Botae a Ɔbɛsesã Kwan a Yɛdze Som no

Botae pii na yɛdze som, naaso ɔwɔ dɛ hɛn mbɔdzembɔ no dua dua ɔpɛ kwankyerɛ do a yɛbɔboa nkaa no ma woenya ankorankor nsakyeree a ɔdɔ bun mu na wɔabɛyɛ tse dɛ Agyenkwa no ara yie.

Sɛ yɛdɔ binom no dɛ mbrɛ Agyenkwa no dɔ hɔn a, yɛbɛpɛ dɛ yɛbɔboa hɔn dɛ mbrɛ Ɔyɛe no. Dɛ Ɔyɛ Oguanhwɛfo Pa no, Ɔno nye erosom ho fasusu a odzi mu no.

Yɛrosom dɛ Ne dze saso no, ohia tsitsir dɛ yɛkaa No mbɔdzembɔ dɛ Ɔbɔdɔ, Opegya, Ɔsom na Ohyira no nyaa botae a ɔkrɔn kyɛn mprɛnprɛ ehiadze no. Nokwar nna Onyim hɔn daa daa ehiadze na Onyaa ayamuhyehye wɔ haw a wɔwɔ mu no ho. Ntsi Ɔsãa yarba, maa edziban, dze bɔn kyɛɛ, na Ɔkyerɛkyerɛe. Mbom nna Ɔpɛ dɛ Ɔyɛ kyɛn Ɔbɛmee hɔn ndɛ nsukɔm ara (hwɛ John 4:13–14). Nna Ɔpɛ dɛ hɔn a woetwa Noho ehyia no kã No do (hwɛ Luke 18:22; John 21:22), wohu No (hwɛ John 10:14; Nkyerɛkyerɛ na Ahyɛmudzi 132:22–24), na hɔn nsa kã hɔn hyɛbea krɔnkrɔn no (hwɛ Matthew 5:48). Ɔyɛ nokwar dɛmara ndɛ (hwɛ Nkyerɛkyerɛ na Ahyɛmudzi 67:13).

Akwan horow beberee wɔ hɔ a yebotum ehyira binom, naaso sɛ hɛn som no botae nye dɛ yɛbɔboa nkaafo ma wɔaba ebohu Agyenkwa no na wɔabɛyɛ tse dɛ Ɔno a, nna yeridzi dwuma ekodu ber no a onnkehia dɛ yɛkyerɛkyerɛ hɛn fipamfo bio ma obohu Ewuradze osiandɛ hɛn nyina bohu No (hwɛ Jeremiah 31:34).

Agyenkwa no N’enyimtsim Traa Mprɛnprɛ Ehiadze

Nkorɔfo pii bɔɔ mbɔdzen ara yie dɛ wɔdze hɔn nyɛnko a ɔyar mbubui bɛba Jesus hɔ ma Ɔasã no yarba. Ewiei no Agyenkwa no sãa banyin no yarba, naaso nna dza Ohia no kɛse nye dɛ Ɔdze no bɔn bɛkyɛ no (hwɛ Luke 5:18–26).
Ber a nkorɔfo dze ɔbaa no a ɔato awar baa Agyenkwa no hɔ no, Osiankaa dɛ Obobu no fɔ no, gyee no nkwa wɔ honandua mu. Naaso nna Ɔpɛ dɛ Ɔgye no nkwa wɔ sunsum mu so, Ɔkãa kyerɛɛ no dɛ “kɔ, na mma nnkɛyɛ bɔn bio” (hwɛ John 8:2–11).
Mary na Martha dze asɛm somaa ma ɔkɔɔr Jesus hɔ reserɛ No dɛ Ɔmbra mbɛsã Ne nyɛnko, Lazarus yarba. Jesus a, Ɔasã binom yarba wɔ gyinabew piinara mu no, tweɔnee Ne mbae kesii dɛ Lazarus wui ekyir no. Nna Jesus nyim dza ebusua no rohwehwɛ, mbom Onyaan Lazarus fii ewufo mu no, Ɔhyɛɛ hɔn dasegye wɔ Ne nyamesu mu dzen (hwɛ John 11:21–27).

