Te utuafare

Matou, te Peresideniraa Matamua e te Pŭpŭ no te Tino Ahuru Ma Piti Aposetolo no Te Ekalesia a Iesu Mesia i te Feia Mo‘a i te Mau Mahana Hopea Nei, te faaite papû nei matou e ua haamauhia te faaipoiporaa i rotopu i te tane e i te vahine e te Atua e ua riro te utuafare ei tumu no te opuaraa a Tei Hamani no te hopea mure ore o Ta’na mau tamarii.

Ua hamanihia te mau taata atoa—te tane e te vahine—i te hoho‘a o te Atua. Ua riro tatou tata‘itahi ei tamaiti e ei tamahine varua herehia e na metua i te ra‘i ra, e no reira, e huru e e hopea hanahana to tatou tata‘itahi. E tuhaa faufaa rahi te riroraa ei tane e ei vahine no te ihotaata e no te tumu o te taata tata‘itahi i te ao na mua a‘e, i te tahuti nei, i te ao amuri atu.

I roto i te ao na mua a‘e, ua ite e ua haamori na ho‘i te mau tamaiti e te mau tamahine varua i te Atua to ratou Metua Mure Ore e ua farii i Ta’na faanahoraa e ti‘a ai i Ta’na mau tamarii ia roaa i te hoê tino i‘o e te ivi e ia roaa ho‘i te iteraa rau i te tahuti nei no te haereraa i mua e tae atu ai i te maitai-roa-raa e ia faatupu ho‘i i to ratou hopea hanahana ei mau taata ai‘a no te ora mure ore. E faati‘a te faanahoraa hanahana no te oaoa i te mau aufetiiraa ia vai tamau noa i muri a‘e i te pohe. Te mau oro‘a e te mau fafauraa mo‘a o te ti‘a ia ravehia i roto i te mau hiero mo‘a e faati‘a te reira i te mau taata ia ho‘i faahou atu i mua i te aro o te Atua e i te mau utuafare ia tahoêhia e amuri noa’tu.

Te ture matamua ta te Atua i horo‘a ia Adamu e ia Eva o to raua ia ti‘araa ei metua, ei tane e ei vahine faaipoipo. Te faaite papû atu nei matou e, te faaueraa a te Atua i Ta’na mau tamarii no te fanau faarahi e no te faaî i te fenua, te mana noa nei â ïa. Te faaite atu nei â matou e, ua faaue mai te Atua e, te mana mo‘a no te hamaniraa i te taata ia faaohipahia ïa i rotopu ana‘e iho i te tane e i te vahine o tei faaipoipohia mai te au i te ture.

Te faaite papû nei matou te huru o te hamaniraa i te ora i te tahuti nei ua haamauhia ia e te Atua. Te haapapû nei matou i te huru mo‘a o te ora e to’na faufaa rahi i roto i te faanahoraa mure ore a te Atua.

E hopoi‘a hanahana ta te tane e ta te vahine faaipoipo i te hereraa e i te poihereraa te tahi e te tahi e ta raua mau tamarii. « Te tamarii ra, e tufaa ïa no ô mai ia Iehova ra » (Salamo 127:3) Tei te mau metua te hopoi‘a mo‘a i te aupururaa i ta ratou mau tamarii na roto i te here e te parau ti‘a, i te haapa‘oraa i to ratou mau hinaaro i te pae tino e i te pae varua, e i te haapiiraa ia ratou i te here e i te tavini te tahi i te tahi, te haapa‘oraa i te mau faaueraa a te Atua, e te riroraa ei feia faatura i te mau ture o te fenua e faaeahia ra e ratou. Te mau tane e te mau vahine faaipoipo—te mau metua vahine e te mau metua tane—e haavahia outou i mua i te aro o te Atua mai te au i to outou haapa‘oraa i taua mau hopoi‘a ra.

Ua haamauhia te utuafare e te Atua. E mea faufaa te faaipoiporaa i rotopu i te tane e i te vahine i roto i Ta’na faanahoraa mure ore. E ti‘araa to te mau tamarii ia fanauhia i roto i te faaipoiporaa, e ia aupuruhia e te hoê metua tane e te hoê metua vahine o te faatura nei ma te tuutuu ore i te mau fafauraa no te faaipoiporaa. E mea papû a‘e te oaoa i roto i te oraraa utuafare ia faatumuhia te reira i ni‘a i te mau haapiiraa a te Fatu ra o Iesu Mesia. Te manuïa o te mau faaipoiporaa e o te mau utuafare ua faatumuhia ia e ua haamauhia ia i ni‘a i te mau parau tumu no te faaroo, te pure, te tatarahapa, te faaoreraa hara, te faatura, te here, te aroha, te ohipa, e te mau faaoaoaraa maitai. Na roto i te faaueraa hanahana, ua titauhia i te mau metua tane ia faatere i to ratou utuafare na roto i te here e te parau ti‘a, e e hopoi‘a na ratou ia imi i te ora e te parururaa no to ratou utuafare. Te hopoi‘a matamua roa a te mau metua vahine o te aupururaa ia i ta ratou mau tamarii. I roto i teie mau hopoi‘a mo‘a, e mea ti‘a i te mau metua tane e i te mau metua vahine ia tauturu te tahi i te tahi ei mau hoa aifaito. E riro te huma, te pohe e aore râ te tahi atu mau ati e titauhia i te tahi atu faanahonahoraa taa ê. E mea ti‘a i te mau utuafare fetii ia horo‘a i te tauturu mai te mea e hinaarohia.

Te faaara atu nei matou i te mau taata atoa o tei ofati i te mau fafauraa no te viivii ore, o tei hamani ino i to ratou hoa faaipoipo e aore râ i ta ratou mau tamarii, e aore râ tei ore i rave i ta ratou hopoi‘a utuafare, ia tae i te hoê mahana e ti‘a mau â ratou i mua i te Atua ia haavahia. Oia atoa, te faaara nei â matou e, na te vavahiraa o te utuafare e hopoi mai i ni‘a i te mau taata tata‘itahi, te mau oire, e te mau nunaa i te mau ati rahi i tohuhia na e te mau peropheta i tahito ra e i teie anotau.

Te ti‘aoro atu nei matou i te huiraatira e ti‘araa e te feia faatere o te hau na te ao atoa nei ia rave i teie mau rave‘a o tei faaitehia no te haamau e no te haapuai i te utuafare ei niu mau no te sotaiete.