Ifa usun epwe chok Mecheres ach Apasa ach Kapasen Pwarata

Ew kapasen pwarata esap chok poputa ren ekkewe foun kapas, “Ua mochen upwe apasa ai kapasen pwarata,” me esap chok mwuchuno ren, “Non iten Jises Kraist, amen.” Ew kapasen pwarata ew napanapen met kich mi nuku me sinei pwe mi ennet. Iwe ren om churi chon orum we won ewe aan usun an we osukosuk me apasa, “Ngang mi sinei pwe Kot mi ponuweni iotek,” mi tongeni watte manamanan usun ew kapasen pwarata mi fis me ren ewe rong non fan. Ewe manaman ese feito seni kapas echipwer; a feito seni ewe Ngun mi Fel an apungano ennet (nengeni Doctrine and Covenants 100:7–8).

Ika kich mi mochen aea ngeni ekkoch, mi wor tufich unukuch ach sipwe akuchanong kapasen pwarata non aporous iteiten ran. Ren awewe:

• Emon a eisinuk usun met ka fori won Ammon me Raninfel. “A men och,” ka ponuweni. “Fan ina chok met a murino ngeniei.”

• Emon a apasa an mefi netipeta mwirin an sinei usun ew mettoch mi weires non manauom: “Fokkun omusano.” Ka ponuweni: “Kinisou ren om aurek. Ngang mi sinei pwe Kot epwe anisiei. Mi fen nonnom rei me akkom.”

• Emon a apasa: “Ua anean pwe ei raningaw epwe mwitir siwin,” ika “Ennetin ewe pas a mang,” ika “Nengeni ei osukosuken taraku won an.” En mi tongeni ponuweni: “Ngang mi nuku Kot epwe anisi mettoch meinisin epwe wesino.”

Sia kan soun kapas fengen usun ach osukosuk. Nupwen emon a urenuk usun met ra weri, en mi tongeni aporousa ew fansoun nupwen Kot a anisuk non om sossot me pwarata pwe en mi sinei pwe I mi tongeni pwan anisir. Ewe Samon a apasa pwe A apochokuna kich non ach sossot “pwe oupwe uta pwe oupwe chon pwarata ngeniei mwirin, me pwe oupwe tongeni ennetin sinei pwe ngang, ewe Samon Kot, ua churi nei aramas non ar riaffou” (Mosaia 24:14). Sia tongeni uta pwe chon pwarata usun I nupwen sia pwarata ifa usun I a fen anisikich non ach sossot.

Ren ekkoch me neich, ach sipwe apasa ach kapasen pwarata non weiweita mi tongeni an epwe anuokus. Mi wor ekkoch aanen sipwe tongeni amwonneta me mwan me “amonnata fansoun meinisin pwe oupwe tongeni ponuweni emon nupwen epwe eisini [kich] ussun minne [sia] epinukunuku” (1 Peter 3:15).

Aewin, ach mwonneta mi tongeni wewengeni ach sipwe nengeni ifa usun nonnomuch. Kich mi mutanong ewe Ngun mi Fel non manauach me apochokuna pwisin ach kapasen pwarata iteiten ran ren ach manau wenechar? Kich mi atufichi an ewe Ngun epwe kapas ngenikich me ngenikich ekkewe kapas mi auchea ngenikich seni iotek me kaeon pukefel? Ewe Samon a auroura Hyrum Smith, pwe sisap achocho ne afanafana an kapas, nge akkom achocho ne angei an kapas, pwe mwirin epwe suk awach (nengeni Doctrine and Covenants 11:21).

Oruwan, om mwonneta mi tongeni wewengeni om neneno mwom me ekieki ekkoch tufich epwe wor reom non ena ran ika ena wik om kopwe apasa om kapasen pwarata. En mi tongeni mwonneta ngeni ekkena fansoun ren om ekieki ifa usun repwe tongeni awora ngonuk ew tufich ne apasa met en mi nuku.

Preseten Ballard a aitikich, “Ina mwo ika kich chon ei Mwichifen mi tongeni wor ach kapasen pwarata usun chommong mettoch, mi wor ekkoch nongonongen ennet mi auchea ach sipwe soun aiti fengeni kich me aea fengen.” Usun awewe, a etettenatiw: “Kot I Samach me Jises I ewe Kraist. Ewe kokkoten amanau mi ionap won ewe Achesefanin ewe Chon Amanau. Joseph Smith a eniwinato unusenapen ewe kapas allimen Jises Kraist esemuch, me ewe Puken Mormon mi pwarata pwe ach kapasen pwarata mi ennet.” Nupwen sia apasa ekkei ennet seni ennetin netipach, sia mut ngeni ewe Ngun epwe pwarata pwe met sia fen apasa mi ennet. Preseten Ballard a pesei pwe “ewe Ngun ese tongeni epwe mwoch nupwen ennetin kapasen pwarata usun Kraist a fis.”²

Apwangapwang seni ew sai non Samaria, ewe Chon Amanau a kouno an epwe asoso ren ew ito me churi emon fefin ikewe. A poputani ew aporous usun an itit konik seni ewe ito. A aea ei angang mi fis iteiten ran minne ewe fefin mi fofori a awora ngeni Jises ewe tufich ne pwarata usun ewe konik mi manau me manau esemuch mi fich ngeni ekkewe mi nuku non I (nengeni John 4:13–15, 25–26).

Preseten Russell M. Nelson a fen ureni emon kangof ewe a fen eisini Nelson nupwen an we emon tokter ew kapaseis mwirin ew angangen reirei mi aweires. “Pwata kose usun ekkoch chon reirei?” Ekkoch chon reirei neminewe mi sinei ir mi nisosong me rese sufonoch nupwen ra fori ekkenan angangen reirei mi aweires.

Dr. Nelson mi tongeni epwe ponuweni non chommong napanap. Nge a chok ponuweni, “Pokiten Ngang mi sinei ewe Puken Mormon mi ennet.”

Ponuwan we me ren a pesei ewe kangof me punuwan we ar repwe kaeo ewe Puken Mormon. Mwirin Preseten Nelson a papataisei ewe kangof. Chommong ier mwirin, nupwen an emweni ew mwichen steik non Tennessee, USA, nupwen an keran emon Aposel mi epinipinino, Preseten Nelson a pwapwaiti echusefan ese akokkot ngeni ewe chok pwan kangof. Neminewe a aporousa sefan pwe an ewe ekkesiwin, a fis pokiten an we kapasen pwarata mi mecheres me ewe pochokunen ewe Puken Mormon, a emweni ekkesiwinin pwan 80 aramas.³

Ousap nuokus ne apasa ami kapasen pwarata. Mi tongeni efeiochu ekkewe oua iamwir ngenir. Ifa usun oupwe aea ekkei kokkot ika pwisin ami ne apasa ami kapasen pwarata ikenai?