Ebɛn mfatoho binom so na ibotum dze akã dza wɔakyerɛw yinom ho?

Ebɛnadze na Yebotum Ayɛ?

Sɛ hɛn botae nye dɛ yɛbɔboa nkaa no ma wɔabɛyɛ tse dɛ Agyenkwa no ara yie a, ɔbesesã kwan a yɛdze som. Akwan bi a ntseasee yi botum ayɛ kwankyerɛ ama hɛn mbɔdzembɔ dɛ yɛbɔsom nye yinom.

Adwenkyerɛ 1: Fa Som bata Agyenkwa no ho

Hɛn mbɔdzembɔ nyina a yɛdze yɛ papa no ye, mbom yebotum ahwehwɛ akwan horow dze epegya hɛn som ber a yɛdze bata Agyenkwa no ho. Mfatoho. sɛ ebusua a erosom hɔn no yar a, edziban botum aboa, naaso sɛ ekã wo dɔ a ewɔ ma hɔn a obotum ɔnye wo dasegye wɔ Agyenkwa No dɔ ma hɔn no ayɛ mbɔho mbɔho. Hɔn enyi bɔsɔ wo mboa wɔ paado nsiesie ho, naaso bia yɛma asɔfodzi nhyira a obotum ayɛ mfaso ara yie.

Elder Neil L. Andersen a ɔkã Asomafo Duebien hɔn Quorum ho no kyerɛkyerɛɛ dɛ: “Nyimpa a ɔwɔ akoma pa no botum aboa obi ma ɔasesã ne tire, nye ne nyɛnko ekohu datser, nye obi a no werɛ ahow edzidzi, anaa ɔayerɛw n’ano na ɔama wo akye dze enyigye aba da no.

“Naaso nyia odzi mbrasɛm a odzi kan no do no ɔbɛyɛ bi akã som ndzeyɛɛ yinom a ohia no ho.”¹

Adwenkyerɛ 2: Tsim wɔ Ahyɛmu Anamɔn Kwan no do

Ber a odzi kan a President Russell M. Nelson nye asɔrmba rekasa dɛ Asɔr no ne President no, ɔkãa dɛ: “Hom nnantsew ahyɛmu kwan no do.” Yeridzi ahyɛmu na yɛresie no “bobue sunsum mu abow na ndzinoa biara a nsa botum akã no.”²

Dɛ yɛyɛ Latter-day Saintfo no, wonuma hɛn, wosi hɛn pi, na yɛgye Sunsum Krɔnkrɔn akyɛdze no. Mbanyin a wodzi mu no gye asɔfodzi no. Yɛkɔ temple kɛyɛ hɛn endowment na wɔasɔw hɛn ano abɔmu dɛ ebusua ebusua afebɔɔ. Nkwagye ayɛdze horow yinom na ahyɛmudzi a ɔbata ho no hia tsitsir ma yɛabɛyɛ tse dɛ Ɔno na yeetum nye No atsena.

Yebotum enya asɛdze a no ho hia dze aboa binom a wɔnam anamɔn kwan no do ber a yɛboa hɔn ma wosie hɔn ahyɛmudzi no na wɔyɛ ahoboa ma ndaamba ahyɛmudzi horow.³ Yebesi dɛn aboa ankorankor anaa ebusua ebusua a yɛsom hɔn ma wɔagye ayɛdze a odzi do a ohia dɛ wɔgye? Iyi botum ayɛ dɛ iroboa esiesie egya ma oenuma ne babaa, erekyerɛkyerɛ nhyira a ɔwɔ ahyɛmu a odzi do no mu, anaa erekyɛ akwan horow a yebotum enya mfaso sũahu ara yie ber a yeridzi sacrament dze ekenyan hɛn ahyɛmudzi no.

