Kry Hulp om Andere te Help

Hierdie kwartaallikse onderhoude tussen bedieningsusters en die Verligtingsvereniging-presidensie of bedieningsbroers en die ouderlingskworum-presidensie, is die enigste formele verslag wat ons gee in verband met diegene wat ons bedien. Dié onderhoud is ʼn geleentheid om ten minste een maal per kwartaal (1) te beraadslag oor die sterktes, behoeftes of uitdagings van die families en individue wat aan ons toegewys is; (2) te bepaal met watter behoeftes die kworum, Verligtingsvereniging of wyksraad kan help; en (3) van leiers te leer en aangemoedig te word in ons bedieningswerk.

Die ouderlingskworum-president en Verligtingsvereniging-president sal belangrike behoeftes direk aan die biskop oordra en sal direk van hom raad en leiding ontvang.

Jy kan meer inligting omtrent bedieningsonderhoude vind by ministering.lds.org.

Ter ondersteuning van President Russel M. Nelson se verklaring dat die bedieningsprogram die spilpunt sal wees waarop die koers van die Kerk sal swaai, het Ouderling Gary E. Stevenson van die Kworum van die Twaalf Apostels geleer: “Die Uitkoms van sy visie … mag afhang van hoe goed bedieningsbroers en -susters geleer en betrek word gedurende die bedieningsonderhoud.”²

Vyf wenke vir bedieningsbroers en -susters:

• Gaan na die onderhoud om raad te ontvang. Wees gereed om te leer.

• Wees voorbereid om behoeftes waarmee jy mag hulp nodig hê, te bespreek.

• Fokus op die individue se sterk punte en vermoëns, nie net op hulle behoeftes nie.

• Beraadslag oor die uitkoms, wat sou beteken dat julle bediening suksesvol was.

• Kontak die presidensie om te beraadslag, indien nodig, tussen kwartaallikse onderhoude.

Vyf wenke vir leiers:

• Onderhoude het nie nodig om baie lank te wees nie, maar skeduleer genoeg tyd om in ‘ʼn gepaste plek ʼn betekenisvolle bespreking te hou.

• Neem die tyd om die bedieningsbroer of -suster te dien.

• Moenie vrae vra wat die indruk skep dat jy net besoeke of ʼn kontak afmerk nie (“Het jy jou bediening gedoen?”). Vra vrae wat die begeerde gedrag sal versterk (“Watter prikkelings het jy gevoel, soos wat jy vir die familie gebid het? Wat het gebeur toe jy op hierdie prikkelings gereageer het?”).

• Luister opreg en maak notas.

• Beraadslaag saam. Bedieningsmetgeselle is geregtig op openbaring vir diegene wat aan hulle toegewys is.

Wat is ʼn bedieningsonderhoud?

Dit is ʼn bespreking tussen bedieningsbroers en ʼn lid van die ouderlingskworum-presidensie of tussen bedieningsusters en ʼn lid van die Verligtingsvereniging-presidensie, in ʼn plek wat hulle sal toelaat om inspirasie van die Heilige Gees te soek en te ontvang. As gevolg hiervan, kan bedieningsbroers en -susters gelei word om te waak, lief te hê en te leer en om te vertroos op die Saligmaker se manier.

Moet hierdie kwartaallikse onderhoude in persoon wees?

Hulle word tipies persoonlik gedoen, maar hulle kan per foon of aanlyn gehou word, wanneer ʼn gesig-tot-gesig onderhoud nie prakties is nie. Oor die algemeen neem albei metgeselle deel aan die onderhoud wanneer dit gepas is.

Wat is die doel van ʼn bedieningsonderhoud?

Bedieningsonderhoude is ʼn geleentheid vir bedieningsbroers en -susters om huidige omstandighede te hersien en om toekomstige planne te maak en om die nodige hulp te kry om die individue en families wat aan hulle toegewys is, te dien. Dit is ʼn geleentheid om die hulpbronne te bespreek wat die kworum en Verligtingsvereniging kan voorsien.

Hoe hanteer ek vertroulike of sensitiewe sake?

Bedieningsbroers en -susters deel vertroulike inligting slegs met die ouderlingskworum of Verligtingsvereniging-president—of direk met die biskop. Vertroulike of sensitiewe inligting moet nie in die eerste-Sondag beraadslagingsvergadering bespreek word nie.

Buiten bedieningsonderhoude is eerste-Sondag beraadslagingsvergaderings nog ʼn manier om ander by bediening betrokke te kry. In Verligtingsverenigings-vergaderings en ouderlingskworum-vergaderings kan inspirasie kom na diegene wat bywoon, deur die Heilige Gees en deur andere in die groep.

Beraadslagingsvergaderings is meer as net besprekings: die vergadering lei ons om te reageer as individue of as ʼn groep, soos deur die Gees gelei. Lede kan ʼn begeerte voel om die Here se werk te doen as ʼn gevolg van hierdie vergaderings.

Ouderling Jeffrey R. Holland van die Kworum van die Twaalf Apostels het gesê: “Ons gebed vandag is dat elke man en vrou—en ons ouer jong manne en jong dames—meer doelgerig sal wees om opreg vanuit die hart vir mekaar om te gee, gemotiveer slegs deur die suiwere liefde van Christus, om so te doen.”⁴