Kosoiapene arail anahn akan

Ke sohte anahne kelehpwki mwekid wet. Kosokosoiapene kak kiheng uhk sawas me ke anahne pwehn sewese mehteikan.

Koht ketin lukeiuk en sewese padahkohng emen emen de peneinei kan nan ahmw ward de branch nin duwen arail anahn akan. Ia mwomwen ahmw pahn kak diarada arail anahn akan? Iren kaweid en kosokosoiapene, me Mwomwohdisoht anahne poahsoandahsang, iei kih.

Mwurin atail pahn kosoiapene dahme kitail anahne wia, kitail pahn uhd rapahki:

Ehukihong Samatail Nanleng.
Wehwehiong aramas me pilipildahr oh peneinei.
Wehwe iong iengetail kan
Oh pil wehwehiong irail teikan me pil pilipildahr en sewese aramasohte de peneineio.

E pil kesempwal kitail en wehweh iong atail sounkaweid kan. Padahk en Sawas kan en ehu ansou kohkohdo nan Liahona pahn kaweidki mwomwen doadoahkohng sounsawas akan oh pil iangahki pwukoahn tuhpene kan.

Dahme Kitail pahn Kosoiapene

Wehwehkihla anahn akan udahn kesempwal ong sewese emen emen Ahpw dahme kak wiawihong soangen anahn ko , oh mie mehkot me laudsang anahn akan me kitail konehng diarada?

Anahn akan kak kohdo ni soangen mwohmw tohto. Irail akan me kitail kin sewese kakete ahneki kahpwal en Insensuwed, mwohni, paliwar, sukuhl, oh soahng tohto. Ekei anahn kin karuwaru sang ekei. Ekei kitail pahn kak sewesehda; ah ekei pahn anahne kitail en pein rapahkihdohng sawasepe. Nan atail doadoahk en sewese anahn akan, dehr manokehla me atail pwukoahn sewese mehteikan pil iangahkihte seweseirail en kekeirda nan ahl en inou, kaukaunop ong en alehdi tiahk sarawi kan en prihsdud me konehng pwe irail en kak komourla.

Iren kapatapat ong ni atail pahn ehukipene anahn en emen de peneinei kan, kitail anahne rapahki pwe kitail en esehla arail koahiek kan. Dahngeh kan me irail sohte anahne sawas loale? Soangen koahiek oh kisakis da me irail ahneki me kak kapaiada mehteikan? Ia mwomwen arail kesempwal oh kak sewese kawada wein Koht? Kehlail en emen emen mwein pil kesempwal kitail en wehwehki duwehte arail anahn akan.

Ehukihong Sahm Nanleng

Ehu padahk me kitail kin kamehlele iei me Sahm Nanleng kin ketin mahseniong Sapwellime serih kan (tehk Articles of Faith 1:9). Ansou kan me kitail kin alehdi pwukoahn sewese emen, kitail anahne en kin ehukihong Sahm Nanleng ni kapakap, pwehn kak alehdi kaweid oh wehwehki arail anahn akan oh pil koahiek kan. Kemwekid en kosokosoipene ni kapakap anahne en doulahte erein atail pahn sewese aramaso.

Ehukihong Emen emen oh Peneinei kan

Mwomwe oh ansou me kitail kin tapiada sewese emen emen oh peneinei kan me kitail pwukoahki kak wekpeseng pwehki kahrepe kan, ahpw en sewese aramaso de peneineio udahn konehng pwehn kakairada ehupene oh wehwekihla arail anahn akan, iangahki ia mwomwen arail men ken sewese irail. Ekei kalelapak kan mwein anahne kolkoldi lau mie koapwoaroapwoar mie. Ma sohte ehute ahl pwung en kak wia met, song wia mepwukat:

Song diarada ansou da me irail men ken pwarek irail.
Esehla dahme irail kin pereniki oh duwen irail.
Kihda iren kaweid kan me ke kak sewesehkin irail, oh kalelapak arail iren madamdau kan.

Ansou me miehier koapwoaroapwoar, song ehukihong irail anahn kan en emen emen de peneineio. Kalelapak peidek kan me Ngehno kaweidki.¹ Me Rasehng:

Soangen kahpwal da me irail kin kilang?
Ia en arail peneinei de emen emen ah koasoandi? Karasepe, irail men kamwahuihla oh kin wia sarawihn peneinei ansou koaros me koasoandi, de irail kakehr uhtohrda?
Ia mwomwen atail kak sewesehkin irail arail koasoandi kan oh kahpwal kan?
Soangen tiahk sarawi da me pahn wiawi nan arail mour? Ia mwomwen atail kak sewese irail en kaunopda?

