Iren Mahsen en Presidensi Keieu, Epreil 2018
Ni Atail pahn Ehupene oh Wenla Mwowe
Sang Presiden Russell M. Nelson
Riei ohl oh lih akan, I pereniki ahi patehng kumwail menseng wet. Rahn pahieu samwalahro kitail sarepedi emen ohl lapalap, soukohp en Koht—Presiden Thomas S. Monson. Sohte koasoai me kak en pwungehng wen doadoahk oh wiewia mwahu en ah mour. I pahn kesempwaliki ehupene me se ahnikipenehier ni kaping mwuledeki soahng kan koaros me e padahkiongie kohkohlahte. Met kitail pahn kilenglahng dahme mihmi mwohtail ni pwoson unsek en atail Kaun Sises Krais, me Sapwellimaniki Mwomwohdiso wet.
Rahn riau samwalahro Wahnparon koaros me ieias tuhpene nan pere keieu powe en Tehnpas Sarawi en Salt Lake. Wasao me irail wiahda koasoandi ehu me irail koaros pwungkipene, iei keieu, irail en pwurehng koasoanehdi Presidensi Keieu en ansouwet oh, keriau, me I pahn wiahla Presiden en Mwohmwohdiso wet. Koasoai kan sohte itar en kawehwehiong kumwail duwen pepehm me I ahniki ong Riei ohl akan— Rierail ohl akan me kolokol manaman koaros en prihsduhd me kopwurpwurdohr sang rehn Soukohp Joseph Smith nan mwehi wet—niarail pwilikihdi pehrail kan pohn moangeiet oh kasarawihiehla pwe ien wiahla Presiden en Mwomwohdiso wet. E wia mehkot sarawi oh kesempwal ehu.
Iei me wialahr ai pwukoah en pilada ihs me Kauno ketin kaunopadahr pwe en wia ei tungoal sounsawas akan. Ia mwomwen ahi pahn pilada mehte riemen sang nan pwungen Wahnparon Ehk-riemeno, ni ahi poakong emen emen irail? I ahniki kaping laud ong Kauno pwehki pasapeng en ai kapakap akan. I pil ahniki kaping laud pwehki Presiden Dallin Harris Oaks oh Presiden Henry Bennion Eyring ara inengieng en iangie papah ni ara wia Sounsawas Keieu oh Sounsawas Keriau. Presiden Dieter F. Uchtdorf pwuralahng nan dewe nan Pwihn en Wahnparon Ehk-riemeno. E aledier pwukoah laud kei me e warohng kak wia.
I kapingkiong ih oh Presiden Eyring pwehki ara sawas laud me ira wia ansou me ira wia sounsawas ong Presiden Monson. Ira udahn koahiek, poadidi, oh ngoang. Se inenen ahniki kaping laud ong ira. Ira ahniki ineng en papah wasah kan me anahnepara inenen laud ie ansou wet.
Presiden Oaks pil wialahr Presiden en Pwihn en Wahnparon Ehk-riemeno sang ni ah wia keriemen en werei nan ah pwukoahn Wahnparon. Eri, pwehki e pil ahnikiher pwukoah nan Presidensi Keieu me koasoandi sangehr Mwomwohdiso, Presiden M. Russell Ballard, me kesilimenih pahn uhd papah nin duwen Weliepen Presiden ong pwihno. Presidensi Keieu pahn patehng Wahnparon Ehk-riemeno pwehn kapwaiada kupwuren Kauno oh kamwakidewei Sapwellime doadoahk sarawi.
Se kapingki amwail kapakap akan. Me kodohng kiht sang wasa koaros nan sampah. Ni menseng en mwurin rahn me Presiden Monson kapelsalehdala, kapakap ehu ahpw kohsang rehn emen kisin pwutak sounpar pahieu me adaniki Benson. Wasah kis me I men wadek sang nan nein ah nohnohu kisin likou ong ahi pwoud, Wendy. Benson kapakapki, “Sahm Nanleng, kalahngan en komwi pwehki Presiden Thomas S. Monson pahn pwurehngehr kilang ah pwoud. Kalahngan en komwi pwehki aht soukohp me apwtehn pilipilda. Sewese ih pwe en kak ahniki eimah oh dehr ahniki masepwehk pwehki pwukoah kapw me e sapwellimanikier. Sewese ih en kak keirda ni roson mwau oh kehlail. Sewese ih pwe en kak ahniki manaman pwehki sang ni prihsduhd me e sapwellimaniki. Oh sewesei kiht pwe sen kak mwahu ansou koaros.”
I kapingkiong Kauno pwehki soangen seri menet oh nohno pahpa kan me kin mehleliong arail inou kan en wia me pwung, pwukoahn nohno pahpa kan—ong nohno pahpa kan koaros, sounpadahk kan, oh toweh kan koaros me toutoukilahr arail mehn wisik ahpw kin nanantihongete ahniki ineng en papah. Ni mehlel, I ahniki kaping laud ong emen emen kumwail koaros.
Kauno Ketin Katakatangahier Sapwellime Kaweid
Ni atail pahn ehupene oh wenla mwowe, I lukei kumwail en medewe soangen koasoandi mwahu me Kauno ketin katangahkihwei Sapwellime Mwomwohdiso. Ansou me emen Presiden en Mwomwohdiso kin kapelsalehdala, e sohte pahn wia mehkot apwal en wehwehki ihs me pahn uhd papah nan pwukoah laud wet. Sohte usuhs sohte kampein, ahpw irail kan me pilipildahr en wia pwukoah doadoahk sarawi wet me kin kohpene ni meleilei oh koasoane, dahme Kauno ketin koasoanehdier.