Adwenkyerɛ 3: To Nsa Frɛ na Hyɛ Nkuran

Mber pa mu no, nye hɔn a ihwɛ hɔn do no mfa apam wɔ hɔn nsakyeree na hɔn mbɔdzembɔ ho dɛ wɔbɛyɛ tse dɛ Christ ara yie. Ma wonhu ahoɔdzen a ihu wɔ hɔn mu a ɔyɛ wo enyisɔ no. Hwehwɛ hu su a wonya atsenkã dɛ wobotum etu ho mpon na enye hɔn nkasa mfa mbrɛ ibotum aboa. (Ama eenya bi aakã hɔn a erosom hɔn ho no bɔbɔ mu afa apam no hwɛ “Counsel about Their Needs,” Liahona Fankwa 2018, 6–9.)

Mma nnsuro dɛ ibɔto nsa afrɛ hɔn dɛ wɔnkã Agyenkwa No do na wɔma No kwan ma Ɔboa hɔn ma wonya hɔn hyɛbea krɔnkrɔn no. Nsato yi botum asesã abrabɔ, ber a ekã w’awerɛhyɛmu a ewɔ no hɔn mu na wo gyedzi wɔ No mu kyerɛ hɔn.

Akwan Esia a Yebotum Aboa Nkaa ma Wɔabɛn Christ yie

Dza odzi do yinom yɛ nsusui a ɔbɛgye binom abamba wɔ hɔn abrabɔ mu dɛ wobenya mpontu na kankɔ wɔ ahyɛmu anamɔn kwan no do. (Hwɛ Preach My Gospel, tsir 11, fa nya adwenkyerɛ binom so.)

Kyɛ. Sɛ erekyɛ mbrɛ Agyenkwa no esi aboa wo ber a erobɔ mbɔdzen dze asɛmpa fapem no abɔ bra, ntõtõananmu nyina ekyir no a, fa nokwardzi na akokodur yɛ.
Bɔ Nhyira horow ho Anohoba. Nkorɔfo hia siantsir a ɔwɔ dɛ wɔsesã a opuhim hɔn kyɛn siantsir a onnyi dɛ wɔsesã. Erekyerɛkyerɛ nhyira horow a ɔbata ndzeyɛɛ ho mu no botum ama nkuranhyɛ a ɔyɛ ndam (hwɛ Nkyerɛkyerɛ na Ahyɛmudzi 130:20–21).
To Nsa Frɛ. Edze asɛmpa fapem bi robɔ bra no ma inya dasegye dɛ ɔyɛ nokwar (hwɛ John 7:17) na ogya wo kɔ nsakyeree no bun mu.⁴ Nkitahodzi biara mu fã kɛse no, yebotum dze nsato dɛ wɔbɛyɛ biribi a ɔbɔboa hɔn ma woetu mpon akã ho.
Hom mbɔmu nyɛ nhyehyɛɛ. Ebɛn adze na ɔsɛ dɛ wɔyɛ ma ,konyimdzi mu ara, woetum esie hɔn pisi dɛ wɔbɛsesã? Hom besi dɛn botum aboa? Ana mber nhyehyɛɛ kã ho a?
Abamba. Sɛ okehia a, hom nya nkorɔfo kuw a wobotum aboa ankorankor no ma ɔakɔ do enya nkuranhyɛ na konyimdzi. Hɛn nyina yehia ekyirtaafo.
Dzi ekyir. Taa dɛ ibɛkyɛ mpontu a worutu no ho asɛm. Fa enyi tsim nhyehyɛɛ no do naaso sɛ okehia a yɛ ho nsiesie. Nya abotar, tsim do, na hyɛ nkuran. Nsesã botum akyɛr ana ɔaba.

Nsato dɛ Wɔbɛyɛ Biribi

Susu akwan horow a wo mbɔdzembɔ dɛ ibɔ-som—akɛse na nkumabaa nyina—botum aboa nkaafo ma hɔn nsakyeree adɔ bun mu na wɔabɛyɛ tse dɛ Agyenkwa no ara yie.

© 2019 odzi wɔ Intellectual Reserve, Inc. Wɔakora do tumdzi nyina. Wotsintsimii wɔ USA. Ngyiresi Borɔfo kasa ngye ntomu: 6/18. Nkyerɛasee ngye ntomu: 6/18. Ministering Principles, January 2019 ne nkyerɛasee. Fante. 15762 502