Taman kasalehda soangen sawas ehu me ke kak wia, me rasehng, “Mehnia pwohng me se kak wahdo mwonge rehmwail wihket?” Soangen sawas sohte sansal, me duwehte, “Komw nek kehsehkin kiht ma mie mehkot se kak wia,” sohte pahn nohn sawas laud.

Ehukihong Iengatail Kan

Pwehki komwi oh iengomwo sohte pahn kak patpene ansou koaros me kumwa pahn tuhong aramaso de peneineio, e udahn kesempwal kumwahn wehwepene oh koasoanehdi ni amwa pahn kin rapahki kaweid kan nin duwen amwa wia ehu pwihn. Iet ekei peidek mehn medemedewe:

Iamwomwe oh ia wen tohtohn amwa pahn kin wehwepene nin duwen kompanih ieu?
Ia mwomwen amwa kak doadoahngki amwa koahiek kan pwehn apwalih oh sewese anahn en aramaso de peneineio?
Dahme me kumwa koledi? Dahngehkan me kumwa lelohngehr, oh soangen kaweid en Ngehn Sarawi da me kumwa alehdi ansou me kumwa tuhkipene duwen anahn akan en aramaso de peneineio?

Ehuong Mehteikan me iang Pwukoahki

E pahn pil mwahu ma kumwa pahn kin wehwehiong irail teikan me pil iang pwukoahki aramaso de peneineio ehu ehu ansou.

Wehwepene pwehn Apwaliala Kahpwal kan

Elder Chi Hong (Sam) Wong en pwihn en Isiakan karasahiong ire me sang nan Mark 2 ong atail ansou pwehn kawehwehda mwomwen ehukipene kaweid ah kahrehiong irail aramas pahmen arail diarada ahl me kahrehiong ohl mwatoro ah kak mih mwohn Sises.

E kak pil duwehte met,” Elder Wong kosoia. “Irail me pahmen kapwaiada kepwukoah ieu me sang rehn arail pisopo en pwarek, ohl me soumwahu mwatoro, ni tehnpesehu. … Nan ehu tuhpene en sounsawas akan en ward, mwurin arail ehukipene anahn en nan wardo, pisopo ahpw kihda kepwukoahn ‘kamaurala’ kei. Ohl pahmeno me pwukoahki en sewese ohl menet. …

“[Ansou me irail lela ni ihmw me Sises ketketie,] e udahn pokon mehlel. Irail sohte kak doulongala nan wenihmwo. I ese me irail song uwen arail kak koaros, ahpw irail sohte kak doulongala. … Irail kosoiapene dahme irail anahne wia—ia mwomwen arail pahn kak walahng ohlo rehn Sises pwehn kamwahuiala. … Irail koasoanehdi wiepe ehu—me sohte pil mengei, ahpw irail doula oh wia.

“… ‘Re koupwoarepeseng pohn ihmwo kainenehdi wasa me Sises ketiketiehu oh kakihrdiong nan ihmwo mpen Sises mehn roh me mwoatoro wonohn powe, (Mark 2:4). …

“… ‘Ni Sises eh ketin mwahngidahr ar pwoson laud, e ahpw mahsanihong me mwatoro, “Nei kompoakepahi, dipomw kan lapwadahr’ (Mark 2:5).”²

Luhk en Wia

Elder Dieter F. Uchtdorf en Pwihn en Wahnpoaron Ehk Riemeno kaweidki, “Wehwehkipene, doadoahngki soahng mehn sawas koaros me mie, rapahki kaweid en Ngehn Sarawi, peki Kauno Sapwellime kamanaman, oh kohla doadoahk.

“I inoukihong kumwail: ma kumwail pahn idahwen mepwukat, kumwail pahn alehdi kaweid en ihs, dah, iahd, oh iawasaanahne sawas nin duwen koasoandi en Kauno.” ³

© 2018 by Intellectual Reserve, Inc. Kolokol pwuhng koaros. Ntingdahr nan USA. Kamanaman ong lokaiahn wai: 6/17. Kamanaman ong kawehwe: 6/17. Kawehwehpen Ministering Principles, September 2018. Pohnpeian. 15052 885