Alahle Sawas pwehn Sewese Mehteikan

Ia mwomwen atail kin ale en mehteikan sawas ni atail kin anahne sawas nan atail doadoahk en sawas? Iang towehda koasokoasoipene duwen sawas oh mihting en kaunsel kan ni keieun Rahn Sarawi.

Ni en Kathy eh mihla nan wihlsehr pwehki soumwahu en multiple sclerosis, liho diarada me e anahne sawas pwohng koaros pwehn kak doudisang nan wihlsehro kohla nan ah pehto. Doadoahk wet me nohn apwal ong aramas emen te. Pwihn en elder kan eri koasoia en liho kahpwalo oh koasoanehdi ehu wiepen sawas pwehn sewese liho ni ehuehu soutik kan,¹

Ni atail kin esehda anahn kan oh koahiek kan en irail kan me kitail kin sewese, kitail kin diar me kitail anahne sawas pwehn kak apwali arail anahn kan, Koasokoasoipene duwen sawas oh mihting kan ni keieun Rahn Sarawi wia ansou mwahu kei pwehn koasoia duwen sawas me mehteikan kak wia.

Koaskoasoipene duwen Sawas

Koaskoasoipene me kin wiawi ni imwin sounpwong silu koaros nanpwungen lih akan oh presiden en Pwihn en Sawas en Lih oh ohl akan oh presidensi en pwihn en elder kan wiahte ansou mwahu en repwohtki duwen doadoahk en sawas me kitail kin wiewia, Koaskoasoipeneo wia ansou mwahu ehu nan irair en sounpwong silu pwehn (1) dawih koahiek kan, anahn kan oh kahpwal kan en peneinei kan oh aramas akan; (2) diarada dahme elder kan, Pwihn en Sawas en Lih, de kaunsel en ward kak sawaski; oh (3) esehla sang irail sounkaweid kan oh ngoangki doadoahk en sawas kan,

Presiden en pwihn en elder kan oh presiden en Pwihn en Sawas en Lih kin padahkiheng pisopo anahn kesempwal kan oh pahn kin ale sawas oh kaweid sang ih.

Kumwail kak diar ire tohto me pid koaskoasoipene kan duwen sawas nan ministering.lds.org.

Kalaudehla Katepen Koaskoasoipene kan duwen Sawas

Ni eh utungada Presiden Russell M. Nelson ah mahsanih me prokrahm en sawaso pahn wia mehn kaweid ehu ong mehnia ahl me Mwomwohdiso wet pahn ale, Elder Gary E. Stevenson en Pwihn en Wahnpoaron Ehkriemeno padahngki me “Pwe madmadau wet en kak pweida … ele pahn pahsan uwen en ohl akan oh lih akan arail ale kasukuhl sang nan koaskoasoipene duwen sawas kan.”²

Iren sawas limau ong ohl oh lih akan me kin wie sausawas:

Iang koaskoasoipene pwehn ale kaweid, Onopada pwehn esehla.
Onopada koasoia anahn kan me kumwail anahne sawas loale.
Tehk en aramaso kehlail oh koahiek kan , kaidehnte anahn kan,
Tetehk wahn amwail doadoahk kan pwehn kasalehda ma amwail doadoahk en sawas kan pweida.
Kin tuhong oh ale kaweid sang presidensi nanpwungen koaskoasoipene en sounpwong silu kan,

Iren sawas limau ong sounkaweid kan:

Koaskoasoipeneko sohte anahne en reirei, ahpw koasoanehdi ansou mwahu pwehn kak lel wasa me pahn elehda pweidahn koaskoasoipeneo.
Isaneki ansou mwahu pwehn sewese ohl oh lih akan me kin wie sausawas.
Dehr doadoahngki peidek me pahn kasalehda me kumwail men esehte pak depe me irail wia doadoahk en sawas (“Kuwail wiahier amwail doadoahk en sawaso?). Doadoahngki peidek me kakehlaka wiewia mwahu kan (“Dahme kumwail pehm ni amwail kin kapakapki peneineio? Dahme wiawi ni amwail kin mwekidki amwail pepehm kan?)
Kin rong mwahu oh ntingidi irehkan.
Kin ehukipene amwail kaweid. Me kin ehupene sausawas pahn kin ale kaudial ong irail kan me ira kilelediheng en kin seusewese.

