Fa Ayamuhyehye Som

Nna ayamuhyehye yɛ Agyenkwa no som no farba (hwɛ afã hɔ: “Agyenkwa Ayamuhyehyenyi”). N’ayamuhyehye ma Ne mfɛfo maa Ɔsoom hɔn a oetwa ehyia Noho mber pii. Ohunn nkorɔfo hɔn ehiadze na apɛdze no, Otumii hyira hɔn na Ɔkyerɛkyerɛ hɔn wɔ akwanhorow mu a ohia ma hɔn dodow. Agyenkwa no ne pɛ dɛ obepegya hɛn atra hɛn atsetsee no korakoraa nye ayamuhyehye edwuma: No Werdambɔ ma adasa hɛn bɔn na amandzehu.

N’ahom dɛ obenya nkorɔfo hɔn ehiadze ho mbuae yɛ adze bi a yebotum aper enya ber a yɛsom. Ber a yɛbɔ tsenenee bra na yetsie Sunsum ne nkenyan no, yebenya nkenyan dze asom wɔ akwanhorow a mfaso wɔ mu.

Ɔsor Egya pɛ dɛ Ne mba nya ayamuhyehye (hwɛ 1 Corinthfo 12:25–27). Yɛbɛyɛ esuafo nokwarfo a, otwar dɛ yenya na yɛkyerɛ ayamuhyehye ma binom, tsitsir ara hɔn a wohia (N&A 52:40).

Yɛnam hɛn enuma ahyɛmudzi do fa Jesus Christ ne dzin to hɛn do a, yɛgye dase dɛ yɛwɔ pɛ dɛ yɛbɛkyerɛ ayamuhyehye. President Henry B. Eyring, Ɔpamfo a Otsĩa Ebien wɔ Presidency a Odzi Kan mu no, kyerɛkyerɛɛ dɛ Sunsum Krɔnkrɔn n’akyɛdze no boa hɛn ma: [Yɛyɛ] Jesus Christ n’Asɔr ahyɛmudzi ba. …

“Dɛm ntsi na itse nkã dɛ ipɛ dɛ iboa obi a ɔhyɛ awerɛhow na nkodzen adzesoadze ase a ɔreper dɛ ɔbɔkɔ kan no. Ebɔɔ anohoba dɛ ebɔboa Ewuradze ma Ɔama [binom] hɔn adzesoadze ayɛ har ama woeenya awerɛkyekye. Wɔmaa wo tum dɛ faboa ma dɛm adzesoadze no nyɛ har ber a enyaa Sunsum Krɔnkrɔn akyɛdze no.”¹

Mfatoho, akyerɛbaa bi a ɔwɔ Russia nyaa ebusua mu nkodzen bi a osiiw no kwan dɛ ɔbɔkɔ asɔr afe kor na no mboree. Akyerɛbaa bi a ɔwɔ nkorbata no mu dze ayamuhyehye som no Kwesida biara ber a ɔfrɛɛ no na ɔkãa nsɛm a wɔkãa, adzesũahorow, asɛmpakã ɔfrɛhorow, mbɔdomamba a wɔawo hɔn, na nkorbata mu dawurbɔ ho nsɛm kyerɛɛ no. Ber a wosiesiee akyerɛbaa a ɔnnkɔ asɔr n’ebusua mu nsɛm wieii no, nna ɔtse nkã dɛ ɔda ho ka nkorbata no ho osian ne nyɛnko no ɔfrɛ dapɛn biara no ntsi.