Nan ehu ehu rahn me Wahnparon men kin wie papah e kin wia rahn ehu en esehla oh kaunopada ong pwukoah teiken me pahn kin pwarada mwuhr. Wahnparon men kin papahki lel pohnangin sounpar eisek samwa pwe en kak mwekid sang nan dake tikitik ong nan dake laud en nan pwonopwono. Ni ansouo, e pahn esehlahr soahng koaros me pid doadoahk kan en Mwomwohdiso wet. E pil pahn esehla aramas akan en sampah wet, iangahki poadeparail kan, arail tiahk, arail lokaiah kan sang ni eh pahn seiseilokiseli pwukoah kan nan sampah. Sang ni wiepe wet me kin kasalehda pweidahn doadoahk kan me irail kaun akan en Mwomwohdiso wet kin wia kin weksang mehlel en mehteikan. I ese me sohte mehkot duwehte. E sohte pahn kopwuriamwei ong kitail, pwehki Sapwellimen Koht Mwomwohdiso met. E sohte kin doadoahngki koasoandi en aramas.
I papah nan Pwihn en Ehk-riemeno pahn kaweid en Presiden limmen en Mwomwohdiso. I kilangehr en emen emen Presiden ah kin alehdi kaudiahl oh kin doadoahngki. Ansou koaros Kauno pahn kin kaweid oh kamwakid Sapwellime soukohp akan. Kauno ketin katakatangahier sapwellime kaweid kan…Kiht kan me kasarawihlahr pwe sen kadehdeh Mwar sarawio ong sampah pahn wenla mwowe oh raparapahki pwe sen esehla ia Kupwure oh idahwehn.
Weweid pohn Ahl en Inou
Met, I indahiong kumwail ong emen emen tohn Mwomwohdiso, en weweidte pohn ahl en inouo. Amwail inou en idawehn Sounkomouro sang ni inou sarawih kan me kumwail wiahiong Ih oh pil kolokol inou sarawih kan pahn ritingadahng kumwail wenihmw en kapai koaros en palingehn me langadahng ohl, lih, oh serih kan wasa koaros.
Ni aht wia Presidensi kapw, se men tepsang ni imwio. Ong ni kahrepe wet, se koaskoasoaiong kumwail rahnwet sang ni tehnpas sarawi. Ni imwilahn dahme emen emen kitail kin nanantiong iei en wiahdi atail inou kan ki manaman en nan tehnpas sarawi en Kauno, katengteng pene nin duwen peneinei kan, kapwaiada inou sarawih kan me kitail wiahda nan tehnpas sarawi me pahn karehiong kitail en kak iang alehdi kapai keieu laud en Koht—me iei mour soutuk. Tiahk sarawih kan en tehnpas sarawi oh inou sarawih kan me kumwail wiahda wasao wia mehn kakehlepen amwail mour, amwail inou sarawi oh peneinei, oh amwail kak en powehdi kasongosong kan me pahn kohsang rehn tepelo. Amwail kaudok nan tehnpas sarawi oh amwail sawas ong kadaudokamwail kan wasao pahn kapai kumwailda sang ni eh pahn kalaudehla pein amwail kaudiahl oh meleilei oh pahn kakehlakahla amwail inou en mihmihdihte pohn ahl en inouo.
Met, ma kumwail kahkasangehr pohn ahlo, I men lukei kumwail ni koapwoaroapwoar unsek en nan ahi mohngiong kumwail menlau pwurodo. Dahme amwail kapwunod, dahme amwail kahpwal, mie douamwail wasa kiset, nan Sapwellimen Kauno Mwomwohdiso. Kumwail oh dih me saik ipwidi kan pahn kapaida sang amwail wiewiah kan met pwe en pwurala oh keid pohn ahl en inouo. Samatail Nanleng kin kesempwaliki Sapwellime serihkan, oh E ketin kupwurki emen emen kitail en pwurala Reh. Met wia pwukoah keieu laud en Mwomwohdiso en Sises Krais en Souleng en Imwin Rahn-akan—en sewese emen emen kitail en kak pwuralahng atail wasahn kousono.
I kiong kumwail ahi limpoak—limpoak melaudkilahr sounpar eisek samwa ni ai tuhong kumwail, iang kumwail kaudok, oh papah kumwail. Atail pwukoah sarawi iei en kohwei nan wehi koaros, peneinei kan, ni soangen lokaia tohrohr teikan, oh aramas koaros, sawasawas en kaunopada sampah ong ni Ketdo Keriau en Kauno. Kitail pahn wia met ni pwoson Kaun Sises Krais, ni atail ese me Ih me kakaun. Iei met me wia Sapwellime doadoahk oh Sapwellime Mwomwohdiso. Kitail wia Sapwellime soun papah kei.
I kasalehda ahi pwoson ong Koht Samatail Nanleng oh Sapwellime Iehros, Sises Krais. I ese Ira, poakong Ira, oh inoukihda me I pahn papah Ira—oh kumwail—ki esingek en ahi mour unsek. Ni lengileng sarawi en Sises Krais, ahmen.
© 2018 by Intellectual Reserve, Inc. All rights reserved. Ntingdahr nan USA. Kamanaman ong lokaiahn wai: 6/17. Kamanaman ong kawehwe: 6/17. Kawehwehpen First Presidency Message, April 2018. Pohnepeian. 15048 885