Peidek kan oh Pasapeng kan me pid Koaskoasoipene kan duwen Sawas

Dahiou koaskoasoipene duwen sawas?

Koaskoasoipene ehu nanpwungen ohl akan oh emen tohn presidensi en pwihn en elder kan de nanpwungen lih akan oh emen tohn presidensi en Pwihn en Sawas en Lih nan wasa ehu me pahn elehiong irail en kin rapahki oh ale kaweid sang Ngehn Sarawio. Met kin kahrehda ohl akan oh lih akan me kin sausawas en kak ale kamarain pwehn mwasmwasahn, poakehng, kasukuhli, oh kaloalamwahuwih nin duwen me Sounkomouro ketin wia.

Aramas anahne kohpene ahnsoun koaskoasoipene en sounpwong silu pwukat??

Uhdahn e kin wiawi ni ahnsou me aramas piserla, ahpw ma sohte kak ah e kak wiawi nan delepwohn de pohn kampiuder nan wehwe, Palilaud en ahnsou, meh riemen me kin ehupeneo anahne iang towehda koaskoasoipeneo ma kak.

Ia kahrepen koaskoasoipene duwen sawas kin wiawi?

Koaskoasoipene duwen sawas kan wia ansou mwahu ehu ong ohl oh lih akan me kin sausawas en kin tehk sapahl dahme wiewiawi, wiahda koasoandi en mwuhr kan, oh ale sawas ong aramas de peneinei me irail kin sewesewese. E wia ansou mwahu ehu en koasoia duwen elen sawas kan me elder kan oh Pwihn en Sawas en Lih kak patowanda.

Ia mwomwen ahi kak apwalih ire kesempwal de ire me sohte konehng en sansalda?

Ohl oh lih akan me kin sausawas kin ehukihda ire me rir kan ongete presiden en pwihn en elder kan de presiden en Pwihn en Sawas en Lih—de inenlahngete pisopo. Ire rir de ire me sohte konehng sansalda sohte kin kasansalda nan mihting kan en keieun Rahn Sarawi.

Mihting en Kaunsel kan ni Keieun Rahn Sarawi

Me patehng koaskoasoipene duwen sawas kan, iei mihting en kaunsel kan ni keieun Rahn Sarawi wia pil ehu wiepen alehdi mehteikan en iang sawas. Nan mihting en Pwihn en Sawas en Lih oh pwihn en elder kan, kamarain kak lelong irail me ieiang sang Ngehno oh sang mehteikan nan pwihno,

Kahrepen mihting en kaunsel iei en:

“Ehukihpene kaweid me pid pwukoah kan, ansou mwahu kan, oh kahpwal kan:
“Kasukuhl sang en emenemen irail arail kaweid kan oh dahme irail lelohngehr kan; oh
“Koasoanehdi wiepen doadoahngki kaudial kan me alahldi sang Ngehno.”³

Mihting en kaunsel kan sohte audaudkihdate koasoi: mihting kan kin elehda emenemen kitail de pwihno pwon en doadoahngki kamarain me kin pwilsang Ngehno. Towehkan kin kak inangiada kapwaiahda doadoahk en Kauno pwehki sang ni mihting pwukat.

Luhk en Wia

Elder Jeffrey R. Holland en Pwihn en Wahnpoaron Ehkriemeno nda me “Atail kapakap rahn wet, iei ohl oh lih koaros —oh neitail mwahnakapw oh peinakapw— kan pahn [kin] inoukihdi ni mehlel nan loalarail en nsenohki emenemen, pwehki sang ni limpoak mehlel en Krais.” ⁴

© 2018 by Intellectual Reserve, Inc. Kolokol pwuhng koaros. Ntingdahr nan USA. Kamanaman ong lokaiahn wai: 6/17. Kamanaman ong kawehwe: 6/17. Kawehwehpen Ministering Principles, October 2018. Pohnpeian. 15053 885