Peesi 86: Naʻe pehē ʻe Palesiteni Thomas S. Monson ʻi heʻetau ako mo fakalaulauloto fakaʻaho ki he Tohi ʻa Molomoná ʻi he faʻa lotú, “te tau ʻi ha tuʻunga ai ke fanongo ki he leʻo ʻo e Laumālié, ke tekeʻi e ʻahiʻahí, ke ikunaʻi ʻa e veiveiuá mo e ilifiá, pea maʻu ha tokoni fakalangi ʻi heʻetau moʻuí.” Fokotuʻu ha taumuʻa fakatāutaha pe fakafāmili ke lau e Tohi ʻa Molomoná ʻi he ʻaho kotoa.

Peesi 39: Kau ʻi hono fakahoko e tukupā naʻe ʻomi ʻe Palesiteni Russell M. Nelson ki he kakai lalahi kei talavoú (vakai ki ʻolunga ki he “Kakai Lalahi Kei Talavoú”). Te ke fakaʻaongaʻi fēfē ʻa e tukupaá ni kiate koe mo ho fāmilí? Aleaʻi ʻa e ngaahi tāpuaki ʻoku maʻu mei he ako lahi ange fekauʻaki mo e Fakamoʻuí.

Peesi 93 mo e 117: ʻI hoʻo lau ʻa e ngaahi lea ʻa ʻEletā Ronald A. Rasband mo ʻEletā Gary E. Stevenson, kumi ha ngaahi founga ke maʻu ai e Laumālié he taimi kotoa pē, kae pehē ki he founga ʻe tokoniʻi ai koe ʻe he Laumālié. Fekumi ki ha ngaahi founga ke fakatupulaki ai ʻa Hono ivi tākiekiná ʻi hoʻo moʻuí.

Peesi 39 mo e 62: Ko hono fakalotolahiʻi ʻe Palesiteni Russell M. Nelson mo ʻEletā M. Russell Ballard ʻa e kāingalotú ke nau ako ʻa e “Ko e Kalaisi Moʻuí: Ko e Fakamoʻoni ʻa e kau ʻAposetoló” (vakai ʻi loto he takafi muʻá). Naʻe pehē ʻe ʻEletā Ballard, “Tuku hano tatau ʻi ha feituʻu te ke lava ʻo sio ki ai, pea tuku ha taimi ke vakaiʻi e fakamatala takitaha ʻoku ʻi he fakamoʻoni fakalaumālie ko ʻeni ʻo Kalaisí.” Lau fakataha mo e fāmilí ʻa e “Ko e Kalaisi Moʻuí” pea aleaʻi e ngaahi meʻa kuo mou akó.

Peesi 127 mo e 97: ʻOku akoʻi mai ʻe ʻEletā Quentin L. Cook ʻoku langa “māmālie [ʻa e fakavaʻe ʻo ʻetau tuí]—ʻi he ʻotu ki he ʻotu, mo e aʻusia ki he aʻusia, faingataʻa ki he faingataʻa pea mo e lavameʻa ʻe taha ʻi he taimi taki taha.” Naʻe pehē ʻe ʻEletā L. Whiney Clayton, “ko hono tōʻonga moʻui ʻaki ko ia e fanga kiʻi ngāue pe ʻulungaanga fakaʻaho ʻo e tuí, ko e founga lelei taha ia ke fakamālohia ai kitautolu mei ha faʻahinga haʻahaʻa pē ʻo e moʻuí.” Ko e hā te ke lava ʻo fai fakaʻaho ke fakamālohia ai e fakavaʻe hoʻo tuí?