Osisecheklel Omesiou, Ongelolem el Buil 2018
Eim el Tekoi el Chad el Ungil Lorrenges a Meruul
A omera el ungil lorrenges eng ngosukau el momeduch el mo omesterir a ngesou er a tekoi er a reng me a bedenged el di uaia Osobel.
A Elder Jeffrey R. Holland er a Chelechad er a re Teruich me a Terung el Apostol a dilu el kmo: “Alta e sel kot el ngaruchei er a omelekoi a orrenges. … Alsekum me ke de orrenges loba beltikelreng, e ng diak bo domdasu a tekoi el bo dolekoi. Leng mo meskid —a Chedaol Reng.”1
A orrenges a duch el sebeched el subii. A orrenges a chochotii a beltikereng er kid el mora rebebil, ngosukid lokes a deleuill, e oleker er a Chedaol Reng el mo meskid a klengeltengat el sengk er a omerritel el mo ngosukid el mo medengei a lousbech a rebebil.2 A ikakid a kleim el tekoi el sebechel ngosukid el moungil lorrenges.
1. Besterir a Taem
Te betok el chad ousbech a sesel bung lomdasu a bololekoi. Besterir a taem el mo omdasu ruchei me a uriul er a le delii a kmong ngerang(mesa Jakobus 1:19). Ng diak el belkul a kmo te mla mo merek el mengedecheduch me te mla kmung a ikel rokui el kirir el melekoi. Lak ko medakt a lak a cheldecheduch (mesa Job 2:11–3:1 me a Alma 18:14–16).
2. Bo Mungil Lomes
Kid a mereched lomdasu sel longedecheduch a rebebil. Lak bo meleb cholloi malechub e lak momdasu a tekingem el mo melekoi sel bol merek (mesa Osisechakl 18:13). E bai, morrenges el moktek er kau a mo ungil medengei. Kau a moungil longer e le ke mla moungil medengei lokiu a chais el bla mngai.
3. Omeketakl
La ko medakt loker a ker el mo meketakl a tekoi el dimlak bo mungil medengei (mesa Markus 9:32). A omeketakl a kokeringii a rrau reng e chochotii el kmo kau a ngarngii a klemeriar reng er kau er tial cheldecheduch.
4. Melbedebek
Momelekl a omrirenges e momes el kmo el kemedengei a lomelchesiu. Tia ngosuterir el mo medengei el kmo te mloungil morenges e mesterir a techall el mo omeketakl.
5. Momes er sel Ngii Omosisiu er Ngii
Altang ngdiak mkengei aikel rokui el mildung, eng di bom kengei a ikel sebechem ngii di lak mochotii a kuk ngodech er sel meral momelchesuar er ngii. Sel dil ngera e dekengei a sebechel ngosouir el mekodir a dakt me a ultok (mesa Mateus 5:25).
A President Russell M. Nelson a ulsisechakl el kmo ng kired el mo “meduch el orrenges, e orrenges e mesuub er ta ma tang.”3 Mesel morrengs el blak a rengum el mo medengelterir a rebebil, e kau a mo soiseb er a ungil teletael el mo ungil medengei a lousbech e remenges a odubech el kmo kemekera obo momekerreu er tirke el iliuekl er kau el uaia Osobel.
A orrenges a Oubeltik el reng
A cheldecheduch el mla er a Elder Holland a ochotii a klisichel sel de orrenges:
“A sechelik er a Troy Russell a milekekokil el mengurs er a pickup er ngii loltobed er ngii er a blil a mlai. … Ng mlo melchesuar er a taia ruriul el ngilasech er a tebull. … Ng tilobed e mislang a mekreos ra rengul el etiu a rekil ngelekel sechal, er a Austen, el mechiuaiu el chebecheb er a sment. … Austen a mla remiid.
“Ng dimlak el sebechel mo mechiuaiu, e diak el sebechel metik ra budech, a Troy a dimlak el sebechel mo ungil a rengul. … Ng di chelsel tial ringel e ng mlei a … John Manning. …
“Ng meral beches el diak kudengei el kmo ngera mle temel a John me a kldemel er a bo loldingel er a blil a Russell. … A ikel kudengei a tiakid sera last spring ea Brother Manning a uldersii chimal e kilderii a Troy Russell er a ringel el mla er sel rolel a mlai el diua rengud eng mengider er a kekerei el Austen. El kmal diua … odam el meruul a kirel sel le ngara ebangkelio , a John a di mle beot el nguu a ngerachel er a priesthood el mo omekerreu er a Troy Russell. Ngulemuchel el melekoi, ‘Troy, a Austen a soal kau omluut er a smechem— uldimukl a ngara basketball court—me ngak a mei sel bek el tutau er a 5:15. Ke mo kldmokl. …’
“‘Ng dimlak el soak el mong,’ a Troy a silbedak ruriul, ‘e le ak blechoel melai er a Austen lobengkek. … Engdi a John a di mle muri, me ak mlong. Ulemuchel er sel kot el sils e sel kaeri er kemam, e a ki mle chadecheduch—malechub e ngak a bai milengedecheduch e a John a ulurrenges. … Sera kot eng kmal mle meringel, engdi omerolel a taem e ak mlo metik a klisichek el ngara [John Manning], el mle betik a rengul er ngak e ulurenges er ngak el mocha ngmasech a sils er a klengar er ngak.’”4
© 2018 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/17. Kengei er a oidel: 6/17.Oidel a Ministering Principles, June 2018. Palauan. 15055 881